ކެއްސުން ރަނގަޅުނުވެ ގިނަދުވަސްވުމަކީ ފަރުވާކުޑަކޮށްލައިގެން ވާނެ ކަމެއް ނޫން!

ކެއްސުމަކީ އަޅުގަނޑުމެންގެ ތެރޭގައި ވަރަށް އާންމުކޮށް ދިމާވާ ކަމެކެވެ. ޚާއްޞަކޮށް ވައި ނުސާފު، ތަޣައްޔަރުވެފައިވާ މާހައުލުތަކުގައި ދިރިއުޅޭ މީހުންނަށް މި މައްސަލަ ބޮޑެވެ. ގިނަ ފަހަރަށް މީހުން ހީކުރަނީ ގިނަދުވަސްވާ ކެއްސުމަކީ މޫސުމީ އެލާޖީއެއް، ވައި ނުސާފުވުން، ވައިރަލް އިންފެކްޝަނެއް ނުވަތަ އެސިޑް ރިފްލަކްސް (އެސިޑިޓީ) ގެ ސަބަބުން ދިމާވާ ކަމެއް ކަމަށެވެ.

އަދި ގިނަ ހާލަތްތަކުގައި މިއީ ސަބަބު ކަމަށް ވީ ނަމަވެސް، ކެއްސުން ރަނގަޅުނުވެ ގިނަދުވަސްވުމަކީ ފަރުވާކުޑަކޮށްލައިގެން ވާނެ ކަމެއް ނޫނެވެ. އާންމު ބޭސްތަކުން ރަނގަޅުނުވާ ނަމަ، އެއީ ފުއްޕާމޭގެ ކެންސަރު ފަދަ ނުރައްކާތެރި ބައްޔެއްގެ ކުރީގެ އަލާމާތަކަށް ވުމީ އެކަށީގެންވާ ކަމެކެވެ.

ޝާރްދާކެއަރ-ހެލްތުސިޓީގެ މެޑިކަލް އޮންކޮލޮޖީ ސީނިއަރ ކޮންސަލްޓަންޓް ޑރ. ރުޗިރް ޓަންޑަން ވިދާޅުވާ ގޮތުގައި، ފުއްޕާމޭގެ ކެންސަރު ގިނަ ފަހަރަށް ދެނެގަނެވެނީ ބަލީގެ ފަހު މަރުހަލާގައެވެ. މީގެ އެންމެ ބޮޑު ސަބަބަކީ ބަލީގެ ކުރީކޮޅު ފެންނަ އަލާމާތްތަކަކީ އާދައިގެ ކަންކަމާ އެއްގޮތް އަލާމާތްތަކަކަށް ވުމުން، އެކަންކަމަށް ސަމާލުކަން ނުދެވުމެވެ. ކޮންމެ ދާއިމީ ކެއްސުމަކީ ކެންސަރެއް ނޫނެވެ. ނަމަވެސް، ހަށިގަނޑުން ފޮނުވާ ސިގްނަލްތަކަށް ސަމާލުވުމަކީ ބަލި ކުރީކޮޅު ދެނެގަނެ، ފަރުވާ ކާމިޔާބުވުމަށް އޮތް އެންމެ ބޮޑު ފުރުސަތެވެ.

ދާއިމީ ކެއްސުމަށް ސަމާލުވާންޖެހެނީ ކީއްވެ؟

އާދައިގެ އަރިދަފުސް ރޯގާއެއް ނުވަތަ އިންފެކްޝަނެއްގެ ސަބަބުން ޖެހޭ ކެއްސުން އާންމުކޮށް ދެތިން ހަފުތާ ތެރޭގައި ރަނގަޅުވެއެވެ. ނަމަވެސް، ކެއްސުން ތިން ހަފުތާއަށްވުރެ ގިނަދުވަސްވުން، ހާލަތު ގޯސްވަމުންދިއުން ނުވަތަ ބޭސް ބޭނުންކުރުމުންވެސް އަލުން ކެއްސުން އެނބުރި އައުމަކީ ޑޮކްޓަރެއްގެ ލަފާ ހޯދަންޖެހޭ ކަމެކެވެ. މިއީ އެލާޖީ ނުވަތަ ނޭވާ ހިއްލުން ފަދަ ކަމެއްގެ ސަބަބުން ދިމާވާ ކަމަކަށް ވީ ނަމަވެސް، ފުއްޕާމޭގެ ކެންސަރުގެ ކުރީގެ މަރުހަލާގައިވެސް މިފަދަ ދާއިމީ ކެއްސުމެއް ހުރެދާނެއެވެ.

ފަރުވާ ބޭނުންވާ ނުރައްކަލުގެ ނިޝާންތައް
ކެއްސުމުގެ އިތުރުން ތިރީގައިވާ އަލާމާތްތައް ފެންނަނަމަ، ލަސްނުކޮށް ޑޮކްޓަރަށް ދައްކަންވާނެއެވެ:

• ކެއްސުން ތިން ހަފުތާއަށްވުރެ ގިނަދުވަސްވުން.
  
• ކެއްސާއިރު ލޭގެ އަސަރު ހުރުން ނުވަތަ ލޭ އައުން.
  
• މޭގައި ރިއްސުން.
  
• ނޭވާ ކުރުވުން ނުވަތަ ނޭވާލާން އުނދަގޫވުން.
  
• ގިނަގިނައިން މޭގެ އިންފެކްޝަން ޖެހުން.
  
• ސަބަބެއް ނޭނގި ބަރުދަން ލުއިވުން.
  
