އިނގިރޭސިވިލާތަށް އެތެރެކުރާ ދިވެހި ކަނޑުމަހުން ޑިއުޓީ ކަނޑާލައިފި

އިނގިރޭސިވިލާތަށް އެތެރެކުރާ ކަނޑުމަހުން ޑިއުޓީ ކަނޑާލަން ނިންމާފައިވާކަން އެ ޤައުމުގެ ސަރުކާރުން މިއަދު އިޢުލާންކޮށްފިއެވެ.

އިނގިރޭސި ސަރުކާރުގެ މި ނިންމުމާ ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ އެކަމަށް މަރުޙަބާ ދަންނަވާފައެވެ. އަދި މި މަހުގެ 20ވަނަ ދުވަހުން ފެށިގެން އެ ޤައުމަށް އިމްޕޯޓުކުރާ ކަނޑުމަހުން ޑިއުޓީ ކަނޑާލަން ނިންމުމަކީ ދިވެހިރާއްޖޭގެ މަސްވެރިކަމުގެ ސިނާއަތަށް އެކަމުގެ ހެޔޮ އަސަރުކުރާނެ މުހިންމު ކަމެއްކަމަށް އެ މަނިކުފާނު ވިދާޅުވިއެވެ. 

މީގެއިތުރުން، މިއީ އިނގިރޭސިވިލާތަށް އެކްސްޕޯޓުކުރާ ކަނޑުމަހުގެ މިންވަރު އިތުރުކޮށް، މި ކަމުގެ ނަފާ މަސްވެރިންނަށް އިތުރުވެގެންދާނެ މުހިންމު ނިންމުމެއްކަމަށް އެ މަނިކުފާނު ވިދާޅުވިއެވެ.

I warmly welcome the United Kingdom’s decision to suspend tariffs on tuna imports effective 20th May 2026.

This important development will support British consumers while delivering meaningful benefits to the Maldives’ fisheries sector, strengthening fishermen’s incomes,… https://t.co/WFLQy5PWrH

— Dr Mohamed Muizzu (@MMuizzu) May 20, 2026

އިނގިރޭސި ސަރުކާރުން ހާމަކޮށްފައިވާ ގޮތުގައި، ކަނޑުމަހުން ޑިއުޓީ ކަނޑާލުމުން އެ ޤައުމުގެ ބާޒާރުން މަސް ގަންނަން ލިބޭ އަގު ކުޑަކުރެވޭނެއެވެ. އެހެންކަމުން މިއީ އާންމު ދިރިއުޅުމުގެ ޚަރަދުތައް ހަމަޖެއްސުމަށް ލިބިގެންދާނެ ލުޔެއް ކަމަށް ވަނީ ފާހަގަކޮށްފައެވެ.

އެ ޤައުމުގެ މި ނިންމުމާ ގުޅިގެން، ފްރީޒްކޮށްގެންނާއި، ޕްރޮސެސްކޮށްގެން، އެ ޤައުމުން ކަނޑައަޅާފައިވާ ކަނޑުމަހުގެ ބާވަތްތަކުގެ މަސް އެކްސްޕޯޓުކުރުމަށް ޑިއުޓީއެއް ނުނަގާނެއެވެ. އަދި މި ނިންމުން 31 ޑިސެންބަރު 2028ގެ ނިޔަލަށް ދެމިއޮންނާނެކަމަށް ވެސް އިނގިރޭސި ސަރުކާރުން ވަނީ ހާމަކޮށްފައެވެ.