ވ. އަތޮޅުގައި ހިނގި ހިތާމަވެރި ޑައިވިން ހާދިސާއާ ގުޅިގެން ރައީސުލްޖުމްހޫރިއްޔާ ހަމްދަރުދީ ފޮނުއްވައިފި

ވ. އަތޮޅުގައި އިއްޔެ ހިނގާދިޔަ ހިތާމަވެރި ޑައިވިން ހާދިސާއާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަމުގެ ފުން ހިތާމައިގައި ބައިވެރިވެވަޑައިގެން، ހަމްދަރުދީގެ މެސެޖެއް ފޮނުއްވައިފިއެވެ.

މި ހާދިސާގައި އިޓަލީވިލާތުގެ ރައްޔިތަކު މަރުވެ، އިތުރު ހަތަރު މީހަކު ވަނީ ގެއްލިފައެވެ. ރައީސުލްޖުމްހޫރިއްޔާގެ މެސެޖުގައި ވިދާޅުވީ، މި ހާދިސާގެ ޚަބަރު އެއްސެވީ ނުހަނު ފުން ހިތާމައާއެކު ކަމަށެވެ. އަދި ފުރާނަ ގެއްލުނު ފަރާތުގެ ޢާއިލާއަށާއި، ގެއްލިފައިވާ ހަތަރު މީހުންގެ ޢާއިލާތަކުގެ އިތުރުން، މި ހިތާމަވެރި ހާދިސާގެ އަސަރު ފޯރާފައިވާ އެންމެހައި ފަރާތްތަކަށް ރައީސް ވަނީ ހަމްދަރުދީ ފޮނުއްވާފައެވެ.

Deepest condolences to President Sergio Mattarella and the people of Italy following the tragic diving incident in Vaavu Atoll, Maldives yesterday. We are deeply saddened by this tragedy, and our thoughts and prayers are with the families of the deceased Italian, the missing four…

— Dr Mohamed Muizzu (@MMuizzu) May 15, 2026

މި ޙާދިސާގައި، ގެއްލިފައިވާ ހަތަރު ޑައިވަރުން ހޯދުމުގެ މަސައްކަތް ސިފައިންނާއި ފުލުހުން ގުޅިގެން ކުރިއަށްގެންދާއިރު، ސަރުކާރުން މިވަގުތު އެންމެ ބޮޑު އިސްކަމެއް ދެނީ އެމީހުން ފެނޭތޯ ހިންގަމުންދާ އޮޕަރޭޝަނަށްކަމަށް ރައީސް ވިދާޅުވިއެވެ. މީގެ އިތުރުން ރައީސުލްޖުމްހޫރިއްޔާ ވަނީ، މި ހޯދުމުގެ އޮޕަރޭޝަނުގައި އިޓަލީ ސަރުކާރުގެ ފަރާތުން ލިބެމުންދާ އެހީތެރިކަމާއި އެއްބާރުލުން ފާހަގަކުރައްވައި، އެކަމަށްޓަކައި ޝުކުރު އަދާކުރައްވާފައެވެ.

މި ހާދިސާ ހިނގަން މެދުވެރިވި ސަބަބު ދެނެގަތުމާއި، ގެއްލުނު މީހުން ހޯދުމުގެ މަސައްކަތް ކަމާބެހޭ އިދާރާތަކުން ހުއްޓުމެއްނެތި ދަނީ ކުރަމުންނެވެ.