އީރާނުން ކުވޭތުގެ ތެޔޮ މަރުކަޒަކަށް ހަމަލާދީފި

ކުވޭތުގެ ތެޔޮ އުފައްދާ މުހިންމު މަރުކަޒަކަށް އީރާނުން ތަކުރާރުކޮށް ވަރުގަދަ ހަމަލާތަކެއް ދީފައިވާ ކަމަށް ކުވޭތު ޕެޓްރޯލިއަމް ކޯޕަރޭޝަން (ކޭޕީސީ) އިން ހާމަކޮށްފިއެވެ.

އެ ކޯޕަރޭޝަނުން ނެރުނު ބަޔާނެއްގައި ބުނެފައިވަނީ، ކުވޭތުގެ ތެޔޮ ސިނާއަތުގެ ވަރަށް މުހިންމު ސައިޓަކަށް އީރާނުން ދިން ހަމަލާތަކުގެ ސަބަބުން އެ ތަނަށް ބޮޑެތި  ގެއްލުންތަކެއް ލިބިފައިވާ ކަމަށެވެ. އަދި މި ހަމަލާތަކުގައި އެތައް ބަޔަކަށް އެކި ވަރުގެ އަނިޔާތައް ލިބިފައިވާ ކަމަށްވެސް އެ ބަޔާނުގައިވެއެވެ.

ކުވޭތުގެ ރަސްމީ ނޫސް އެޖެންސީ "ކޫނާ" އިން ރިޕޯޓުކޮށްފައިވާ ގޮތުގައި، ހަމަލާގައި އަނިޔާވި މީހުންނަށް ބޭނުންވާ ސިއްހީ އެހީތެރިކަން ވަގުތުން ފޯރުކޮށްދީފައިވާ ކަމަށާއި، ހަމަލާ ދިން ސަރަހައްދު މިހާރު ވަނީ އެއްކޮށް ހުސްކުރެވިފައެވެ. ކުވޭތު ޕެޓްރޯލިއަމް ކޯޕަރޭޝަނުން އިތުރަށް ހާމަކުރި ގޮތުގައި، މި ހަމަލާއާ ގުޅިގެން އަޅަންޖެހޭ ފިޔަވަޅުތައް އެ ގައުމުގެ ކަމާބެހޭ ދައުލަތުގެ އިދާރާތަކާ ގުޅިގެން މިހާރު ދަނީ އަޅަމުންނެވެ.