އަމޮރިމްއާއެކު އޯލްޑް ޓްރެފަޑްގައި ކުޅުނު ފުރަތަމަ ލީގު މެޗު ވެސް ޔުނައިޓެޑުން ކާމިޔާބުކޮށްފި

މެންޗެސްޓަރ ޔުނައިޓެޑުގެ ކޯޗެއްގެ މަގާމަށް އަލަށް ހަވާލުވި ރޫބެން އަމޮރިމްގެ އިރުޝާދުގެ ދަށުން އޯލްޑް ޓެރެފަޑްގައި ކުޅުނު ފުރަތަމަ ލީގު މެޗު ވެސް އެ ޓީމުން ކާމިޔާބުކޮށްފިއެވެ. ޔުނަޓެޑުން ވަނީ ޔޫރޮޕާ ލީގުގައި ބުރާސްފަތި ދުވަހުގެރޭ ނޯވޭގެ ބޮޑޯ/ގްލިމްޓްއާ ދެކޮޅަށް އެ ދަނޑުގައި ކުޅުނު މެޗު ވެސް ކާމިޔާބުކޮށްފައެވެ. 

އާދީއްތަ ދުވަހުގެރޭ އެވަޓަން އާއި ދެކޮޅަށް ކުޅުނު މެޗު 4-0 އިން ޔުނައިޓެޑު ކާމިޔާބުކުރިއިރު، މިއީ ލީގުގައި އަމޮރިމްގެ އިރުޝާދުގެ ދަށުން އެ ޓީމު ކާމިޔާބުކުރި ފުރަތަމަ މެޗު ވެސް މެއެވެ. އޭނާގެ ފުރަތަމަ މެޗުގައި އިޕްސްވިޗްއާ ދެކޮޅަށް މީގެ ހަފްތާއެއް ކުރިން ކުޅުނު އިރު، އެ މެޗު ވަނީ 0-0 އިން އެއްވަރުވެފައެވެ.

މި ފަހަކުން ޓީމަށް މާބޮޑު ފައިދާއެއް ކުރާނެ ކުޅުމެއް ދެއްކިފައި ނުވާ މާކަސް ރަޝްފޯޑާއި ޖޮޝުއާ ޒަރކްޒީވަނީ އެވަޓަން އާއި ދެކޮޅަށް ކުޅުނު މެޗުގައި ވިދާލައި، އާކޯޗަށް އުއްމީދު އައުކޮށްދީފައެވެ. 

އަމޮރިމް ހަވާލުވިފަހުން ޔުނައިޓެޑުން ކާމިޔާބުކުރި ފުރަތަމަ ގޯލު ޔޫރޮޕާ ލީގުގައި ކާމިޔާބު ކުރުމަށްފަހު، އެވަޓަންގެ ގޯލު ހުޅުވާ ދިނީ ވެސް ރަޝްފޯޑެވެ. އެއީ މެޗުގެ ފުރަތަމަ ހާފުގައެވެ. ޔުނައިޓުން ލީޑު ފުޅާކުރީ ފުރަތަމަ ހާފު ނިމުމުގެ ކުރިން ޒަރކްޒީގެ ގޯލަކުންނެވެ.

ދެވަނަ ހާފުގެ ފުރަތަމަ މިނެޓުގައި އަނެއްކާ ވެސް ރަޝްފޯޑުގެ ގޯލެއް ފެނިގެން ދިޔައެވެ. ރަޝްފޯޑަށް މި ގޯލު ފަހިކޮށްދިނީ މެޗުގައި މޮޅު ކުޅުމެއް ދައްކާފައިވާ އަމަދް ޑިއާލޯއެވެ. ޔުނަޓެޑުގެ 4 ވަނަ ގޯލަށް ވެސް އެސިސްޓްކޮށްދިނީ އޭނާއެވެ. ޒަރކްޒީގެ އެ ގޯލު ފެނިގެން ދިޔައީ މެޗުގެ 64 ވަނަ މިނެޓުގައެވެ.

މި މެޗުން ލިބުނު 3 ޕޮއިންޓާއެކު، ޖުމްލަ 19 ޕޮއިންޓު ހޯދައި ޔުނައިޓެޑު މިހާރު އޮތީ ލީގުގެ 9 ވަނައިގައެވެ. 

މެޗަށްފަހު ވާހަކަ ދައްކަމުން ޔުނައިޓެޑްގެ ކޯޗު އަމޮރިމް ބުނީ، ޓީމުގެ ކުޅުން އަދިވެސް ވަރަށް ބޮޑަށް ރަގަޅު ކުރަންޖެހޭ ކަމަށާއި، އެވަޓަން ކައިރިން މޮޅުވެވުނީ ލިބުނު ފަރުސަތުތަކުގެ ބޭނުން ރަގަޅު ވަގުތުގައި ހިފުނީމަ ކަމަށެވެ. އަދި ނަތީޖާއަށް އެކަނި ވިސްނައިގެން ކުރިޔަށް ނުދެވޭނެ ކަމަށާއި، އޭނާ ބޭނުންވަނީ މުޅި ޓީމުގެ ޕާފޯމެންސް ރަގަޅު ކުރަން ކަމުގައި ބުނެފައިވެއެވެ.