ނިސްޓެލްރޯއީގެ ފުރަތަމަ މެޗުން ތަފާތު ދައްކައި، ލެސްޓަރ އިން ރެލިގޭޝަނާ ދުރަށް

އިންގްލިޝް ޕްރިމިއަރ ލީގުގެ ލެސްޓަރ ސިޓީ އާއި އަލަށް ހަވާލުވި މެންޗެސްޓަރ ޔުނައިޓެޑުގެ ލެޖެންޑް، ރޫޑް ވެން ނިސްޓެލްރޯއީގެ އިރުޝާދުގެ ދަށުން އެ ޓީމުން ކުޅުނު ފުރަތަމަ މެޗު 3-1 އިން ކާމިޔާބުކޮށް، ރެލިގޭޝަނާ 4 ޕޮއިންޓު ދުރަށް ޖެހިލައިފިއެވެ.

ލެސްޓަރ ސިޓީގެ ކިންގް ޕަވަރ ސްޓޭޑިއަމްގައި ކުޅުނު މި މެޗުގައި އެ ޓީމަށް ލީޑު ނަގައި ދިނުމަށް ފޯވާޑް ޖޭމީ ވަރޑީއަށް ބޭނުންވީ އެންމެ 2 މިނެޓެވެ. ވަރޑީގެ މި ގޯލަކީ އޮފްސައިޑް ގޯލެއް ކަމަށް ރެފްރީ ވަނީ ފުރަތަމަ ނިންމާފައެވެ. ނަމަވެސް ވީޑިއޯ އެސިސްޓެންޓް ރެފްރީ (ވީއޭއާރް) ނިންމީ އެ ގޯލު އޮފްސައިޑް ނުވާކަމަށެވެ.

އެއަށްފަހު މެޗުގެ ކޮންޓްރޯލް ނަގައި، ނަތީޖާ ހަމަހަމަ ކުރުމަށް ވެސްޓް ހޭމްއިން ވަރަށް ގަދަޔަށް މަސައްކަތް ކުރިތަން ފެނުނެވެ. އެގޮތުން އެ ޓީމުގެ ފޯވާޑް، ޑެނީ އިންގްސްގެ ހަމަލާއެއް ދަނޑިއަށް އަމާޒުވިއިރު، އެ ޓީމުން ޖެހި ގޯލު ރެފްރީ ނުގުނީ، އެ ގޯލު ޖެހުމުގެ ކުރިން ލެސްޓަރގެ ގޯލްކީޕަރު، މެޓްސް ހާމެންސަންއަށް ވެސްޓް ހޭމްގެ މިޑްފިލްޑަރ، ތޯމަސް ސޯސެޗް ފައުލްކޮށްފައި ވުމުންނެވެ.

ލެސްޓަރ އިން މެޗުގެ ލީޑު ފުޅާ ކުރީ، އެ ޓީމަށް ކުޅޭ މޮރޮކޯގެ ބިލާލް އެލް ޚައްނޫސް 61 ވަނަ މިނެޓުގައި ކާމިޔާބުކުރި ގޯލަކުންނެވެ. އަދި އެ ޓީމުގެ 3 ވަނަ ގޯލު ކާމިޔާބުކޮށްދިނީ، ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޕެޓްސަން ޑާކާއެވެ. އޭނާ މި ގޯލު ކާމިޔަބުކުރީ މެޗުގެ 90 ވަނަ މިނެޓުގައެވެ.

ވެސްޓް ހޭމްގެ ހަމައެކަނި ގޯލު ކާމިޔާބުކުރީ މެޗުގެ އިތުރުވަގުތުގައެވެ. އެއީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ނިކްލަސް ފުލްކްރޫގް ކާމިޔާބުކުރި ގޯލެކެވެ.

ލެސްޓަރއަށް ލީގުގައި މޮޅެއް މި ހޯދުނީ 6 މެޗަށް ފަހުއެވެ. މި މޮޅާއެކު އެ ޓީމުންވަނީ 13 ޕޮއިންޓު ހޯދައި ލީގުގެ 15 ވަނައަށް ކުރިޔަށް ޖެހިލާފައެވެ. އަދި އެ ޓީމާއި ރެލިގޭޝަނާއި އޮތް ފަރަގު ވެސް މިހާރު ވަނީ 4 ޕޮއިންޓަށް ބޮޑުވެފައެވެ.