• އަބަދު ވަރުބަލިވެފައި ހުރުން.
  
• އަޑު ބަދަލުވުން ނުވަތަ އަޑު ކުރެހުން.

ފުއްޕާމޭގެ ކެންސަރަކީ ހަމައެކަނި ދުންފަތުގެ އިސްތިއުމާލުކުރާ މީހުންނަށް ޖެހޭ ބައްޔެއް ނޫން

ދުންފަތުގެ އިސްތިއުމާލުކުރުމަކީ ފުއްޕާމޭގެ ކެންސަރަށް އޮތް އެންމެ ބޮޑު ނުރައްކާ ކަމުގައި ވިޔަސް، ދުވަހަކުވެސް ދުންފަތުގެ އިސްތިއުމާލު ނުކުރާ މީހުންނަށް (ޚާއްޞަކޮށް އަންހެނުންނަށް) މި ބަލި ޖެހޭ މިންވަރު މިހާރު ދަނީ އިތުރުވަމުންނެވެ. ބަލި ޖެހުމަށް މެދުވެރިވާ އެހެން ސަބަބުތަކުގެ ތެރޭގައި:

• ދުންފަތުގެ ދުން ޖެހުން 
  
• ކެއްކުމަށް ނުވަތަ ހޫނުކުރުމަށް ބޭނުންކުރާ ތަކެތިން ނުކުންނަ ދުން.
  
• ވައި ތަޣައްޔަރުވުން.
  
• މަސައްކަތުގެ މާހައުލުން ލިބޭ ގެއްލުންދެނިވި ކެމިކަލްތައް.
  
• އާއިލީ ގޮތުން ބަލި ހުރުން 
  
• ރޭޑޯން ގޭހަށް ހުށަހެޅުން.

އަމިއްލައަށް ފަރުވާކުރުމާ ދުރުހެލިވުން

ގިނަ މީހުން ކެއްސުން ރަނގަޅު ކުރުމަށް އަމިއްލައަށް ސިރަޕް، އެންޓިބަޔޮޓިކް ނުވަތަ އެސިޑިޓީ ބޭސް ބޭނުންކުރެއެވެ. ނަމަވެސް، އަސްލު ސަބަބު ދެނެނުގަނެ ހަމައެކަނި އަލާމާތްތަކަށް ފަރުވާކުރުމަކީ ބޮޑު ބައްޔެއް ދެނެގަތުން ލަސްވެގެންދާނެ ކަމެކެވެ. ބޭސް ބޭނުންކުރުމުންވެސް ކެއްސުން ރަނގަޅު ނުވާނަމަ، އަމިއްލައަށް ބޭސްކުރުން ހުއްޓާލައި ޑޮކްޓަރެއްގެ ލަފާ ހޯދުން މުހިންމެވެ.

ބަލި ދެނެގަންނާނީ ކިހިނެއް؟
ޑޮކްޓަރު ފުރަތަމަ ބަލާނީ ބަލިމީހާގެ މެޑިކަލް ހިސްޓްރީއާއި ފެންނަ އަލާމާތްތަކަށެވެ. ފުރަތަމަ ކުރެވޭ ޓެސްޓަކީ މޭގެ އެކްސް-ރޭ އެކެވެ. އެކްސް-ރޭ އާދައިގެ ގޮތަކަށް ހުރި ނަމަވެސް އަލާމާތްތައް ފެންނަނަމަ، ސީ.ޓީ ސްކޭނެއް ހަދަން ޑޮކްޓަރއަށް ލަފާދެވިދާނެއެވެ. ސީ.ޓީ ސްކޭނުން ފުއްޕާމޭގެ އެތެރެ މާ ސާފުކޮށް ފެންނަން ހުންނާނެތީ، އާދައިގެ އެކްސް-ރޭއަކަށް ނުފެންނަ ކަންކަން ދެނެގަނެވޭނެއެވެ.

ކުރީކޮޅު ބަލި ދެނެގަތުމުގެ މުހިންމުކަން
ބަލި ކުރީކޮޅު ދެނެގަނެވިއްޖެނަމަ، ސާޖަރީ، ޓާގެޓެޑް ތެރަޕީ ނުވަތަ އިމިއުނޯތެރަޕީ ފަދަ ޒަމާނީ ފަރުވާތަކުގެ އެހީގައި ބަލިން ފަސޭހަވުމުގެ ފުރުސަތު ބޮޑެވެ. ޑރ. ޓަންޑަން ވިދާޅުވާ ގޮތުގައި، ދާއިމީ ކެއްސުމަކީ ހަމައެކަނި 'ތަޣައްޔަރުވުން' ނުވަތަ 'އެސިޑިޓީ' ކަމަށް ނިންމައި ފަރުވާކުޑަކޮށްލުމުގެ ބަދަލުގައި، އެކަން ރަނގަޅަށް ތަހުގީގުކުރުމަކީ ފުރާނަ ސަލާމަތްކުރުމަށް އެޅޭ އެންމެ މުހިންމު ފިޔަވަޅެވެ.

ނޯޓް: މިއީ ހަމައެކަނި މައުލޫމާތު ފޯރުކޮށްދިނުމަށް ލިޔެފައިވާ ލިޔުމެކެވެ. ސިއްހީ އެއްވެސް މައްސަލައެއްގައި ޚާއްޞަ ބަލިތަކުގެ ޑޮކްޓަރެއްގެ ލަފާ ހޯދުމަކީ ކޮންމެހެން ކުރަންޖެހޭ ކަމެކެވެ.