މެލޭޝިއާގައި 16 އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން މަނާކުރުމުގެ ގަވާއިދަށް އަމަލުކުރަން ފަށައިފި

ކުޑަކުދިން އިންޓަނެޓްގެ ނުރައްކާތަކުން ސަލާމަތްކުރުމަށްޓަކައި، 16 އަހަރުން ދަށުގެ ކުދިން ސޯޝަލް މީޑިއާ އެކައުންޓް ހުޅުވުން މަނާކުރާ އާ ގަވާއިދަށް މެލޭޝިއާ ސަރުކާރުން ހޯމަ ދުވަހު އަމަލުކުރަން ފަށައިފިއެވެ. މިއީ ދުނިޔޭގެ އެކި ގައުމުތަކުން ކުޑަކުދިންގެ އޮންލައިން ރައްކާތެރިކަން ކަށަވަރުކުރުމަށް ކުރަމުންދާ މަސައްކަތުގެ ތެރެއިން އެޅި ފިޔަވަޅެކެވެ.

މި އާ ގަވާއިދުގެ ދަށުން، ސޯޝަލް މީޑިއާ ޕްލެޓްފޯމްތަކުން އެކައުންޓް ހުޅުވާ ފަރާތްތަކުގެ އުމުރު ކަށަވަރުކުރާނެ ހަރުދަނާ ނިޒާމެއް ގާއިމުކުރަން ޖެހެއެވެ. އަދި 16 އަހަރުން ދަށުގެ ކުދިން އެކައުންޓް ހުޅުވުން ހުއްޓުވުމަކީ އެ ކުންފުނިތަކުގެ ޒިންމާއެކެވެ. މި ގަވާއިދު ހިނގާނީ 8 މިލިއަނަށްވުރެ ގިނަ ޔޫޒަރުން ތިބި ފޭސްބުކް، އިންސްޓަގްރާމް، ޓިކްޓޮކް އަދި ޔޫޓިއުބް ފަދަ ބޮޑެތި ޕްލެޓްފޯމްތަކަށެވެ.

މި ގަވާއިދާ ހިލާފުވާ ކުންފުނިތައް 10 މިލިއަން ރިންގިޓް (2.5 މިލިއަން ޑޮލަރު) އާ ހަމައަށް ޖޫރިމަނާ ކުރުމުގެ ބާރު ސަރުކާރަށް ލިބިގެންވެއެވެ. ނަމަވެސް، ކުދިން އަމިއްލައަށް އޮޅުވާލައިގެން އެކައުންޓް ހުޅުވި ނަމަވެސް، އެ ކުދިންގެ ބެލެނިވެރިން މި ގަވާއިދުގެ ދަށުން ޖޫރިމަނާއެއް ނުކުރާނެއެވެ.

މެލޭޝިއާ ސަރުކާރުން ހާމަކުރި ގޮތުގައި، މި ފިޔަވަޅު އެޅުމުގެ މައިގަނޑު މަގްސަދަކީ ކުޑަކުދިންނަށް ގެއްލުންދެނިވި މައުލޫމާތުތަކުންނާއި، ސައިބަރ ބުލީންގް އަދި ސޯޝަލް މީޑިއާއަށް ދެވިހިފާ ގޮތަށް ފަރުމާކޮށްފައިވާ ފީޗާސްތަކުން ކުދިން ރައްކާތެރިކުރުމެވެ.
މެލޭޝިއާގެ އިތުރުން އޮސްޓްރޭލިއާ، ބްރެޒިލް އަދި އިންޑޮނޭޝިއާ ފަދަ ގައުމުތަކުން ވެސް ވަނީ ކުޑަކުދިން ސޯޝަލް މީޑިއާ ބޭނުންކުރުމާ ގުޅޭ ހަރުކަށި އުސޫލުތަކެއް ތައާރަފުކޮށްފައެވެ. މީގެ އިތުރުން އިނގިރޭސިވިލާތް، ފްރާންސް، ސްޕެއިން އަދި ދެކުނު ކޮރެއާ ފަދަ ގައުމުތަކުން ވެސް ދަނީ މިފަދަ ގަވާއިދުތައް ހެދުމަށް ދިރާސާކުރަމުންނެވެ.

މެލޭޝިއާގެ ކޮމިއުނިކޭޝަން އެންޑް މަލްޓިމީޑިއާ ކޮމިޝަނުން ނެރުނު ބަޔާނެއްގައި ބުނެފައިވަނީ، މިއީ ކުދިން އިންޓަނެޓް ނުވަތަ ޑިޖިޓަލް ޓެކްނޮލޮޖީ ބޭނުންކުރުން ހުއްޓުވުމަށް ކުރާ ކަމެއް ނޫން ކަމަށެވެ. އޭގެ ބަދަލުގައި، މިއީ ހިދުމަތްދޭ ފަރާތްތަކުން އޮންލައިންކޮށް ލިބޭ ގެއްލުންތަކަށް ޒިންމާދާރުކުރުވައި، ކުދިންގެ އުމުރާ ގުޅޭ ރައްކާތެރި މާހައުލެއް ކަށަވަރުކުރުމަށް ކުރާ ކަމެއް ކަމަށް އެ ކޮމިޝަނުން ބުންޏެވެ.

މި އާ ގަވާއިދަށް އަމަލުކުރަން ފެށި ނަމަވެސް، ޓެކްނޮލޮޖީ ކުންފުނިތަކުން މިކަން ތަންފީޒުކުރާނެ ގޮތުގެ ތަފްސީލެއް އަދި ހާމައެއް ނުކުރެއެވެ. މީގެ ދަށުން އެ ކުންފުނިތަކުން ޖެހޭނީ ކުދިންގެ ނަފްސާނީ ދުޅަހެޔޮކަމަށް ބަލައިގެން ޕްލެޓްފޯމްތަކުގެ ފަރުމާއަށް ބަދަލު ގެނައުމަށާއި، އުމުރުން ނުފުރޭ ކުދިންގެ އެކައުންޓްތަކާ މެދު ފިޔަވަޅު އެޅުމަށެވެ.