އަބޫދާބީގެ ޒާޔެދް އިންޓަނޭޝަނަލް އެއަރޕޯޓަށް ދުނިޔޭގެ އެންމެ ރީތި އެއަރޕޯޓުގެ މަޤާމު

ޔުނެސްކޯގެ މައި އޮފީހުގައި ބޭއްވުނު ޚާއްޞަ ރަސްމިއްޔާތެއްގައި، ޒާޔެދް އިންޓަނޭޝަނަލް އެއަރޕޯޓް (އޭޔޫއެޗް) އަށް ވަނީ ދުނިޔޭގެ އެންމެ ރީތި އެއަރޕޯޓުގެ މަޤާމު ލިބިފައެވެ. މި މަޤާމު ލިބުނީ ޕްރިކްސް ވަރސައިލްސް، ދަ ވޯލްޑް އާކިޓެކްޗަރ އެންޑް ޑިޒައިން އެވޯޑުގެ ދަށުން އެއަރޕޯޓްތަކުގެ ގިންތިންނެވެ.

މި އެވޯޑު ލިބުނު ރަސްމިއްޔާތު ބޭއްވުނީ އެއަރޕޯޓު ހުޅުވުނުތާ އަހަރު ފުރޭ ދުވަހާއި، 53 ވަނަ އީދުލް އިއްތިހާދު ފާހަގަކުރުމާ ދިމާކޮށެވެ. ހަމައެކަނި އަހަރެއްގެ ތެރޭގައި، ޒާޔެދް އިންޓަނޭޝަނަލް އެއަރޕޯޓަށް ވަނީ މި ވާދަވެރި ބައިނަލްއަޤްވާމީ ގިންތީގައި އެންމެ މަތީ މަޤާމު ހޯދައި، ދުނިޔޭގެ އެއަރޕޯޓްތަކަށް އައު މިންގަނޑެއް ކަނޑައަޅައިދީފައެވެ.

އެއަރޕޯރޓުގެ އެތެރެ

742،000 އަކަ މީޓަރުގެ ސަރަހައްދެއްގައި އެޅިފައިވާ މި އެއަރޕޯޓަކީ އެކްސް އަކުރުގެ ސިފައިގައި ފަރުމާކުރެވިފައިވާ އެއަރޕޯޓެކެވެ. މި އެއަރޕޯޓުގައި ގަޑިއިރަކު 11،000 ފަސިންޖަރުންނަށް ޚިދުމަތް ދެވޭނެއެވެ. އަދި އެއްފަހަރާ 79 މަތިންދާބޯޓަށް ޚިދުމަތް ދެވޭނެއެވެ. 2025 ވަނަ އަހަރާ ހަމައަށް އަހަރަކު 45 މިލިއަން ފަސިންޖަރުންނަށް ޚިދުމަތް ދިނުމުގެ ޤާބިލުކަން ލިބިގެންދާނެއެވެ.

މި އެވޯޑާއެކު، ޒާޔެދް އިންޓަނޭޝަނަލް އެއަރޕޯޓަށް ވަނީ ފާއިތުވި އަހަރު ތެރޭގައި އެތައް ބައިނަލްއަޤްވާމީ އެވޯޑެއް ލިބިފައެވެ. މީގެ ތެރޭގައި މެދުއިރުމަތީގައި އެންމެ ބާރަށް ކުރިއަރަމުންދާ އެއަރޕޯޓުގެ މަޤާމު ހިމެނެއެވެ. މީގެ އިތުރުން، އޭސީއައި އޭއެސްކިއު ހިތްހަމަޖެހުމުގެ ސްކޯގައި ދުނިޔޭގެ އެންމެ މަތީ ދަރަޖައިގެ އެއަރޕޯޓްތަކުގެ ތެރޭގައި ހިމެނިފައިވެއެވެ.

މި އެވޯޑު ލިބުމުން އަބޫދާބީގެ ނަން ދުނިޔޭގެ އެންމެ ފަންތީގެ މަންޒިލެއްގެ ގޮތުގައި އިތުރަށް ވަރުގަދަވެގެން ދިޔައެވެ. އަދި ވައިގެ ދަތުރުފަތުރުގެ ދާއިރާގައި އެމިރޭޓްސްގެ އިނޮވޭޝަނާއި ތަރައްޤީއަށް ކުރާ މަސައްކަތް ފާހަގަކޮށްދެއެވެ.