ބަޑީގެ ހަމަލާއާއި ބައިނަލްއަގުވާމީ މައްސަލައަކާ ގުޅުމެއް އޮތް ކަމުގެ ހެއްކެއް ނުފެނޭ: ޓްރަމްޕް

އެމެރިކާގެ ރައީސް ޑޮނަލްޑް ޓްރަމްޕަށް އަމާޒުކޮށް ދިން ބަޑީގެ ހަމަލާއާއި އީރާނާ ނުވަތަ ބައިނަލްއަގުވާމީ އެއްވެސް މައްސަލައަކާ ގުޅުމެއް އޮތް ކަމުގެ އެއްވެސް ހެއްކެއް މިހާތަނަށް ފެނިފައި ނުވާ ކަމަށް  ޓްރަމްޕް ބުނެފިއެވެ.

ވައިޓް ހައުސްގެ ޕްރެސް ބްރީފިން ރޫމުގައި މީޑިއާތަކާ ބައްދަލުކުރުމުގެ ކުޑަވަގުތުކޮޅެއް ކުރިން، ޓްރަމްޕް ވަނީ ތުހުމަތުކުރެވޭ މީހާ ހޮޓަލުގެ ބޯލްރޫމަށް ދުވެފައި ވަންނަ މަންޒަރު ފެންނަ ސީސީޓީވީ ފުޓޭޖެއް ހިއްސާކޮށްފައެވެ. އެ ވީޑިއޯއިން ފެންނަ ގޮތުގައި، ސެކިއުރިޓީ އޭޖެންޓުން ބަޑި ނަގައިގެން ތިއްބާ، އެ މީހާ ވަނީ ސެކިއުރިޓީ މެޓަލް ޑިޓެކްޓަރުތަކުގެ ކައިރިން ދުވެފައި ގޮސްފައެވެ. މީގެ އިތުރުން، ފޯޔާ ތެރޭގައި ގަމީސް ނުލައި، އަތް ފަހަތަށް ބަނދެފައި ބާއްވާފައި އޮތް މީހެއްގެ ދެ ފޮޓޯއެއް ވެސް ޓްރަމްޕް ވަނީ ދައްކަވާފައެވެ. ބެލެވޭ ގޮތުގައި އެއީ ހަމަލާ ދޭން އުޅުނު މީހާއެވެ.

މި ހާދިސާއާ ގުޅިގެން ޓްރަމްޕްގެ ލީޑަޝިޕަށް ކުރާނެ އަސަރާ ގުޅޭ ގޮތުން ސުވާލު ކުރުމުން އޭނާ ބުނީ، "އެކަމާ މެދު ވިސްނަން ބޭނުން ނުވާ" ކަމަށެވެ. "އަހަރެން މި އުޅެނީ ވަރަށް އާދައިގެ ދިރިއުޅުމެއް. ނަމަވެސް މިއީ ނުރައްކާތެރި ދިރިއުޅުމެއްކަން އެނގޭ. އަހަރެން ދެކޭގޮތުގައި މިކަން މި އަންނަނީ ކުރެވެން އޮތް އެންމެ ރަނގަޅަށް ބަލަހައްޓަމުން،" ޓްރަމްޕް ބުންޏެވެ.

ޓްރަމްޕް އިތުރަށް ބުނީ ބައެއް މީހުންނަށް މިފަދަ ކަންކަން ދިމާވުމުން ވަރަށް ބޮޑަށް ނަފްސާނީ ގޮތުން ބަލިކަށިވާ ކަމަށެވެ. "ތެދަށް ބުނަންޏާ އަހަރެން މިއީ އެފަދަ މީހެއް ނޫން. އަހަރެން މިކަން ބަލައިގަންނަނީ އޮތް ގޮތަށް. އަހަރެން މިކަން ކުރަނީ ގައުމަށްޓަކައި، އެހެން އެއްވެސް ބޭނުމެއްގައެއް ނޫން،" އޭނާ ބުންޏެވެ. އަދި ފަސްޓް ލޭޑީ މެލަނިއާ ޓްރަމްޕް ވެސް މި މަސައްކަތުގެ ނުރައްކާތެރިކަން ގަބޫލުކުރާކަން  އޭނާ ފާހަގަކުރެއްވިއެވެ.

ހަމަލާގެ ވަގުތު ސިފަކުރަމުން ޓްރަމްޕް ބުނީ، ފުރަތަމަ އެއީ ތަބަކެއް ވެއްޓުނު އަޑު ކަމަށް ހީކުރެއްވި ކަމަށެވެ. "އަހަރެން އުންމީދު ކުރީ އެއީ ތަބަކެއް ކަމަށް، އެކަމަކު އެއީ ބަޑީގެ ވަޒަން،" އޭނާ ބުންޏެވެ.

ވޮޝިންޓަން ޑީސީގެ މޭޔަރު މިއުރިއަލް ބައުޒާ ބުނި ގޮތުގައި، ހަމަލާގައި ޒަޚަމްވި ސީކްރެޓް ސާވިސް އޭޖެންޓަށް މިހާރު ދަނީ ހޮސްޕިޓަލުގައި ފަރުވާ ދެމުންނެވެ. އަދި ތުހުމަތުކުރެވޭ މީހާ ވެސް އޮތީ ހޮސްޕިޓަލުގެ ބެލުމުގެ ދަށުގައެވެ. މި ހާދިސާގައި އިތުރު ބަޔަކު ބައިވެރިވި ކަމަށް ބެލެވޭ އެއްވެސް ސަބަބެއް ނެތް ކަމަށް ވެސް މޭޔަރު ބުނެއެވެ.

މެޓްރޯޕޮލިޓަން ޕޮލިސް ޑިޕާޓްމަންޓުގެ އިންޓަރިމް ޗީފް ޖެފްރީ ޑަބްލިއު ކެރޯލް ބުނީ، ހަމަލާ ދިން މީހާގެ އަތުގައި ގިނަ އަދަދެއްގެ ހަތިޔާރު ހުރި ކަމަށެވެ. "އޭނާގެ އަތުގައި ޝޮޓްގަން އަކާއި، ފިސްތޯލައެއްގެ އިތުރުން ގިނަ އަދަދެއްގެ ވަޅި ހުރި،" ކެރޯލް ބުންޏެވެ. އަދި ޒަޚަމްވި އޭޖެންޓުގެ ހާލު ރަނގަޅުވަމުން އަންނަ ކަމަށާއި، މިވަގުތު އާންމުންނަށް އެއްވެސް ނުރައްކަލެއް ނެތް ކަމަށް ވެސް އޭނާ ވަނީ ބުނެފައެވެ.

ސީކްރެޓް ސާވިސްގެ ޑައިރެކްޓަރު ސޯން ކުރަން ވަނީ އޭނާގެ އޭޖެންޓުން ދެއްކި ހިތްވަރަށް ތައުރީފު ކޮށްފައެވެ. "އަޅުގަނޑުމެންގެ ހިތްވަރުގަދަ ފިރިހެނުންނާއި އަންހެނުން ކޮންމެ ދުވަހަކު ކުރާ މަސައްކަތް މިރޭ ފެނިގެން ހިނގައްޖެ. އެއީ ފަސޭހަ ކަމެއް ނޫން،" އޭނާ ބުންޏެވެ. އަދި ރައީސް ޓްރަމްޕް ގުޅައި ހާލު ބެއްލެވީތީ ޝުކުރު އަދާކުރަމުން، ސީކްރެޓް ސާވިސްގެ މިޝަން ކުރިއަށް ގެންދާނެ ކަމަށް އޭނާ ބުނެފައިވެއެވެ.