ތެހެރާންގެ ތަޖްރިޝް މައިދާނުގައި މިނާބް ހަމަލާގައި ޝަހީދުވި ކުދިންގެ ހަނދާން އާކޮށްފި

އިރާނުގެ ވެރިރަށް ތެހެރާންގެ އެންމެ ކާރޫބާރޫ ބޮޑު އެއް ސަރަހައްދު ކަމަށްވާ ތަޖްރިޝް މައިދާނުގައި، މިނާބްގެ ސްކޫލަކަށް ދިން ހަމަލާގައި ޝަހީދުވި ކުޑަކުދިންގެ ހަނދާނީ ބިނާއެއް ގާއިމުކޮށްފިއެވެ. މި ހަރަކާތަކީ އެ ހަމަލާގައި ވަކިވެދިޔަ ކިޔަވާ ކުދިންގެ ހަނދާން އާކުރުމާއި، އެކުދިންގެ އާއިލާތަކާއެކު ސާބިތުކަމާއެކު ތިބިކަން ހާމަކުރުމުގެ ގޮތުން ކުރިއަށް ގެންދިޔަ ހަރަކާތެކެވެ.

މިދިޔަ ފެބުރުވަރީ މަހުގެ 28 ވަނަ ދުވަހު މިނާބްގެ ސްކޫލަކަށް އަމާޒުކޮށް ދިން މި ނުރައްކާތެރި ހަމަލާގައި 160 އަށްވުރެ ގިނަ މީހުން ވަނީ މަރުވެފައެވެ. މީގެ ތެރޭގައި ގިނަ އަދަދެއްގެ އަންހެން ކުދިން ހިމެނޭއިރު، މިއީ މުޅި އިރާނަށް ބޮޑު ސިހުމަކާއި ހިތާމައެއް ގެނުވި ހާދިސާއެކެވެ. ތަޖްރިޝް މައިދާނުގައި ހަރުކޮށްފައިވާ ބޮޑެތި ފޮޓޯތަކުން ފެންނަނީ ހިނިތުންވެފައި ތިބި ކިޔަވާ ކުދިންގެ މޫނުތަކެވެ. މިއީ ހަނގުރާމައިގެ ސަބަބުން އިންސާނިއްޔަތަށް ލިބޭ ބޮޑެތި ގެއްލުންތައް ވަޒަންކޮށްދޭ އަސަރުގަދަ މަންޒަރެކެވެ.

ބައިނަލްއަގުވާމީ މީޑިއާތަކުން ރިޕޯޓްކުރާ ގޮތުގައި، މި ސަރަހައްދަށް ޒިޔާރަތްކުރާ ގިނަ ބަޔަކު ދަނީ އެކުދިންގެ ހަނދާނުގައި މާ ބަހައްޓައި ދުއާކުރަމުންނެވެ. ގިނަ ބަޔަކު ދެކޭގޮތުގައި މިއީ ހަމައެކަނި އިހުތިރާމް އަދާކުރުމެއް ނޫނެވެ. މިއީ މި ލާއިންސާނީ އަމަލު ހިންގި ފަރާތްތަކުން ޒިންމާދާރުކުރުވައި، އިންސާފު ހޯދުމަށް ގޮވާލާ ގޮވާލުމެއްވެސް މެއެވެ.

މި ހާދިސާގެ ހިތާމަ ސިޔާސީ މައިދާނުގައިވެސް ވަނީ ވަރަށް ބޮޑަށް ފާހަގަކުރެވިފައެވެ. އެގޮތުން އިރާނުގެ މަޖިލީހުގެ ރައީސް މުޙައްމަދު ބާގިރު ގާލީބާފް ދާދިފަހުން ޕާކިސްތާނަށް ކުރެއްވި ރަސްމީ ދަތުރުފުޅެއްގައި، ޝަހީދުވި ކުދިންގެ ފޮޓޯތަކާއި އެކުދިންގެ ސްކޫލް ދަބަސްތައް މަތިންދާބޯޓުގެ ސީޓެއްގައި ބަހައްޓަވައިގެން ގެންދެވިއެވެ. އޭނާ ވަނީ އެ ކުދިންނަކީ އޭނާގެ "އެކުވެރިން" ކަމަށް ސިފަކުރައްވައި، މިއީ މުޅި ގައުމުގެ ހިތާމައެއްކަން ހާމަކުރައްވާފައެވެ.

މިނާބްގެ ސްކޫލަށް ދިން ހަމަލާއަކީ މިހާރުވެސް އިރާނުގެ ދާޚިލީ އަދި ޚާރިޖީ މަޝްވަރާތަކުގައި ބޮޑު ބައެއް ހިއްސާކުރާ ކަމެކެވެ.