ޚަބަރު
ސެންޓްރަލް ޕްރިޒަން ކޮމްޕްލެކްސްގެ އަމަލީ މަސައްކަތް މި މަހު ފަށަނީ
ވަޒީރު އިޙްސާން. ފޮޓޯ: ރައީސް އޮފީސް
ރާއްޖޭގެ އެކި ސަރަޙައްދުތަކުގައި ހުރި ޖަލުތައް އެއް ފުރާޅެއްގެ ދަށަށް ބަދަލުކުރުމަށްޓަކައި ސަރުކާރުން ބިނާކުރާ "ސެންޓްރަލް ޕްރިޒަން ކޮމްޕްލެކްސް" ގެ އަމަލީ މަސައްކަތް މި ހިނގާ ޖޫން މަހުގެ ތެރޭގައި ފެށުމަށް ތައްޔާރުވަމުންދާކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
މި މަޝްރޫޢަކީ ޖަލުތަކުގެ ހިންގުން ހަރުދަނާކޮށް، މޯލްޑިވްސް ކަރެކްޝަނަލް ސާވިސްއަކީ ނަމޫނާ މުއައްސަސާއަކަށް ހެއްދެވުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ. ވަޒީރު ޢަލީ އިޙްސާން ފާހަގަކުރެއްވި ގޮތުގައި، މިހާރު ހުރި ޖަލުތަކަކީ ކުށްވެރިން އިޞްލާޙުކޮށް އަލުން މުޖުތަމަޢަށް ނެރުމަށް ބޭނުންވާ ރިހެބިލިޓޭޝަން ޕްރޮގްރާމްތައް އެންމެ އެދެވޭ ގޮތެއްގައި ހިންގޭނެ ފަދަ ނިޒާމަކަށް ފަރުމާކޮށްފައިވާ ތަންތަނެއް ނޫނެވެ.
އައު ކޮމްޕްލެކްސްއާއެކު ޖަލުތަކުގެ ފަރުމާ ބަދަލުވެ، އިޞްލާޙީ މަސައްކަތްތަކުން އެދެވޭ ނަތީޖާއެއް ޙާޞިލުކުރެވޭނެކަމަށް ވަޒީރު ވިދާޅުވިއެވެ. ދައުލަތުގެ އެހެން މުއައްސަސާތަކާ ގުޅިގެން ކުރަންޖެހޭ މަސައްކަތްތަކެއް ހުރުމުން މި މަޝްރޫޢު ފެށުން ތަންކޮޅެއް ލަސްވިނަމަވެސް، ކުރިއަށް އޮތް ދެ އަހަރެއްހާ ދުވަހުގެ ތެރޭގައި ބައެއް ޖަލުތައް އައު އިމާރާތަށް ބަދަލުކުރެވޭނެ ކަމަށް ވަޒީރު ލަފާކުރައްވައެވެ.
މަޝްރޫޢުގެ ތަފްޞީލާއި ވަސީލަތްތައް
އުތުރު ތިލަފަޅުގައި ކުރިއަށްގެންދާ މި މަޝްރޫޢަށްޓަކައި 30 ހެކްޓަރުގެ ބިން ހިއްކުމަށް ވަނީ ނިންމާފައެވެ. މި ކޮމްޕްލެކްސްގައި ގިނަ ވަސީލަތްތަކެއް ގާއިމުކުރުމަށް ވަނީ ހަމަޖެހިފައެވެ. އޭގެ ތެރޭގައި:
ރެޒިޑެންޝަން ޔުނިޓްތަކާއި މެޑިކަލް ފެސިލިޓީ
ޑްރަގް ރިހެބިލިޓޭޝަން ފެސިލިޓީ އަދި ހާފްވޭ ހައުސް
އެޑިއުކޭޝަން އެންޑް ޓްރެއިނިން ފެސިލިޓީ
1000 މީހުންގެ ޖާގައިގެ މިސްކިތެއް
މީގެ އިތުރުން، އުތުރުތިލަފަޅުގައި ކުޑަކުދިންގެ ރިހެބިލިޓޭޝަނަށް ޚާއްޞަކޮށްގެން "ހޯޕް އައިލެންޑް" ތަރައްޤީކުރުމަށްވެސް ސަރުކާރުން ވަނީ ނިންމާފައެވެ. މިއީ ކަރެކްޝަންސްގެ ޚިދުމަތްތަކަށް އަންނާނެ އިންގިލާބީ ބަދަލެއްގެ ގޮތުގައި ވަޒީރު ސިފަކުރެއްވިއެވެ.
Ads by MSS
