އަނިޔާއާ ގުޅިގެން މަހެއްހާ ދުވަހަށް އިލާން ކުޅުމާ ދުރަށް

ދިވެހި ޕްރިމިއާ ލީގުގެ މި ސީޒަނުގެ ފުރަތަމަ މެޗުގައި މާޒިޔާ ސްޕޯޓްސް އެންޑް ރެކްރިއޭޝަނާއި އޮޑި ސްޕޯޓްސް ކްލަބު ބައްދަލުކުރި މެޗުގައި، މާޒިޔާގެ އުއްމީދީ ޒުވާން ތަރި މުހައްމަދު އިލާން އިމްރާންގެ ކަކުލަށް ލިބުނު އަނިޔާއާ ގުޅިގެން ގާތްގަނޑަކަށް މަހެއްހާ ދުވަހަށް އޭނާ ކުޅުމާ ދުރަށް ދާން ޖެހިއްޖެއެވެ.

މިކަން ހާމަކުރީ ދިވެހި ޕްރިމިއާ ލީގުގައި އަންނަ ބުރާސްފަތި ދުވަހުގެރޭ ނިއުރޭޑިއަންޓް ސްޕޯޓްސް ކްލަބާ ދެކޮޅަށް މާޒިޔާ ނުކުންނަ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި އެ ޓީމުގެ ކޯޗު ތޯމަސް ޓުރުޗާއެވެ.

އޮޑި ސްޕޯޓްސް ކްލަބާ ދެކޮޅަށް ކުޅުނު މެޗުގެ ފުރަތަމަ ހާފު ފެށިގެން މާ ގިނައިރުތަކެއް ނުވަނީސް އިލާންގެ ކަކުލަށް ލިބުނު އަނިޔާއާ ގުޅިގެން އޭނާ ވަނީ ވަގުތުން ބަދަލުކޮށްފައެވެ. އެ ވަގުތު ބެލެވުނީ އޭނާއަށް ލިބުނީ ސީރިއަސް އަނިޔާއެއް ކަމަށް ބެލެވުނު ނަމަވެސް، ޓެސްޓުތަކަށްފަހު ކޯޗު ޓުރުޗާ ބުނީ އިލާންގެ އަނިޔާ އެންމެ ފުރަތަމަ ހީކުރި ވަރަށް ސީރިއަސް ނޫން ކަމަށެވެ. އެހެންނަމަވެސް ފުރިހަމައަށް ރަނގަޅުވެ އެނބުރި ދަނޑަށް އައުމަށް މަހެއްހާ ދުވަސް ނަގާނެ ކަމަށް އޭނާ ބުންޏެވެ.

އިލާން ވަނީ މި ސީޒަނުގައި މާޒިޔާއިން ނިއުރޭޑިއަންޓާ ދެކޮޅަށް ކުޅުނު ތިން މެޗުގައި ވެސް މޮޅު ކުޅުމެއް ދައްކައިފައެވެ. އަދި ކަޕް ވިނާސް ކަޕް މާޒިޔާއިން ކާމިޔާބުކުރި މެޗުގައި އޭނާ ވަނީ ނިއުރޭޑިއަންޓް ކޮޅަށް ލަނޑު ވެސް ޖަހައިފައެވެ.

މި އަނިޔާގެ ސަބަބުން، ކުރިއަށް އޮތް އިންޓަނޭޝަނަލް ބްރޭކްގައި ގައުމީ ސީނިއާ ޓީމުން ކުޅޭ މެޗުތަކުގައި އިލާންއަށް ބައިވެރިއެއް ނުވެވޭނެއެވެ. ކުރިއަށް އޮތް ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގައުމީ ޓީމުން ކުޅޭ މި މެޗުތަކުގެ ތެރެއިން، މި މަހުގެ 24 ވަނަ ދުވަހު ޗައިނާއާ ދެކޮޅަށް އެ ގައުމުގައި މެޗެއް ކުޅޭނެއެވެ. އަދި މި މަހުގެ 28 ވަނަ ދުވަހު ކިރްގިސްތާނާ ދެކޮޅަށް އެ ގައުމުގައި ނުކުންނައިރު، ފަހު މެޗުގައި އަންނަ މަހުގެ އެއްވަނަ ދުވަހު ކިރްގިސްތާނުގައި ކުޅޭނީ ލުބުނާނާ ދެކޮޅަށެވެ.