ކުރީގެ މެންބަރު ރާމިޒް އަވަހާރަވުމާ ގުޅިގެން ރައީސުލްޖުމްހޫރިއްޔާ ތަޢުޒިޔާ ފޮނުއްވައިފި

ދިވެހި ދައުލަތަށާއި ރައްޔިތުންގެ މަޖިލީހަށް ގިނަ ދުވަސްތަކެއް ވަންދެން ޚިދުމަތް ކުރެއްވި ކުރީގެ މެންބަރު ގ. ލިފަދޫ، މުޙައްމަދު ރާމިޒް އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ފޮނުއްވައިފިއެވެ.

މުޙައްމަދު ރާމިޒް އަވަހާރަވީ އުމުރުފުޅުން 74 އަހަރުގައެވެ. އޭނާ އަވަހާރަވުމާ ގުޅިގެން ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި ވަނީ، މަރުޙޫމްގެ ޢާއިލާއަށް ކެތްތެރިކަން ދެއްވުމަށް އެދި ދުޢާކުރައްވާފައެވެ. ރައީސްގެ މެސެޖުގައި ވިދާޅުވީ މުޙައްމަދު ރާމިޒަކީ ރައްޔިތުންގެ މަޖިލީހާއި ރައްޔިތުންގެ ޚާއްޞަ މަޖިލީހުގެ މެންބަރުކަމާއި، ޤައުމަށް އަގުހުރި ޚިދުމަތްތަކެއް ކުރެއްވި ބޭފުޅެއްކަމަށެވެ.

މީގެ އިތުރުން، ރާމިޒަކީ ރާއްޖޭގެ ފަތުރުވެރިކަމާއި ވިޔަފާރީގެ ދާއިރާ ކުރިއެރުވުމަށްވެސް މުހިންމު މަސައްކަތްތަކެއް ކުރެއްވި ބޭފުޅެއްކަން ރައީސުލްޖުމްހޫރިއްޔާ ފާހަގަކުރެއްވިއެވެ. ރައީސްގެ ދުޢާއަކީ މާތްﷲގެ ރަޙްމަތާއި ފުއްސެވުމުގައި މަރުޙޫމް ލަހައްޓަވައި، ސުވަރުގޭގެ ދާއިމީ ނިޢުމަތް މިންވަރު ކުރެއްވުމެވެ.

إِنَّا لِلّهِ وَإِنَّـا إِلَيْهِ رَاجِعُونَ

ރައްޔިތުންގެ މަޖިލީހާއި ރައްޔިތުންގެ ޚާއްޞަ މަޖިލީހުގެ މެންބަރުކަން ކުރައްވާފައިވާ އަދި ފަތުރުވެރިކަމާއި ވިޔަފާރީގެ ދާއިރާއިން ޤައުމަށް ޚިދުމަތް ކުރެއްވި، ގ.ލިފަދޫ، މުޙައްމަދު ރާމިޒް އަވަހާރަވުމުގެ ހިތާމައިގާ އެ ޢާއިލާއަށް ތަޢުޒިޔާ… pic.twitter.com/HUMxGGQ2DM

— Dr Mohamed Muizzu (@MMuizzu) May 9, 2026

މުޙައްމަދު ރާމިޒްގެ ކަށުނަމާދާއި ޖަނާޒާގެ ކަންކަން ކުރިއަށްދާނީ މިއަދުގެ އަޞުރު ނަމާދަށްފަހު އިސްލާމީ މަރުކަޒުގައެވެ.

މަރުޙޫމް މުޙައްމަދު ރާމިޒަކީ ދިވެހި ސިޔާސީ މަސްރަޙުގައި ފާހަގަކޮށްލެވުނު، އަދި ޤާނޫނު އަސާސީ އިޞްލާޙުކުރުމުގެ މަސައްކަތުގައި ރައްޔިތުންގެ ޚާއްޞަ މަޖިލީހުގެ މެންބަރެއްގެ ގޮތުން އިސް ދައުރެއް އަދާކުރެއްވި ބޭފުޅެކެވެ.