ގާޑިއޯލާގެ ނޭފަތުގައި ހުރި އަނިޔާއަކީ އަމިއްލަ ނަފްސަށް އަނިޔާ ދޭން ބޭނުންވެގެން ކުރިކަމެއް ކަމަށް އޭނާ ބުނެފި

އަންގާރަ ދުވަހުގެރޭ ޗެމްޕިއަންސް ލީގުގައި މެންޗެސްޓާ ސިޓީއިން 3 ގޯލުގެ ލީޑެއް ނަގާފައިވަނިކޮށް، ޑަޗް ލީގުގެ ފެޔެނޫދުން ފަހަތުން އަރާ މެޗު ނިމެން މިނެޓަކަށްވެފައި ވަނިކޮށް ނަތީޖާ ހަމަހަމަކުރި މެޗަށްފަހު އޮތް ނޫސްވެރިންގެ ބައްދަލުވުމަށް ސިޓީގެ ކޯޗު ޕެޕް ގާޑިއޯލާ ދިޔައިރު، އޭނާގެ ނޭފަތަށް ވެފައިހުރި އަނިޔާއަކީ އަމިއްލައަށް ކުރި ކަމެއް ކަމަށް އޭނާ ބުނެފިއެވެ. ގާޑިއޯލާ ބުނީ، އެއީ އޭނާގެ އަމިއްލަ ނަފްސަށް އަނިޔާ ދިނުމަށް ބޭނުންވެގެން ކުރި ކަމެއް ކަމަށެވެ.

ނޫސްވެރިންގެ ބައްދަލުވުމުގައި އެ އަނިޔާއާ ގުޅިގެން ސުވާލު ކުރުމުން، ސަކަ ގޮތަކަށް ގާޑިއޯލާ ބުނީ، އެއީ އޭނާގެ ނިޔަފަތިން ދިން އަނިޔާއެއް ކަމަށާއި، އެއީ އަމިއްލަ ނަފްސަށް އަނިޔާ ދިނުމަށް ކުރި ކަމެއް ކަމަށެވެ. 

ގާޑިއޯލާ ކޮންމެ ރާގަކަށް އެހެން ބުނި ނަމަވެސް، ޖެހިޖެހިގެން ފަސް މެޗުން މޮޅެއް ނުލިބުމަށްފަހު މިފަދަ ކަމެއް ހިނގުމަކީ އޭނާ ވަރަށް ބޮޑަށް ޕްރެޝަރަށް ވެއްޓިފައިވާކަން ހާމަވާކަމެކެވެ. 

ފެޔެނޫދުއާ ދެކޮޅަށް ކުޅުނު މެޗުގައި ސިޓީގެ ކޮޅަށް އެ ޓީމުން 3 ގޯލު ކާމިޔާބުކުރީ މެޗުގެ ފަހު 25 މިނެޓުގެ ތެރޭގައެވެ. އެއީ ޗެމްޕިއަންސް ލީގުގައި 3 ގޯލުގެ ލީޑެއް މެޗުގެ ފަހު 20 މިނެޓުގެ ތެރޭގައި ޓީމަކަށް ގެއްލުނު ފުރަތަމަ ފަހަރު ވެސް މެއެވެ.

މެންޗެސްޓަރ ސިޓީއާއެކު ހަދާފައިވާ އެއްބަސްވުމުގެ މުއްދަތު އިތުރު ދެ އަހަރަށް ގާޑިއޯލާ ދަންމާލީ މި މަހުގެ ތެރޭގައެވެ. ނަމަވެސް ކްލަބުގެ ފަހުގެ ނަތީޖާތަކާ ގުޅިގެން، ސިޓީއާއެކު 9 ވަނަ ސީޒަން ގުނަމުންދާ ގާޑިއޯލާ ވަޒީފާއިން ވަކިކުރުމަކީ އެކަށީގެންވާ ކަމެއް ކަމަށް ބައެއް ތަޖުރިބާކާރުން އަންނަނީ ބުނަމުންނެވެ. 

އޮކްޓޯބަރު މަހުގެ 31 ވަނަ ދުވަހުން ފެށިގެން ސިޓީ އެއްވެސް މެޗަކުން މޮޅުވެފައެވެ ނުވެއެވެ. މި ދަނޑިވަޅުގައި ގާޑިއޯލާއަށް އޮތް އަނެއް ގޮންޖެހުމަކީ މި އަންނަ އާދިއްތަ ދުވަހު ލީގުގައި ލިވަޕޫލްއާ ދެކޮޅަށް ނިކުންނަށް ޖެހުމެވެ. ލިވަޕޫލް މިވަގުތު އޮތް ފޯމަށް ބަލާއިރު، ލިވަޕޫލްގެ ދަނޑުގައި އެ ޓީމު ބަލިކުރުން ގާޑިއޯލާއަށް ވަނީ ވަރަށް ބުރަ މަސައްކަތަކަށެވެ.