ކުވައިތުގައި ތިބި އެމެރިކާ ސިފައިންނަށް އަމާޒުކޮށް ހަމަލާތަކެއް ދީފި

  އެމެރިކާގެ އަސްކަރީ ބޭހަކަށް އަމާޒުކޮށް ހަމަލާދީފައިވާނޭ ކަމަށް އިރާނުން ބުނެފިއެވެ.

މި ހަމަލާތަކަލީ ހުސްވި ހަފުތާ ބަންދުގައި އީރާނުގެ އަސްކަރީ މަރުކަޒުތަކަށް ހަމަލާދީފައިވާތީ އެކަމުގެ ރައްދެއްގެ ގޮތުން ދިން ހަމަލާތަކެކެވެ.  މިއީ ހޯމްރޫޒް ކަނޑުއޮޅި ސަރަހައްދުގައި މިދިޔަ އެއް ހަފުތާ ތެރޭގައި ދެ ގައުމުގެ ދެމެދުގައި ހަމަލާތައް ބަދަލުކުރެވުނު ތިންވަނަ ފަހަރެވެ. 

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނި ގޮތުގައި މި ހަމަލާތަކަކީ އީރާނުގެ "އިސްތިއުމާރީ އަމަލުތަކަށް" ރައްދު ދިނުމުގެ ގޮތުން ދިން "އަމިއްލަ ދިފާއީ ހަމަލާތަކެއް" ކަމަށެވެ. މީގެ ތެރޭގައި ބައިނަލްއަގުވާމީ ކަނޑުގެ ސަރަހައްދުގައި އުދުހެމުންދިޔަ އެމެރިކާގެ ޑްރޯނެއް ވައްޓާލުން ހިމެނެއެވެ. އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނީ އެމެރިކާއިން އީރާނަށް ހަމަލާދިނުމަށް ބޭނުންކުރާ އެއާ ބޭހަކަށް ހަމަލާދީފައިވާނެ ކަމަށެވެ.

ކުވައިތުގައި ތިބި އެމެރިކާ ސިފައިންނަށް އަމާޒުކޮށް އީރާނުން ފޮނުވާލި ދެ ބެލިސްޓިކް މިސައިލެއް ހުއްޓުވާފައިވާ ކަމަށާއި، އެއްވެސް އެމެރިކާ ސިފައިންގެ މީހަކަށް ގެއްލުމެއް ލިބިފައިނުވާ ކަމަށް ސެންޓްކޮމްއިން ކަށަވަރުކޮށްދެއެވެ. ކުވައިތު ސަރުކާރުންވެސް ވަނީ އެ ގައުމުގެ ސިފައިން "ހަތުރުވެރި" މިސައިލްތަކާއި ޑްރޯންތަކާ ކުރިމަތިލާފައިވާ ކަމަށް ބުނެފައެވެ.

މި ހާދިސާއާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ ޓްރުތް ސޯޝަލްގައި މެސެޖެއް ކުރައްވާފައެވެ. ޓްރަމްޕް ވިދާޅުވީ އޭނާއަށް ފާޑުކިޔާ މީހުން "މަޑުމަޑުން ތިބުމަށާއި، ހުރިހާ ކަމެއްވެސް ނިމޭނީ ރަނގަޅަށް" ކަމަށެވެ. އަދި އީރާނުން "އެއްބަސްވުމަކަށް އަންނަން ބޭނުންވާ ކަމަށާއި، އެއީ އެމެރިކާއަށް ވަރަށް ރަނގަޅު އެއްބަސްވުމަކަށް ވާނެ" ކަމަށްވެސް ޓްރަމްޕް ވިދާޅުވިއެވެ.

މި ހަމަލާތައް ބަދަލުކުރެވިފައި މިވަނީ ދެ ގައުމުގެ ދެމެދުގައި ހިނގަމުންދާ ހަނގުރާމަ ހުއްޓާލުމަށް ކުރެވުނު މަޝްވަރާތައް ނާކާމިޔާބުވުމާ ގުޅިގެންނެވެ. އެމެރިކާގެ މީޑިއާތަކުން ރިޕޯޓްކުރާ ގޮތުގައި ޓްރަމްޕް ވަނީ އެއްބަސްވުމުގެ ބައެއް މާއްދާތަކަށް ބަދަލު ގެނައުމަށް އެދިވަޑައިގެންފައެވެ. މި ބަދަލުތަކަކީ ހޯމްރޫޒް ކަނޑުއޮޅީގެ ދަތުރުފަތުރާއި އީރާނުން ޔުރޭނިއަމް ބޭރުކުރުމާ ގުޅޭ ކަންކަން ކަމަށް ސީބީއެސް ނިއުސްއިން ރިޕޯޓްކުރެއެވެ.