މޯހަންއާއެކު ވިކްޓަރީގެ ފަރިތަކުރުންތައް ފަށައިފި

ވިކްޓަރީ ސްޕޯޓްސް ކްލަބްގެ ކޯޗެއްގެ މަޤާމާއި އަލަށް ހަވާލުވި މުޙައްމަދު ޝިޔާޒް (މޯހަން)އާއެކު އެ ޓީމުގެ ފަރިތަކުރުންތައް އިއްޔެ ފަށައިފިއެވެ.

މިދިޔަ މަހުގެ 28ވަނަ ދުވަހު ވިކްޓަރީގެ ކޯޗެއްގެ މަޤާމައި ހަވާލުވި މޯހަންއާއެކު ވިކްޓަރީއިން ބޭއްވި ފުރަތަމަ ފަރިތަކުރުން ކުރިޔަށް ގެންގޮސްފައިވަނީ މާފަންނު ޓާފުގައެވެ.

މި ސީޒަންގެ ދެ މުބާރާތް މިހާރު ނިމިފައިވާއިރު، މޯހަންއާއެކު އެ ޓީމުން ތައްޔާރުވާން ފަށާފައި މިވަނީ އެފްއޭކަޕަށެވެ. އެ މުބާރާތް ތާވަލުކޮށްފައި ވަނީ އަންނަ އެޕްރީލް މަހަށެވެ. 

މޯހަންއާއެކު އެސިސްޓެންޓް ކޯޗެއްގެ ހައިސިއްޔަތުން އެ ޓީމުގައި މަސައްކަތް ކުރާނީ، މީގެ ކުރިން ވިކްޓަރީގެ ކޯޗެއްގެ މަޤާމު ވެސް އަދާކޮށްފައިވާ އާދަމް އަބްދުލްލަތީފް (ލައްޗޭ) އެވެ.

ވިކްޓްރީއަށް ނިމިގެން ދިޔަ ލީގުގައި ދިމާވި އެންމެ ބޮޑު މައްސަލައަކީ ޓީމުގެ ފަރިތަކުރުންތަކުގައި ހުރިހާ ކުޅުންތެރިންނަށް އެއްފަހަރާ ބައިވެރިނުވެވުމެވެ. ނަތީޖާއެއްގެ ގޮތުން މެޗުތައް އޮންނަ ދުވަހު ދަނޑުމަތީގައި ކުޅުންތެރިންގެ ގުޅުން ދަށްވެ ކޮންސަންޓްރޭޝަނާއި، މޮޅުވުމުގެ ރޫހު ދަށްވެގެން ދިޔަ ބައެއް މެޗުތަށް ފެނިގެން ދިޔައެވެ.

އެހެންނަމަވެސް ކުރިޔަށް އޮތް އެފްއޭކަޕްގައި ކުރިން ހެދުނު ގޯސްތައް ރަނގަޅުކޮށް ވާދަވެރި މެޗުތަކެއް ކުޅެ ރަނގަޅު ނަތީޖާއަކާއި ހަމައަށް ކުލަބު ގެންދިއުމަށް ވިކްޓްރީގެ މެނޭޖުމެންޓުން ކުޅުންތެރިންނާއި ކޯޗިން ސްޓާފުންނަށް އެއްބާރުލުންދޭނެ ކަމަށް އެ ކުލަބުން ބުނެއެވެ.

ޝިޔާޒް އެންމެ ފަހުން މަސައްކަތް ކުރީ ރާއްޖޭގެ ޤައުމީ ޓީމުގެ ހެޑްކޯޗުގެ މަގާމުގައެވެ. އަދި މިސީޒަން ފެށީ ކްލަބް އީގަލްސްގެ ހެޑް ކޯޗުގެ މަގާމްގައި ހުރެގެންނެވެ.