ކޮފީ: ބަކަރިތަކެއްގެ ސަބަބުން އުފެދުނު ދުނިޔޭގެ އެންމެ މަގުބޫލު ބުއިން

މިއަދަކީ އޮކްޓޯބަރު މަހުގެ އެއްވަނަ ދުވަހެވެ. ދުނިޔޭގެ އެކި ކަންކޮޅުތަކުގައި ބައިނަލްއަގުވާމީ ގޮތުން ފާހަގަކުރާ ކޮފީ ދުވަހެވެ. 2015 ވަނަ އަހަރުން ފެށިގެން އިންޓަނޭޝަނަލް ކޮފީ އޮގަނައިޒޭޝަނުން ފާހަގަކުރަން ފެށި މި ދުވަހަކީ ކޮފީ އުފައްދާ ދަނޑުވެރިންނާއި، ބާރިސްޓާއިން އަދި ކޮފީއަށް ލޯބިކުރާ އެންމެހާ ފަރާތްތަކުގެ މަސައްކަތުގެ އަގުވަޒަންކުރުމުގެ ގޮތުން ފާހަގަކުރާ ހާއްސަ ދުވަހެކެވެ.

ދުނިޔޭގައި ދުވާލަކު 2.2 ބިލިއަނަށްވުރެ ގިނަ ތަށި ކޮފީ ބޮއެ އުޅޭއިރު، ފެނަށްފަހު އިންސާނުން އެންމެ ގިނައިން ބޯ އެއްޗަކީވެސް ކޮފީއެވެ. ކޮފީގެ ތާރީހަށް ބަލައިލާއިރު، މީގެ 600 އެއްހާ އަހަރު ކުރިން ކޮފީގެ ފެށުން ގުޅިފައިވަނީ އެފްރިކާގެ ގައުމެއް ކަމަށްވާ އިތިއޮޕިއާގައެވެ. ދިރާސާތަކުން ދައްކާގޮތުގައި "ކަލްދީ" ނަމަކަށް ކިޔާ ބަކަރި ހުއިހައްޕާ މީހަކަށް، އޭނާގެ ބަކަރިތައް ޒާތެއްގެ އޮށެއް ކެއުމަށްފަހު މާ އުފާވެފާ ހަރަކާތްތެރިކޮށް އުޅޭތަން ފެނިގެން އެ އޮށުގެ އަސްލު ހޯދަން ފެށި ހިސާބުން ކޮފީގެ ތާރީހު ފެށުނެވެ.

އެއަށްފަހު ޔަމަނާއި، މިސްރު، ތުރުކީ އަދި އިންޑިއާ މަގުން މުޅި ދުނިޔެއަށް ކޮފީގެ މަގުބޫލުކަން ފެތުރިގެން ދިޔައެވެ. ކޮފީ ތައްޔާރުކުރުމަށްޓަކައި މައިގަނޑު ގޮތެއްގައި ބޭނުންކުރަނީ 'އަރަބިކާ' އަދި 'ރޮބަސްޓާ' ކޮފީ އޮށެވެ. މީގެ އިތުރުން ސާފު ފެނާއި، ކިރު، ހަކުރު އަދި ފްރެޝް ކްރީމް ބޭނުންކޮށްގެން ތަފާތު ރަހަތަކުގެ ކޮފީ ތައްޔާރުކުރެވެއެވެ. ބައެއް މީހުން ކޮފީގެ މީރުކަން އިތުރުކުރުމަށްޓަކައި ޗޮކްލެޓް، ކެރެމެލް، އަދި ވަނީލާ ސިރަޕް ފަދަ ތަކެތިވެސް އެއްކުރެއެވެ.

ދުނިޔޭގައި ތަފާތު އެކި ވައްތަރުގެ ކޮފީ ބޭނުންކުރެވެއެވެ. މީގެ ތެރެއިން އެންމެ އާންމު އެއް ވައްތަރަކީ ކޮފީގެ އަސްލު ގަދަ ރަހަ އެކުލެވޭ 'އެސްޕްރެސޯ' އެވެ. އެސްޕްރެސޯއަށް ހޫނުފެން އެއްކޮށްގެން 'އެމެރިކާނޯ' ހަދާއިރު، ކިރާއި ފޯމް އެއްކޮށްގެން ތައްޔާރުކުރާ 'ކެޕުޗީނޯ' އާއި 'ލާޓޭ' އަކީވެސް ވަރަށް ގިނަ މީހުންގެ މަގުބޫލުކަން ހޯދާފައިވާ ބުއިންތަކެކެވެ. އަދި ފިނިކޮށް ބޯންބޭނުންވާ މީހުންނަށް 'އައިސްޑް ކޮފީ' އާއި 'ކޯލްޑް ބްރޫ' އަކީ އެންމެ އެކަށީގެންވާ ވައްތަރުތަކެވެ.

ސިއްހީ ގޮތުން ބަލާއިރުވެސް ކޮފީއަކީ ގިނަ ފައިދާތަކެއް އެކުލެވޭ ބުއިމެކެވެ. ދިރާސާތަކުން ދައްކާގޮތުގައި ދުވާލަކު 4-3 ކޮފީ ބުއިމަކީ ހިތުގެ ބަލިތަކުން ދުރުކޮށްދީ، ސިކުނޑީގެ މަސައްކަތްތައް އަވަސްކޮށްދޭ ކަމެކެވެ. އެއްބަޔަކު ވަރުބަލިކަން ފިލުވާލައި ހޭލާ ހުރުމަށް ކޮފީ އިހްތިޔާރުކުރާއިރު، އަނެއްބަޔަކަށް ކޮފީއަކީ އެކުވެރިންނާއެކު އުފާވެރި ވަގުތުކޮޅެއް ހޭދަކޮށްލަން ލިބޭ ބޮޑު ހިތްހަމަޖެހުމެކެވެ.

މިއަދަކީ ބައިނަލްއަގުވާމީ ކޮފީ ދުވަހަށްވާއިރު، މީރު ކޮފީއެއް ދޭނެ ގާތް ރައްޓެއްސަކަށް މި ލިޔުން ހިއްސާކޮށްލާށެވެ.