ރައީސުލްޖުމްހޫރިއްޔާ އިލްތިމާސްކުރައްވަނީ އިސްލާމީ ރޫޙާ އެއްގޮތަށް ޢީދުގެ އުފާ ފާޅުކުރެއްވުމަށް

އަޟްޙާ ޢީދުގެ ބަރަކާތްތެރި މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހި އެންމެހައި ލޮބުވެތި ރައްޔިތުންނަށް ޢީދުގެ ތަހުނިޔާއާއި ހެޔޮއެދުންތައް ފޮނުއްވައިފިއެވެ.

މި މުނާސަބަތުގައި ރައީސުލްޖުމްހޫރިއްޔާ ދެއްވި މެސެޖުގައި، މާތްﷲގެ ޙަޟްރަތަށް ގިނަގިނައިން ޙަމްދުކޮށް، ތަކުބީރުގެ އަޑު އުފުއްލަވައި، އިސްލާމީ ރޫޙާ އެއްގޮތަށް ޢީދުގެ އުފާ ފާޅުކުރެއްވުމަށް ހުރިހާ ރައްޔިތުންނަށް އިލްތިމާސްކުރެއްވިއެވެ. ޢީދުގެ ދުވަސްތަކަކީ މާތްﷲގެ މަތިން ހަނދުމަކޮށް، ދީނީ ބަހާއެއްގެ މަތީގައި އުފާފާޅުކުރަންޖެހޭ ދުވަސްތަކެއްކަން އެމަނިކުފާނު ފާހަގަކުރެއްވިއެވެ.

ދިވެހި ލޮބުވެތި ރައްޔިތުންނަށް މި ޢީދުގެ ތަހުނިޔާއާއި ހެޔޮއެދުންތައް އަރިސްކުރަނީ، މާތްﷲގެ ޙަޟްރަތަށް ގިނަގިނައިން ޙަމްދުކުރައްވައި ތަކުބީރުގެ އަޑު އުފުއްލަވައި، އިސްލާމީ ރޫޙާ އެއްގޮތަށް ޢީދުގެ އުފާ ފާޅުކުރެއްވުމަށް އިލްތިމާސްކުރަމުން.

ބޮޑު ޢީދުގައި ޢާއިލާތަކާއެކު ރަށްރަށަށް… pic.twitter.com/WVlus4BOqO

— Dr Mohamed Muizzu (@MMuizzu) May 26, 2026

މީގެއިތުރުން، ބޮޑު ޢީދުގައި ޢާއިލާތަކާއެކު ރަށްރަށަށް ދަތުރުކޮށް އިޖްތިމާޢީ ގުޅުންތައް ބަދަހިކުރުމަކީ ދިވެހީންގެ ޒަމާންވީ ރީތި އާދައެއްކަން ރައީސް ފާހަގަކުރެއްވިއެވެ. މިފަދަ ދަތުރުތަކާއި ބައްދަލުވުންތަކުގެ ސަބަބުން ދިވެހި މުޖުތަމަޢުގެ އުޚުއްވަތްތެރިކަން އިތުރަށް ބަދަހިވެގެންދާނެކަމަށް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލެއްވީ، މި ޢީދަކީ ދިވެހި ކޮންމެ ރައްޔިތަކަށްމެ އަމާންކަމާއި ހިތްހަމަޖެހުން އިޙްސާސްވާ، އަދި އެކަކު އަނެކަކާ އޮންނަ ގުޅުންތައް އިތުރަށް ބަދަހިވެގެންދާނެ އުފާވެރި ޢީދަކަށްވުން އެދި ހެޔޮ ދުޢާ ކުރައްވަމުންނެވެ.