ވިސްނުމަކީ ފުޓްސަލް ދަނޑުތަކާއި އެ ތަންތަނުން ލިބޭ އާމްދަނީ ސަރުކާރަށް ނެގުން: މިނިސްޓަރު ރާފިއު

މާލޭ ސަރަހައްދުގައި ގާއިމްކޮށްފައިވާ ފުޓްސަލް ދަނޑުތައް ސަރުކާރުގެ ބެލުމުގެ ދަށަށް ގެނެސް، މި ދަނޑުތަކުން ކުއްޔަށް ލިބޭ ފައިސާ ސަރުކާރުގެ ކުޅިވަރު ފަންޑަށް ލިބޭނެ ނިޒާމެއް އެކުލަވާލުމަކީ ސަރުކާރުގެ ވިސްނުން ކަމުގައި ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެއެވެ. މިނިސްޓަރު މިހެން ވިދާޅުވީ، ރައްޔިތުންގެ މަޖިލީހަށް ހުށަހަޅާފައިވާ ކުޅިވަރު ގާނޫނުގެ އިސްލާހުގައި ހުރި ކަންކަން ދިރާސާ ކުރުމަށް އިޖުތިމާއީ ކޮމެޓީން ބޭއްވި ބައްދަލުވުމަށް ހާޒިރުވެވަޑައިގެން، މެންބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ. 

މި ފުޓްސަލް ދަނޑުތައް ގްރޫޕްތަކުން ނޫނީ ކްލަބްތަކުން ކޮންޓްރޯލްކޮށް، އެތަންތަނުން މާލީ މަންފާ ހޯދާއިރު، އެ ފަދަ ކަންކަން ފުރަތަމަ ޑިވިޝަނުގެ ކްލަބްތަކަށް ނެތީ ކީއްވެތޯ ކުރި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، ކުރީގެ ސަރުކާރުތަކުން އެކަން ކޮށްފައި އޮތީ އެއްވެސް އުސޫލެއް ނެތި ކަމަށާއި، ބައެއް ފަހަރު ސިޓީއެއްގެ ޒަރިއްޔާއިން އަދި އަނެއްބައި ފަހަރު އެއްބަސްވެވޭ ގޮތެއްގެ މަތިން ދަނޑުތައް ދޫކޮށްފައި އެބަހުރިކަމަށެވެ.

އެ ކޮމެޓީގައި މިނިސްޓަރު ވިދާޅުވީ، އެ ކަންކަން ތަރުތީބު ކުރުމުގެ ވިސްނުން ސަރުކާރުގައި އެބައޮތް ކަމަށާއި، އެކަން ހައްލުކުރަން ސަރުކާރުން ވިސްނަނީ އެ ދަނޑުތައް މިހާރު ހިންގާ ގްރޫޕްތަކަށް ނޫނީ ކްލަބްތަކަށް ވެސް ބޭނުންކުރެވޭ ގޮތަށް ވަކި އިންތިޒާމެއްގެ ތެރެއިން، އާއްމުންނަށް ވެސް ފަސޭހައިން ލިބޭ ގޮތަށް ކަމަށެވެ. 

ނަމަވެސް މި މައްސަލައަކީ ގިނަ ދުވަސްވެފައިވާ މައްސަލައެއް ކަމުން، މިކަން ހައްލު ކުރުމަށް ގިނަ ވަގުތު ހޭދަވާނެކަމަށް ވެސް މިނިސްޓަރު ވަނީ ފާހަގަ ކުރައްވާފައެވެ. 

ސަރުކާރުގެ ކުޅިވަރު ވަސީލަތްތައް މަރާމާތުކޮށް ބެލެހެއްޓުމަށް ސަރުކާރުން ގެންގުޅުއްވާ ވިސްނުން ހާމަކުރައްވަމުން މިނިސްޓަރު ވިދާޅުވީ، އެ ފަދަ ކަންކަމަށް އަންނަ އަހަރުގެ ބަޖެޓްގައި ވަކިން ހާއްސަކޮށް ފައިސާ ހިމަނާފައިވާނެ ކަމަށެވެ. އަދި މާލޭ ސަރަހައްދުގެ ފުޓްސަލް ދަނޑުތައް ސަރުކާރުގެ ބެލެހެއްޓުމުގެ ދަށަށް ގެންނަނަމަ، ވަކި އިންތިޒާމެއްގެ ތެރެއިން، ބަޔަކާ އެ މަސައްކަތް ހަވާލުކޮށްގެން ވިޔަސް އެކަން ކުރެވޭނެ ނިޒާމެއް ގާއިމްކުރާނެ ކަމަށެވެ.