ރައީސުލްޖުމްހޫރިއްޔާގެ ނިންމެވުމުގެ ދަށުން ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނަށް ބޮޑު ލުޔެއް!

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނިންމެވުމުގެ ދަށުން ސިވިލް ސަރވިސްގައި މަސައްކަތްކުރާ ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނަށް ގޭގައިތިބެގެން މަސައްކަތްކުރެވޭނެ ގޮތަށް ސިވިލް ސަރވިސްގެ ޤަވާއިދު އިޞްލާޙުކޮށްފިއެވެ.

އެގޮތުން، ސިވިލް ސަރވިސްގައި މަސައްކަތްކުރާ ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނަށް އޮފީހަށް ހާޒިރުނުވެ، އޮފީހުގެ ރަސްމީ މަސައްކަތްތައް ކުރުމަށް އެދޭ ހާލަތުގައި، އެގޮތަށް މަސައްކަތްކުރުމުގެ ހުއްދަ އެ އިދާރާއަކުން ދޭންވާނެކަމުގައި މި އިޞްލާޙުގައި ވަނީ ބަޔާންކޮށްފައެވެ. އަދި މިފަދައިން ހުއްދަ ދެވޭނީ ނުކުޅެދުންތެރިކަން ހުންނަ ފަރާތުގެ ޢާންމު ދިރިއުޅުމުގައި ދުވަހުން ދުވަހަށް ކުރަންޖެހޭ ކަންތައްތަކުގައި އެހެން ފަރާތެއްގެ އެހީތެރިކަން ބޭނުންވާނެ މިންވަރު ބަޔާންކޮށް ޞިއްޙީ މަސައްކަތްތެރިޔަކު ދޫކޮށްފައިވާ ލިޔުމަށް ރިޢާޔަތްކޮށްކަމުގައި ވެސް މި އިޞްލާޙުގައިވެއެވެ.

މި މާއްދާގެ ދަށުން، ނުކުޅެދުންތެރިކަން ހުންނަ ފަރާތްތައްކުގެ ބެލެނިވެރިން  3 ގޮތަކަށް ދަރަޖަކުރެވޭއިރު، އޭގެ ތެރޭގައި ހިމެނެނީ ޢާންމު ދިރިއުޅުމުގައި ދުވަހުން ދުވަހަށް ކުރަންޖެހޭ ކަންތައްތަކުގައި އެހެން ފަރާތެއްގެ އެހީތެރިކަން ކޮންމެހެން ވެސް ބޭނުންވާ ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނާއި، އެހެން ފަރާތެއްގެ އެހީތެރިކަން މެދުމިންވަރަކަށް ބޭނުންވާ ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިން، އަދި އެހެން ފަރާތެއްގެ އެހީތެރިކަން ބޭނުންނުވާ ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނެވެ.

މި ޤަވައިދުގައި ބަޔާންކޮށްފައިވާ ދަރަޖަ 1 ގައިވާ ބެލެނިވެރިންނަށް، މުޅި ދުވަހު އެއްކޮށް އޮފީހަށް ހާޒިރުނުވެ މަސައްކަތްކުރުމުގެ ހުއްދަދޭންވާނެކަމަށާއި، އަދި ދަރަޖަ 2 އަދި 3 ގައި ބަޔާންކުރާ ބެލެނިވެރިން އޮފީހަށް ހާޒިރުނުވެ މަސައްކަތްކުރުމުގެ ހުއްދަ ދޭންވާނީ ނުކުޅެދުންތެރިކަން ހުންނަ ފަރާތުގެ ގާތުގައި ކޮންމެހެންވެސް ހުންނަންޖެހޭ ހާލަތެއް މެދުވެރިވެއްޖެނަމަކަމުގައި ވަނީ ކަނޑައަޅާފައެވެ. އަދި ނުކުޅެދުންތެރިކަން ހުންނަ ފަރާތުގެ ބެލެނިވެރިންގެ ތެރެއިން ދެ ފަރާތަކީވެސް ސިވިލް ސަރވިސްގެ މުވައްޒަފުންކަމުގައި ވާނަމަ، ނުކުޅެދުންތެރިކަން ހުންނަ ފަރާތަށް ދިމާވާ ޚާއްޞަ ހާލަތަކާ ގުޅިގެން ދެފަރާތަށް އެއްފަހަރާ އޮފީހަށް ހާޒިރުނުވެ މައްސައްކަތްކުރުމުގެ ހުއްދަ ދެވޭނެކަމުގައި އިޞްލާޙުގައިވެއެވެ. 

މީގެ އިތުރުން، ސިވިލް ސަރވިސް ޤަވާއިދަށް ގެނައި އިޞްލާޙުގެ ދަށުން، ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނަށް އޭނާ ބަލަހައްޓާ ނުކުޅެދުންތެރިކަން ހުންނަ ފަރާތަށް ދިމާވާ ހާލަތާއި ގުޅިގެން، ރަސްމީ މަސައްކަތު ގަޑި ފެށޭ ވަގުތަށް އޮފީހަށް ހާޒިރުނުވެވޭ ދުވަސްތަކަށް، މަސައްކަތަށް ހާޒިރުވުމުގައި އެއް ގަޑިއިރުގެ ބަފަރ ޓައިމެއް ލިބޭނެއެވެ. އަދި އެފަދަ ފަރާތްތަކުގެ ޒިންމާތަކުގެ ތެރެއިން އާދަވެގެން ކޮންމެ ދުވަހަކު އަދާކުރަންޖެހޭ ޒިންމާއަކާ ގުޅިގެން އިތުރަށް ވަގުތު ބޭނުންވާ ހާލަތުގައި، ޢާންމުކޮށް ލިބޭ 30 މިނެޓުގެ ހުސްވަގުތުގެ އިތުރަށްވެސް، އޮފީހުން ކަނޑައަޅާ އުޞޫލެއްގެ މަތީން އިތުރު ވަގުތު ހަމަޖައްސައިދޭންޖެހޭނެ ކަމަށް މި އިޞްލާޙުގައި ބަޔާންކޮށްފައިވެއެވެ.

މި ބަދަލުގެ ސަބަބުން، ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނަށް ވަޒީފާއަށް ދިއުމުގައި ހުރި ގޮންޖެހުންތަކަށް ދެމެހެއްޓެނިވި ޙައްލެއް ގެނައުމާއެކު، ވަޒީފާގެ މައިދާނުގައި ހަރަކާތްތެރިވުމަށް ފުރުޞަތު ފަހިވެގެންދާނެއެވެ.