އެމެރިކާގެ އަސްކަރީ ބޯޓެއް ކުވައިތަށް ވެއްޓިއްޖެ

ކުވައިތުގެ އުތުރު ހުޅަނގުގައި އޮންނަ އަލް-ޖަހްރާ ސަރަހައްދަށް އެމެރިކާގެ އަސްކަރީ ބޯޓެއް ވެއްޓިއްޖެއެވެ.

މި ހާދިސާ ހިނގާފައިވަނީ މިއަދު ހެނދުނުގެ ވަގުތެއްގައެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ބޯޓު ވެއްޓުމުގެ ކުރިން އޭގެ ފަހަތު ބައިގައި ވަނީ އަލިފާން ރޯވެފައެވެ.

ކުވައިތުގެ ޑިފެންސް މިނިސްޓްރީގެ ތަރުޖަމާނު އެކްސް މެދުވެރިކޮށް ވިދާޅުވީ، އެމެރިކާގެ އަސްކަރީ ބޯޓެއް ވެއްޓުނު ނަމަވެސް، އޭގައި ތިބި ދެ ޕައިލެޓުން ކާމިޔާބުކަމާއެކު ބޯޓުން ފުންމާލައި ސަލާމަތްވެފައިވާ ކަމަށެވެ. ޕައިލެޓުން ސަލާމަތްވީ ބޯޓު ބިމަށް ވެއްޓުމުގެ ކުރިން ޕެރަޝޫޓް ބޭނުންކޮށްގެން ފުންމާލައިގެންނެވެ.

ކުވައިތުގެ ކަމާބެހޭ ފަރާތްތަކުން ވަނީ ހާދިސާ ހިނގި ސަރަހައްދުގައި ވަގުތުން ސާޗް އެންޑް ރެސްކިއު އޮޕަރޭޝަނެއް ފަށާފައެވެ. ސަލާމަތްވި ދެ ޕައިލެޓުން މިހާރު ވަނީ ހޮސްޕިޓަލަށް ގެންގޮސް ފަރުވާ ދޭން ފަށާފައެވެ. ޑިފެންސް މިނިސްޓްރީން ބުނި ގޮތުގައި އެ ދެ މީހުންގެ ހާލުވެސް މިހާރު ސްޓޭބަލް އެވެ.

މި ހާދިސާ ހިނގަން މެދުވެރިވި ސަބަބެއް ނުވަތަ އެ ބޯޓަކީ ކޮން ކަހަލަ މިޝަނެއްގައި އުޅުނު ބޯޓެއްކަން ކުވައިތުގެ ރަސްމީ އިދާރާތަކުން އަދި ހާމަކޮށްފައެއް ނުވެއެވެ. އަދި ވެއްޓުނު ބޯޓުގެ މޮޑެލްއެއްވެސް ރަސްމީކޮށް ކަށަވަރުކޮށްދީފައެއް ނުވެއެވެ.

ނަމަވެސް، އާންމުވެފައިވާ ވީޑިއޯތަކަށް ބަލައި ބައެއް ފަރާތްތަކުން ލަފާކުރާ ގޮތުގައި އެއީ F-15 ނުވަތަ F/A-18 މަރުކާގެ ބޯޓެކެވެ. ސަރަހައްދީ މަސްރަހު ނުތަނަވަސްވެފައިވާ ދަނޑިވަޅެއްގައި މި ހާދިސާ ހިނގާފައިވީ ނަމަވެސް، މިއީ އެހެން ކަމަކާ ގުޅުންހުރި ހާދިސާއެއްކަން ސާބިތުވާނެ އެއްވެސް ރަސްމީ މައުލޫމާތެއް އަދި ލިބިފައެއް ނުވެއެވެ.