ރާއްޖޭގައި ޝީޝާ މަނާކޮށް ހަކުރުން ސަބްސިޑީ ކަނޑާލުމަކީ ސަރުކާރުން ކުރަން އުޅޭ ކަމެއް ނޫން: ރައީސް

ރާއްޖޭގައި ޝީޝާ މަނާކޮށް ހަކުރުން ސަބްސިޑީ ކަނޑާލުމަކީ ސަރުކާރުން ކުރަން އުޅޭ ކަމެއް ނޫންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ، "ދަ ގްރޭޓާ އައްޑޫ ވިޝަން" ގެ ތަފްޞީލް ލޯންޗު ކުރުމަށް އާޓިފިޝަލް ބީޗުގައި ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ، ރާއްޖޭގައި ޝީޝާ މަނާކޮށް ހަކުރުން ސަބްސިޑީ ކަނޑާލުމަކީ ސަރުކާރުން ކުރަން އުޅޭ ކަމެއް ނޫން ކަމަށާއި އިތުރު ކަންކަން މަނާ ކުރުމަކީ ސަރުކާރުގެ ސިޔާސަތެއް ނޫން ކަމަށެވެ. ހަމަ އެހެންމެ، އެމަނިކުފާނުގެ ސަރުކާރުގެ ސިޔާސަތަކީ އިތުރު ކަންކަން މަނާ ކުރުމުގެ ބަދަލުގައި ޢާންމުން ހޭލުންތެރިކޮށްގެން ނުރަނގަޅު އާދަކާދަތަކާ ދުރު ކުރުމަށް މަސައްކަތްކުރުން ކަމަށް ރައީސް ވަނީ ވިދާޅުވެފައެވެ.

އަޅުގަނޑުމެން ނޫޅެން ޝީޝާ ބުއިން ބޭން ކުރާކަށް. ހަކުރުގެ ސަބްސިޑީ ކަނޑާލާކަށް. މިކަހަލަ ކަންކަން ކުރާކަށް ނޫޅެން. ނަމަވެސް ޕަބްލިކް އެވެއާނަސް އިތުރުކޮށް މިކަންކަމުން ދުރުހެލިވުމަށް ބާރު އަޅައި ހިތްވަރުދޭން އަޅުގަނޑުމެން ބޭނުން ވަނީ.

ރައީސް ވިދާޅުވިއެވެ.

ރައީސް އިތުރަށް ވިދާޅުވީ، މިހާރު ޝީޝާ ބުއި ކަމުގައި ވިޔަސް ކުޑައިރުގައި ބައެއް ދިވެހިން ބޮއެ އުޅުނީ ގުޑުގުޑާ ކަމަށެވެ. އަދި އެއީ ދިވެހިންގެ ތެރޭގައި ވަރަށް ބޮޑަށް އާދަވެފައި ހުރި ކަމަކަށްވީއިރު، މަނާކޮށްގެން އާދަވެފައި ހުރި ކަމަކުން ދުރު ކުރުމަކީ އެހާ ފަސޭހަކަމެއް ނޫންކަން އެމަނިކުފާނު ފާހަގަކުރެއްވިއެވެ. ނަމަވެސް އެކަންކަމަށް ހޭލުންތެރިކޮށްދީ، އެކަންކަމުން ދުރުވުމަށް ނިޒާމީ ގޮތެއްގައި ހިތްވަރު ދެވޭނެ ކަމަށާއި، ހަކުރުގެ ޑިއުޓީ ކަނޑާލައި ހަކުރު އަގު ބޮޑު ކުރުމަކީ ސަރުކާރުގެ ސިޔާސަތެއް ނޫންކަމަށް އެމަނިކުފާނު ތަކުރާރުކޮށް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ޞިއްޙީ ކަންކަމުގައި ސަރުކާރުން ނިންމާ ނިންމުންތަކަކީ އިޚްލާޞްތެރިކަމާއި ތެދުވެރިކަމާއެކީގައި ނިންމާ ނިންމުންތަކެއް ކަމަށެވެ.