ލިވަޕޫލަށް ފަސޭހަ މޮޅެއް – ގާޑިއޯލާގެ ރިހޭ ފައި މައްޗަށް ފޮއި

މިވަގުތު އިންގްލިސް ޕްރިމިއަރ ލީގުގެ އެއްވަނައިގައި އޮތް ލިވަޕޫލުން ފަސޭހަ ކަމާއެކު ވާދަވެރި މެންޗެސްޓަރ ސިޓީ ބަލިކުރުމުން، އެ ޓީމު 11 ޕޮއިންޓު ފަހަތަށް ސޮއްސާލައިފިއެވެ. ލީގުގެ އެންމެ ފަހުގެ ޗެމްޕިއަނުންގެ ކޮޅަށް ކޮންމެ ހާފަކު ގޯލެއް ކާމިޔާބުކޮށް 2-0 އިން މެޗު ނިންމާލިއިރު، ސިޓީ މިވަނީ ލީގުގައި މިހާރު ޖެހިޖެހިގެން 4 މެޗުން ބަލިވެފައެވެ. މިއީ ގާޑިއޯލާ ހަވާލުވިފަހުން އެ ޓީމު ޖެހިޖެހިގެން މިހާ ދަށް ނަތީޖާތަކެއް ނެރުނު ފުރަތަމަ ފަހަރެވެ. އަދި މިއީ 2008 ވަނަ އަހަރަށްފަހު އެ ޓީމު ޖެހިޖެހިގެން 4 މެޗުން ބަލިވި ފުރަތަމަ ފަހަރު ވެސް މެއެވެ. 

ޕްރިމިއަރ ލީގުގެ ހަޔާތުގައި މީގެ ކުރިން މިހޭ ބޮޑު ފަރަގަކަށްފަހު ލީގު ކާމިޔާބު ކުރެވިފައިވަނީ 3 ޓީމަކަށެވެ. ނަމަވެސް، ސިޓީގެ ހާލަތު މިހާރު ފެންނަ ގޮތުން އެ ޓީމަށް މި ސީޒަނުގައި ތަށި ދިފާއު ކުރެވޭނެކަމަށް ނުފެންނަ ކަމަށް ފުޓުބޯޅަ ދިރާސާކުރާ ފަރާތްތަކުން އަންނަނީ ބުނަމުންނެވެ. އަނެއްކޮޅުން ލިވަޕޫލުން މި އަންނަނީ ދެއަތް ފޮޅާލުމަށްފަހު އިނގިރޭސިވިލާތުގައި ރަސްކަން ކުރުމަށް ތައްޔާރުވަމުންނެވެ. 

ލިވަޕޫލުން މެޗުގެ ލީޑު ނެގީ 12 ވަނަ މިނެޓުގައި އެ ޓީމުގެ ނެދަލޭންޑްސް ޕޯވާޑް، ކޯޑި ގަކްޕޯ ކާމިޔާބު ކުރި ގޯލަކުންނެވެ. މުހައްމަދު ސަލާހުގެ މޮޅު ޕާހެއް ތިރިތިރިން ގޯލު ކުރިމައްޗަށް ހުރަސް ވެގެން ދިޔައިރު، ގަކްޕޯއަށް އެ ބޯޅަ ގޯލަށް ފޮނުވާލުންވީ ވަރަށް ފަސޭހަ ކަމަކަށެވެ.

މީގެ އިތުރުން، ލިވަޕޫލްގެ ލީޑު ފުޅާ ކުރުމަށް ފުރަތަމަ ހާފުގައި ގިނަ ފުރުސަތުތަކެއް ލިބުނެވެ. އެ ފުރުސަތުތައް ގޯލަކަށް ބަދަލު ނުކުރެވުނީ، ފަހަރުގާ ގާޑިއޯލާގެ ނަސީބަކަށް ކަމަށް ވެސް ވެދާނެއެވެ.

ލިވަޕޫލްގެ ދެ ވަނަ ގޯލު ކާމިޔާބުކުރީ، ސިޓީގެ ކީޕަރު ސްޓެފަން އޯރޓޭގާ ކުރި ފައުލަކުން ލިބުނު ޕެނަލްޓީއެއްގައި ސަލާހުއެވެ. ނިމިދިޔަ ހަފްތާގެ ތެރޭގައި ރެއާލް މެޑްރިޑް ކޮޅަށް ކާމިޔާބު ކުރުމަށް މަސައްކަތްކުރި ޕެނަލްޓީ ވާތް ފަރާތުން ބޭރަށް ދިޔަ ނަމަވެސް، އޯރޓޭގާ ކޮޅަށް ޖެހި ޕެނަލްޓީ އޭނާ ކާމިޔާބު ކުރީ ވަރަށް ސާބިތުކަމާއެކު، ގޯލުގެ ކަނާތްފަރާތުން ތިރީ ކަނަށް ފޮނުވާލައިގެންނެވެ.

ސިޓީއަށް މި މެޗުގައި ފުރަތަމަ ފަހަރަށް ލިވަޕޫލްގެ ގޯލަށް ހަމަލާއެއް ފޮނުވާލެވިފައިވަނީ ވެސް މެޗުގެ 39 ވަނަ މިނެޓުގައެވެ. އެއީ އެ ޓީމަށް ފުރަތަމަ ހާފުގައި ލިވަޕޫލުގެ ގޯލަށް ނުރައްކާ ކުރެވުނު ފުރަތަމަ ފަހަރުވެސް މެއެވެ. ސިޓީއިން އިދިކޮޅު ގޯލަށް ނުރައްކާއެއް ނުކޮށް 2010 ވަނަ އަހަރުގެ ފަހުން މިހާ ގިނަ ވަގުތު ހޭދަކޮށްފައެއް ނުވެއެވެ. އެހެންކަމުން މިއީ މުޅިން ވެސް، ސިޓީގެ ހާލަތު ބުނެދޭ ކަންކަމެވެ. 

މީގެ އިތުރުން، ސިޓީގެ ގޯލް މެޝިން، އަރލިން ހާރލަންޑު މި މެޗުގައި އެއްވެސް ވަރަކަށް ފެނިފައެއް ނުވެއެވެ. ސިޓީއިން ކުރިޔަށް ކުޅޭ ބޯޅަތައް ހޯދުމަށް މަސައްކަތް ކުރާއިރު، ވަރޖިލް ވެން ޑައިކްގެ ކައިރީގައި ހަށިގަނޑުން ބޮޑު ހާލަންޑު ފެނުނީ 'ކުޑަ ފިޔޮކެއް' ހެނެވެ.