ލެވަކޫސެންއިން ބެޔާންގެ ދަނޑުގައި އެ ޓީމު ޖަރުމަނު ކަޕުން ކަޓުވާލައިފި

ބަދަލު ކުޅުންތެރިއެއްގެ ގޮތުގައި ކުޅެން ނިކުތް ނަތަން ޓެލާގެ ގޯލަކާއެކު، ބެޔާ ލެވަކޫސެން އިން ބެޔާން މިއުނިކްގެ ދަނޑުގައި އެ ޓީމު ޖަރުމަނު ކަޕުން ކަޓުވާލައިފިއެވެ.

ބެޔާންގެ ފޯވާޑް، ހެރީ ކޭންގެ ފަލަމަސްގަނޑަށް ލިބިފައިވާ އަނިޔާއަކާ ގުޅިގެން، އޭނާގެ ބަދަލުގައި އެ މަގާމަށް މި މެޗުގައި ކުޅެން ނިކުތީ، ޖަރުމަނު ގައުމީ ޓީމަށް ކުޅެމުން އަންނަ ޖަމާލް މުސިއާލާއެވެ. އޭނާގެ ފަހަތުން، އެޓޭކިންގައި ބައިވެރިވީ މިޝޭލް އޮލީސްއެވެ. 

މެޗު ފަށައިގެން ބެޔާންއިން ލެވަކޫސެންގެ ގޯލަށް ނުރައްކާ ކުރުމަށް މަސައްކަތް ކުރިއެވެ. ނަމަވެސް އެ ޓީމުގެ ފަހަތުން ޑުޔޮތު އުޕަމެކާނޯއަށް ހެދުނު ގޯހެއްގެ ފައިދާނަގައި، މެޗުގެ ފުރަތަމަ ނުރައްކާތެރި ހަމަލާ 11 ވަނަ މިނެޓުގައި އެފެއްދީ ލެވަކޫސެންއެވެ. އެ ޓީމުގެ ފްލޯރިއަން ވަރޓްޒް ފޮނުވާލި މި ހަމަލާ ދިޔައީ ގޯލު ކައިރިން ބޭރަށެވެ.

އޭގެ 6 މިނެޓު ފަހުން، ބަޔާންއަށް މެޗުގެ އެންމެ ބޮޑު ގޮންޖެހުމާ ކުރިމަތިލާން ޖެހުނުނެވެ. ލެވަކޫސެންގެ ހަމަލާއެއްގައި އެ ޓީމުގެ ޖެރެމީ ފްރިމްޕޮންގްއަށް ޕެނަލްޓީ އޭރިޔާ ބޭރުން ބެޔާންގެ ގޯލްކީޕަރު މެނުއެލް ނޯޔަރ ކުރި ފައުލަކާ ގުޅިގެން، އޭނާގެ ކެރިއަރުގެ ފުރަތަމަ ރަތް ކާޑާއި ކުރިމަތިލާންޖެހި، މެޗުގެ ބޮޑު ބައެއް ބެޔާން އިން ކުޅެން ޖެހުނީ އެއް ކުޅުންތެރިއަކު މަދުކޮށެވެ. 

ރަތްކާޑަށްފަހު ބެޔާންއިން ނުރައްކާތެރި ހަމަލާތަކެއް ވަނީ ލެވަކޫސެންގެ ގޯލަށް ފޮނުވާލާފައެވެ. އޭގެތެރޭގައި އެ ޓީމުގެ އަރިމަތިން ފަހަތަށް ކުޅެމުން އަންނަ ލައިމަރ ފޮނުވާލި ބޯޅައާއި، ލެއޯން ގޮރެޓްޒްކާ ބޮލުން ފޮނުވާލި ބޯޅަ ފާހަގަ ކުރެވެއެވެ.

ލެވަކޫސެންއިން ބެޔާންގެ ގޯލު ފޫއަޅުވާލީ، މެޗުގެ 69 މިނެޓުގައި އަލެހަންޑްރޯ ގްރިމާލްޑޯ ބެޔާންގެ ގޯލު ކުރިމައްޗަށް ހުރަސްކޮށްދިން ބޯޅައަކުން، ބަދަލު ކުޅުންތެރިއެއްގެ ގޮތުގައި ނިކުތް ޓެލާއެވެ. ގްރިމާލްޑޯގެ ހުރަސް ޓެލާ ގޯލަށް ފޮނުވާލީ ބޮލުންނެވެ. 

ނަތީޖާއަށް ބަދަލެއް ގެނެވޭތޯ މެޗުގެ ފަހުކޮޅަށް ދިޔަތަނާ ބެޔާންގެ ކޯޗު ވިންސެންޓް ކޮމްޕެނީ ވަނީ އިތުރު އެޓޭކިން ކުޅުންތެރިން ކުޅުމަށް ގެނަސްފައެވެ. ނަމަވެސް ގޯލެއް ނުޖެހި، ޒަބީ އޮލޮންސޯގެ ލެވަކޫސެން ވަނީ ޖަރުމަނު ކަޕުގެ ކުއާޓާ ފައިނަލުން ޖާގަ ހޯދާފައެވެ. 

ބެޔާން މި މުބާރާތުން އަލްވަދާއު ކިޔަން ޖެހުނުއިރު، ދަނޑު ބޭރުން މެޗު ބަލަން އިން ކޭން އެ ޓީމަށް ބަދަލުވިފަހުން ތައްޓެއް ލިބިފައިނުވާ ސިލްސިލާއަށް މިވަނީ އަދި ބަދަލެއް އަންނަ ގޮތް ނުވެފައެވެ.