ރައީސް މުޢިއްޒު އަންނަ މަހު ސްރީލަންކާއަށް ވަޑައިގަންނަވަނީ

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރިއަށް އޮތް މާޗު މަހުގެ ތެރޭގައި އަވަށްޓެރި ސްރީލަންކާއަށް ރަސްމީ ދަތުރުފުޅެއް ކުރެއްވުމަށް ހަމަޖެހިފައިވާ ކަމަށް އެ ގައުމުގެ މީޑިއާތަކުން ރިޕޯޓްކޮށްފިއެވެ.

 މިއީ ދެ ގައުމުގެ ދެމެދުގައި އޮތް ޒަމާންވީ ގުޅުން އިތުރަށް ހަރުދަނާކުރުމަށް ކުރެވޭ މުހިންމު ދަތުރުފުޅެކެވެ.

މީޑިއާ ރިޕޯޓުތައް ބުނާ ގޮތުގައި، ރައީސް މުއިއްޒު ލަންކާއަށް ވަޑައިގަތުމަށް ތައްޔާރުވަމުންދާއިރު، ދެ ގައުމުގެ ދެމެދުގައި އޮތް ގުޅުން އެކި ދައިރާތަކުން އިތުރަށް ބަދަހިކުރުމަށް ދަނީ ގިނަ މަސައްކަތްތަކެއް ކުރެވެމުންނެވެ. ހާއްސަގޮތެއްގައި މަސްވެރިކަމުގެ ދާއިރާއިން ދެ ގައުމުގެ ގުޅުން އިތުރަށް ބަދަހިކުރުމަށް މަސައްކަތްތަކެއް ކުރެވެމުންދާ ކަމަށް މީޑިއާތަކުން ފާހަގަކުރެއެވެ.

މި ދަތުރުފުޅުގެ ތައްޔާރީތަކާ ގުޅޭގޮތުން، ރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ސަފީރު ވަނީ އެ ގައުމުގެ މަސްވެރިކަމާ ބެހޭ ވަޒީރާ ބައްދަލުކުރައްވައި މުހިންމު މަޝްވަރާތަކެއް ކުރައްވާފައެވެ. މި މަޝްވަރާތަކުގެ ތެރޭގައި، ރާއްޖޭގެ ތާޒާ މަހުގެ ވަޞީލަތްތަކާއި ލަންކާގެ ކުރިއަރާފައިވާ ދަޅުމަސް އުފައްދާ ސިނާއަތް އެކުވެގެން ބާޒާރަށް އައު އުފެއްދުންތަކެއް ނެރުމާ ގުޅޭގޮތުން ވާހަކަދެކެވުނެވެ.

ޚާއްޞަކޮށް، ސިލޯނުގެ މަސް ބަންދުކޮށް، އަގު އެއްކުރެވިފައިވާ އުފެއްދުންތައް ދިވެހި ބާޒާރަށް އަމާޒުކޮށް އުފެއްދުމަށް ބޮޑު ޝައުޤުވެރިކަމެއް ފާޅުކޮށްފައިވެއެވެ. މީގެ އިތުރުން، މިހާރު ލަންކާގެ މަހުގެ އުފެއްދުންތައް ދުބާއީ މެދުވެރިކޮށް ރާއްޖެއަށް އެތެރެކުރަމުންދާ ދިއުން ނިމުމަކަށް ގެނެސް، މެދުވެރިއަކާ ނުލައި ސިލޯނުން ސީދާ ރާއްޖެއަށް މި ތަކެތި ފޯރުކޮށްދެވޭނެ ނިޒާމެއް ގާއިމުކުރުމަށްވެސް ވަނީ މަޝްވަރާކޮށްފައެވެ.

ދިވެހިރާއްޖެއާއި ސްރީލަންކާއާ ދެމެދު ރަސްމީކޮށް ޚާރިޖީ ގުޅުން ގާއިމުކޮށްފައިވަނީ 1965 ވަނަ އަހަރު ރާއްޖެއަށް މިނިވަންކަން ލިބުމާއެކުގައެވެ. އޭގެ ފަހުން ދެ ގައުމުގެ ދެމެދުގައި އޮންނަނީ ވަރަށް ގާތް، އެކުވެރި ގުޅުމެކެވެ.