މެދުއިރުމަތީގެ މަސްރަޙު ގޯސްވުމުގެ ބިރު އޮތްކަމުގެ އިންޒާރު ރަޝިޔާގެ ރައީސް ދެއްވައިފި

 އެމެރިކާއާއި އިޒްރޭލުން އީރާނަށް ދެމުންދާ ހަމަލާތަކުގެ ސަބަބުން، މެދުއިރުމަތީގެ މަސްރަޙު މުޅި ސަރަޙައްދީ ހަނގުރާމައަކަށް ބަދަލުވެދާނެކަމުގެ އިންޒާރު ރަޝިޔާގެ ރައީސް ލަޑީމިއަރ ޕުޓިން ދެއްވައިފިއެވެ.

މިދިޔަ ހޯމަ ދުވަހު ޕުޓިން ވަނީ ގަލްފުގެ ހަތަރު ގައުމެއްގެ އިސްވެރިންނާ ފޯނުން ގުޅުއްވައި، މި ނުރައްކާތެރި ހާލަތާ ގުޅޭގޮތުން މަޝްވަރާ ކުރައްވާފައެވެ. ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާނާއެކު ބޭއްވެވި މަޝްވަރާތަކަށްފަހު ކްރެމްލިންއިން ބުނެފައިވަނީ، މިހާރުވެސް ބައެއް އަރަބި ގައުމުތަކަށް އޭގެ އަސަރު ފޯރާފައިވާ މި ހަނގުރާމަ އިތުރަށް ފުޅާވެ، ބޮޑު ކާރިސާއަކަށް ބަދަލުވެދާނެ ކަމުގެ ބިރު އޮތް ކަމަށް ދެ ބޭފުޅުންވެސް އެއްބަސްވެވަޑައިގަންނަވާ ކަމަށެވެ.

ޕުޓިން ވިދާޅުވި ގޮތުގައި މި ނުރައްކާތެރި ހާލަތުން އަރައިގަތުމަށް ޑިޕްލޮމެޓިކް މަގު އިޚްތިޔާރު ކުރުން މުހިންމެވެ. މީގެ އިތުރުން، ސައުދީ ވަލީއަހުދު ފާހަގަކުރެއްވި ގޮތުގައި، ރަޝިޔާއަކީ އީރާނާއި ގަލްފުގެ ގައުމުތަކާވެސް ގާތް ގުޅުމެއް ބާއްވާ ގައުމަކަށްވާތީ، މަސްރަޙު ހަމަޖެއްސުމުގައި ރަޝިޔާއަށް މުހިންމު ދައުރެއް އަދާކުރެވިދާނެއެވެ.

އެމެރިކާއާއި އިޒްރޭލުން ދެމުންދާ ހަމަލާތަކާއި، އީރާނުގެ ރޫހާނީ މީހާ އާޔަތުﷲ އަލީ ޚާމަނާއީ އަވަހާރަކޮށްލި ކޮށްލުން ރަޝިޔާއިން ވަނީ ތަކުރާރުކޮށް ކުށްވެރިކޮށްފައެވެ.

ޕުޓިން ވަނީ ޔުނައިޓެޑް އަރަބް އެމިރޭޓްސްގެ ރައީސް މުހައްމަދު ބިން ޒައިދު އަލް ނަހްޔާނާވެސް ވާހަކަފުޅު ދައްކަވާފައެވެ. މި މަޝްވަރާގައި ދެ ބޭފުޅުންވެސް ބާރުއެޅުއްވީ ހަމަލާތައް ހުއްޓާލައި ސިޔާސީ އަދި ޑިޕްލޮމެޓިކް މޭޒަކަށް އެނބުރި ދިއުމަށެވެ.

ކްރެމްލިންއިން ހާމަކުރި ގޮތުގައި، ގަތަރުގެ އަމީރު ތަމީމް ބިން ހަމަދު އަލްޘާނީއާއެކު ބޭއްވެވި ފޯނު ކޯލުގައި، މެދުއިރުމަތީގެ ހަމަނުޖެހުންތަކުގެ ތެރެއަށް ތިންވަނަ ގައުމެއް ދަމައިގަނެވިދާނެ ކަމުގެ ބިރު އޮތްކަން ދެ ބޭފުޅުން ފާހަގަކުރެއްވިއެވެ. މީގެ އިތުރުން ބަހުރޭނުގެ ރަސްގެފާނާވެސް ރަޝިޔާގެ ރައީސް ވަނީ މި މައުޟޫއަށް ވާހަކަފުޅު ދައްކަވާފައެވެ.