އެމެރިކާއިން ސައުދީ އަރަބިއްޔާއާއެކު ތާރީޚީ ނިއުކްލިއަރ އެއްބަސްވުމެއްގައި ސޮއިކޮށްފި

ސައުދީ އަރަބިއްޔާގައި މަދަނީ ނިއުކްލިއަރ ޕްރޮގްރާމެއް ގާއިމުކުރުމަށް މަގުފަހިކޮށްދޭ ތާރީޚީ އެއްބަސްވުމެއްގައި އެމެރިކާއާއި ސައުދީ އަރަބިއްޔާއިން ސޮއިކޮށްފިއެވެ. "ޕީސްފުލް ނިއުކްލިއަރ ކޯ-އޮޕަރޭޝަން އެގްރީމެންޓް" ގެ ނަމުން ނަންދީފައިވާ މި އެއްބަސްވުމުގެ ސަބަބުން ސައުދީގެ ނިއުކްލިއަރ ހަކަތައިގެ ދާއިރާގައި އެމެރިކާގެ ކުންފުނިތަކަށް ބޮޑެތި ފުރުސަތުތަކެއް ލިބިގެންދާނެ ކަމަށް އެމެރިކާގެ އެނާޖީ ޑިޕާޓްމަންޓުން ބުނެއެވެ.

މި އެއްބަސްވުމުގެ ތަފްސީލުތައް އަދި ރަސްމީކޮށް ހާމަކޮށްފައި ނުވި ނަމަވެސް، އެމެރިކާގެ މީޑިއާތަކުން ރިޕޯޓްކުރާ ގޮތުގައި މީގެ ދަށުން ސައުދީ އަރަބިއްޔާއަށް ޔުރޭނިއަމް މުއްސަނދިކުރުމުގެ ފުރުސަތު ލިބިގެންދާނެއެވެ. މިއީ އާންމުކޮށް އިންޖީނުގެތަކަށް ބޭނުންވާ ތެޔޮ އުފެއްދުމުގެ އިތުރުން ނިއުކްލިއަރ ބޮން އުފެއްދުމަށްވެސް ބޭނުންކުރެވިދާނެ މާއްދާއެކެވެ. މިއީ މިފަދަ ފުރުސަތެއް އެމެރިކާއިން އެހެން ގައުމަކަށް ދިން ފުރަތަމަ ފަހަރު ކަމަށްވާއިރު، މީގެ ސަބަބުން މެދުއިރުމަތީގެ މަސްރަހު އިތުރަށް ނުތަނަވަސްވެދާނެ ކަމުގެ ބިރު އޮތް ކަމަށް މާހިރުން ބުނެއެވެ.

އެމެރިކާގެ ސެކްރެޓަރީ އޮފް އެނާޖީ ކްރިސް ރައިޓް ވިދާޅުވީ، މި އެއްބަސްވުމަކީ ނިއުކްލިއަރ ސަލާމަތީ ކަންކަމާއި ނިއުކްލިއަރ ހަތިޔާރު ފެތުރުން ހުއްޓުވުމުގެ އެންމެ މަތީ މިންގަނޑުތަކަށް ފެތޭ އެއްބަސްވުމެއް ކަމަށެވެ. އަދި މީގެ ސަބަބުން އެމެރިކާއާއި ސަރަހައްދީ ސަލާމަތަށް ކުރިއެރުން ލިބޭނެ ކަމަށްވެސް އޭނާ ވިދާޅުވިއެވެ. ސައުދީ ސަރުކާރުން ބުނި ގޮތުގައި މިއީ ހަކަތައިގެ ދާއިރާއިން ދެ ގައުމުގެ ދެމެދުގައި އޮތް ގުޅުން އިތުރަށް ހަރުދަނާވެގެންދާނެ ކަމެކެވެ.

މި އެއްބަސްވުން އައިސްފައިވަނީ އެމެރިކާއާއި އީރާނާ ދެމެދު ކުރިމަތިލުންތައް އިތުރުވެފައިވާ ދަނޑިވަޅެއްގައެވެ. އަދި ޔަމަނުގެ ހޫތީން ސައުދީއާ ދެކޮޅަށް "ކަނޑު ގެ ސަރަހައްދު ބަންދު ކުރިކަން" އިޢުލާންކުރިތާ ދެ ދުވަސް ފަހުންނެވެ. އިސްރާއީލުގެ ބައެއް ކުރީގެ އޮފިޝަލުން ވަނީ މީގެ ސަބަބުން ސައުދީން ނިއުކްލިއަރ ހަތިޔާރު އުފައްދާފާނެ ކަމުގެ ކަންބޮޑުވުން ފާޅުކޮށްފައެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ މި އެއްބަސްވުމަށް ތާއީދުކުރެއްވި ނަމަވެސް، ޑިމޮކްރެޓުން ދަނީ މިކަމަށް ވަރަށް ބޮޑަށް ފާޑުކިޔަމުންނެވެ. ސެނެޓަރ އެޑްވަރޑް މާކީ ވިދާޅުވީ، މިއީ އީރާނުން ނިއުކްލިއަރ ބޮން އުފެއްދުން ހުއްޓުވުމުގެ ނަމުގައި ސައުދީއަށް އެ ފުރުސަތު ހުޅުވާލުން ކަމަށެވެ.

ކުރިން އެމެރިކާއިން ބުނަމުންދިޔައީ މިފަދަ އެއްބަސްވުމެއް ގާއިމުކުރެވޭނީ ސައުދީން އިސްރާއީލާއެކު ގުޅުން ގާއިމުކުރުމުން ކަމަށެވެ. ނަމަވެސް މިހާރު އެ ޝަރުތު އުނިކޮށްފައިވާ ކަމަށް ރިޕޯޓްތައް ބުނެއެވެ. ބެލެވޭ ގޮތުގައި އެމެރިކާއިން މި ފިޔަވަޅު އެޅީ ރަޝިޔާއާއި ޗައިނާއިން ސައުދީއާއެކު މިފަދަ އެއްބަސްވުމެއް ގާއިމުކޮށްފާނެ ކަމުގެ ބިރު އޮތުމުންނެވެ.

މި އެއްބަސްވުން ދެން ހުށަހެޅޭނީ އެމެރިކާގެ ކޮންގްރެސްއަށެވެ. ސައުދީގެ ވަލީއަހުދު މުޙައްމަދު ބިން ސަލްމާން މީގެ ކުރިން ވިދާޅުވެފައިވަނީ، އީރާނުން ނިއުކްލިއަރ ބޮމެއް އުފައްދައިފިނަމަ، ލަސްނުކޮށް ސައުދީންވެސް އެ މަގަށް ދާނެ ކަމަށެވެ.