ގައުމީ ފުޓުބޯޅަ ޓީމުގެ އެސިސްޓެންޓު ކޯޗަކަށް ސޮބާހު ހަމަޖައްސައިފި

ދިވެހިރާއްޖޭގެ ގައުމީ ފުޓުބޯޅަ ޓީމުގެ އެސިސްޓެންޓް ކޯޗު ކަމުގެ ޒިންމާ ކުރީގެ މަޝްހޫރު ޑިފެންޑަރު ސޮބާހު މުހައްމަދު (ސޮބާ)އާ ހަވާލުކޮށްފައިވާ ކަމަށް ގައުމީ ޓީމުގެ ހެޑް ކޯޗު އިސްތަވާން އުރުބާނީ ހާމަކޮށްފިއެވެ.

މިކަން ހާމަކޮށްފައިވަނީ ކުރިއަށް އޮތް ފީފާ އިންޓަނޭޝަނަލް ބްރޭކަށް ތައްޔާރުވުމުގެ ގޮތުން ގައުމީ ޓީމުން ހޮނިހިރު ދުވަހުގެރޭ ފެށި ފަރިތަކުރުންތަކުގެ ކުރިން ބޭއްވި ނޫސްވެރިންގެ ބައްދަލުވުމުގައެވެ.

ކުރިއަށް އޮތް އިންޓަނޭޝަނަލް ބްރޭކުގައި ގައުމީ ޓީމުން ރަހުމަތްތެރިކަމުގެ ތިން މެޗެއް ކުޅުމަށް ވަނީ ތާވަލުކޮށްފައެވެ. އެއީ ޗައިނާގައި އެ ގައުމާ ދެކޮޅަށް ކުޅޭ މެޗުގެ އިތުރުން، ކިރްގިސްތާނުގައި އެ ގައުމާ ދެކޮޅަށް ކުޅޭ މެޗާއި އަދި ކިރްގިސްތާނުގައި ލެބަނަންއާ ދެކޮޅަށް ކުޅުމަށް ހަމަޖެހިފައިވާ މެޗެވެ.

ނޫސްވެރިންގެ ބައްދަލުވުމުގައި ވާހަކަދައްކަމުން ކޯޗު އުރުބާނީ ބުނީ، ސޮބާހު އެސިސްޓެންޓް ކޯޗަކަށް ހަމަޖައްސަން ނިންމީ ވަރަށް ގިނަ ކަންކަމަށް ވިސްނުމަށްފަހު ކަމަށެވެ. އެގޮތުން މީގެ ކުރިން އޭނާ ގައުމީ ޓީމުގެ ކޯޗަކަށް ހުރި ދުވަސްވަރު ސޮބާހަކީ އޭނާގެ އިރުޝާދުގެ ދަށުން ކުޅުނު މުހިންމު ކުޅުންތެރިއެއްކަން އުރުބާނީ ފާހަގަކުރިއެވެ.

އުރުބާނީ އިތުރަށް ބުނީ، ސޮބާހު ގައުމީ ޓީމުގެ އޮފިޝަލް ޓީމަށް ގެނައި މައިގަނޑު އެއް ސަބަބަކީ އޭނާގެ ފަލްސަފާއާއި މަސައްކަތުގެ ވައްޓަފާޅި ސޮބާހަށް ވަރަށް ރަނގަޅަށް އެނގިފައިވުމާއެކު، އެ ތަޖުރިބާ މިހާރުގެ ޒުވާން ކުޅުންތެރިންނާ ހިއްސާކޮށްދީގެން ޓީމުގެ ކަންކަން އެންމެ ފުރިހަމައަށް ކުރިއަށް ގެންދިއުމަށް ފަސޭހަވެގެންދާނެތީ ކަމަށެވެ.

ސޮބާހު މުހައްމަދަކީ ދިވެހިރާއްޖެއިން 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރި ތާރީޚީ ޓީމުގެ މުހިންމު ޑިފެންޑަރެކެވެ. ކުޅުން ހުއްޓާލުމަށްފަހު ކޯޗިން ދާއިރާއަށް ނުކުމެ، އޭނާ ވަނީ ރާއްޖޭގެ އެކި އުމުރުފުރާތަކުގެ ގައުމީ ޓީމުތަކުގެ އިތުރުން ގައުމީ އަންހެން ފުޓުބޯޅަ ޓީމުގެ ހެޑް ކޯޗެއްގެ ގޮތުގައިވެސް ކާމިޔާބު މަސައްކަތްތަކެއް ކޮށްފައެވެ.