ރައީސް މުޢިއްޒު އުތީމަށް ވަޑައިގެންފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހއ. އުތީމަށް މިއަދު ވަޑައިގެންފިއެވެ. އެމަނިކުފާނު އުތީމަށް ވަޑައިގެންނެވީ އެ ރަށުގައި ކުރިއަށްދާ ޤައުމީ ދުވަހުގެ ޙަރަކާތްތައް ޝަރަފުވެރިކޮށްދެއްވައި، އެ ޙަރަކާތްތަކުގައި ބައިވެރިވެވަޑައިގަތުމުގެ ގޮތުންނެވެ.

ރައީސުލްޖުމްހޫރިއްޔާގެ މި ދަތުރުފުޅުގައި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދުވެސް ބައިވެރިވެވަޑައިގަންނަވައެވެ. ރައީސް މުޢިއްޒުގެ ދެކަނބަލުން އުތީމަށް ވަޑައިގެންނެވުމުން އެ ރަށުގެ ގިނަ އަދަދެއްގެ ރައްޔިތުން ވަނީ އުތީމު ބަނދަރު ސަރަޙައްދަށް ނުކުމެ އެ ދެކަނބަލުންނަށް ހޫނު މަރުޙަބާއެއް ދަންނަވައިފައެވެ.

އުތީމަށް ކުރައްވަމުންދާ މި ދަތުރުފުޅުގެ ތެރެއިން ރައީސުލްޖުމްހޫރިއްޔާ ވަނީ އެ ރަށުގައި އައްސުލްޠާން އަލްޣާޒީ މުޙައްމަދު ތަކުރުފާނު އަލްއަޢުޡަމްގެ ޒިކުރާއެއްގެ ގޮތުން އުތީމުގައި އަލަށް ބިނާކުރެވުނު ބޮޑުތަކުރުފާނުގެ  ހަނދާނީ ދޮރާށިކޮޅު ހުޅުވައިދެއްވައިފައެވެ.

މީގެއިތުރުން، މިއަދުގެ ވަގުތެއްގައި އުތީމުގައި ޤާއިމުކޮށްފައިވާ 'ވާހަކަ ވައު' ހުޅުވައިދެއްވުމަށް ހަމަޖެހިފައިވާއިރު، މިރަށުގައި ކުރިއަށްދާ ޤައުމީ ދުވަހުގެ ރަސްމީ ޖަލްސާގައިވެސް ރައީސުލްޖުމްހޫރިއްޔާ ބައިވެރިވެވަޑައިގަންނަވާނެއެވެ.