އިސްލާމްއާބާދުގައި ބާއްވާ މަޝްވަރާތަކުގައި ބައިވެރިވާ އީރާނުގެ ވަފުދަށް "މިނާބް 168" ގެ ނަން ދިނީ ކީއްވެ؟

ޕާކިސްތާނުގެ އިސްލާމްއާބާދުގައި ކުރިއަށްދާ މަތީ ފަންތީގެ ޑިޕްލޮމެޓިކް މަޝްވަރާތަކުގައި ބައިވެރިވާ އީރާނުގެ ވަފުދަށް، ރަމްޒީ ނަމެއްގެ ގޮތުގައި "މިނާބް 168" ގެ ނަން ދީފިއެވެ. އީރާނުގެ އޮފިޝަލުން ވިދާޅުވާ ގޮތުގައި މި ނަމަކީ މިހާރު ހިނގަމުންދާ ހަނގުރާމައިގައި އިންސާނިއްޔަތަށް ލިބެމުންދާ ގެއްލުންތައް ރަމްޒުކޮށްދޭ އަދި ސުލްހަވެރި ހައްލަކަށް ބާރުއެޅުމުގެ ގޮތުން ދެވިފައިވާ ނަމެކެވެ.

ޓެހްރާނުން ލިބޭ ރިޕޯޓްތައް ބުނާ ގޮތުގައި، މި ނަން ނިސްބަތްވަނީ އީރާނުގެ ސިޓީއެއް ކަމަށްވާ މިނާބް އަށެވެ. ހަނގުރާމަ ވަރުގަދަވި ފުރަތަމަ ދުވަހު އެ ސިޓީގެ ސްކޫލަކަށް އަމާޒުކޮށް ދިން ވަރުގަދަ ހަމަލާއެއްގައި، 168 ދަރިވަރުންނާއި މުދައްރިސުން ޝަހީދުވިއެވެ. މި ހިތާމަވެރި ހާދިސާގެ ހަނދާނުގައި ދެވުނު މި ނަމުގެ މަގްސަދަކީ، މަޝްވަރާތަކުގެ ތެރޭގައި އާންމު ރައްޔިތުންނަށް ލިބޭ ގެއްލުންތަކަށް ބައިނަލްއަގުވާމީ ސަމާލުކަން ހޯދުމާއި، ހަނގުރާމަ ހުއްޓާލުމުގެ މުހިންމުކަން ހާމަކުރުމެވެ.

އީރާނުގެ މަސްދަރުތަކުން ބުނާ ގޮތުގައި، ވޭތުވެދިޔަ ހަފުތާތަކުގައި އާންމުން ދިރިއުޅޭ ސަރަހައްދުތަކާއި، ސްކޫލްތަކާއި، ޔުނިވަރސިޓީތަކުގެ އިތުރުން ސިއްހީ މަރުކަޒުތަކަށް ދެމުންދާ ހަމަލާތައް ވަނީ އިތުރުވެފައެވެ. "މިނާބް 168" ގެ ނަމާއެކު އީރާނުން ބޭނުންވަނީ މި ހަނގުރާމައަށް ސިޔާސީ ހައްލެއް ހޯދައި، އިތުރަށް މަޝްވަރާގެ މަގަށް ރުޖޫއަވުމަށެވެ.

މި މުހިންމު ވަފުދު އިސްކޮށް ލީޑު ކުރައްވަނީ އީރާނުގެ ޕާލަމަންޓްގެ ރައީސް މުހައްމަދު ބާގިރު ގާލީބާފް އެވެ. އޭނާގެ އަރިހުގައި ޚާރިޖީ ވަޒީރު އައްބާސް އަރާގްޗީ އާއި ޕާކިސްތާނުގައި ހުންނަވާ އީރާނުގެ ސަފީރު ރެޒާ އަމީރީ މޮގައްދަމް ބައިވެރިވެވަޑައިގަންނަވައެވެ.

މީގެ އިތުރުން، އީރާނުގެ ސަލާމަތީ އަދި އިސްތިރާތީޖީ ދާއިރާތަކުގެ އިސް ބޭފުޅުން ކަމަށްވާ ސުޕްރީމް ނެޝަނަލް ސެކިއުރިޓީ ކައުންސިލްގެ އަލީ އަކްބަރު އަހްމަދިއާން އާއި އަލީ ބާގިރީ ކަނީ މި ވަފުދުގައި ހިމެނިވަޑައިގަންނަވައެވެ. މިއީ މި މަޝްވަރާތަކުގައި ސަލާމަތީ ކަންކަމަށް އީރާނުން ދޭ އަހައްމިއްޔަތު ހާމަކޮށްދޭ ކަމެކެވެ.

މި ވަފުދުގައި ތައުލީމީ އަދި ދިފާއީ ދާއިރާގެ މާހިރުންގެ ގޮތުގައި ނެޝަނަލް ޑިފެންސް ޔުނިވަރސިޓީގެ ރައީސް އިސްމާއީލް އަހްމަދީ މޮގައްދަމް ބައިވެރިވެވަޑައިގަންނަވާއިރު، އިގްތިސާދީ ދާއިރާއިން ސެންޓްރަލް ބޭންކުގެ ގަވަރުނަރު ނާސިރު ހިމާދީ ވެސް ވަނީ ހިމަނާފައެވެ. އަދި ޚާރިޖީ ވުޒާރާގެ ތަރުޖަމާނު އިސްމާއީލް ބަގާއީ އާއި އެހެނިހެން އިސް ޑިޕްލޮމޭޓުން ވެސް މި ވަފުދުގައި ހިމެނެއެވެ.

މުހައްލިލުން ދެކޭ ގޮތުގައި، އީރާނުން މިފަދަ އަސަރުގަދަ ނަމެއް ވަފުދަށް ދިނުމަކީ، ހަނގުރާމައިގެ ހިތްދަތިކަން ދުނިޔެއަށް ހާމަކޮށްދިނުމާއެކު، ސިޔާސީ ގޮތުންނާއި ޑިޕްލޮމެޓިކް ގޮތުން އީރާނުގެ ހުށަހެޅުންތައް ވަރުގަދަ ކުރުމަށް އެޅި ފިޔަވަޅެކެވެ.