މިއީ ތަކުލީފު ބޮޑު ސީޒަނެއް: ގާޑިއޯލާ

މިހާރު ކުރިޔަށްދާ 2024/25 ސީޒަނަކީ ތަކުލީފު ބޮޑު ސީޒަނެއް ކަމުގައި، އިންގްލިޝް ޕްރިމިއަރ ލީގުގެ ޗެމްޕިއަން މެންޗެސްޓަރ ސިޓީގެ ކޯޗު، ޕެޕް ގާޑިއޯލާ ބުނެފިއެވެ. ގާޑިއޯލާ މިހެން ބުނީ، އެ ޓީމުން ހޮނިހިރު ދުވަހުގޭ ކްރިސްޓަލް ޕެލެސްއާ ދެކޮޅަށް ކުޅުނު މެޗު އެއްވަރުވެ، އިތުރު ޕޮއިންޓުތަކެއް ގެއްލުނު އިރު، މެޗެއް ކާމިޔާބު ކުރުމަކީ ބޮޑު ތަކުލީފަކަށް ވެފައިވާ ދަނޑިވަޅެއްގައެވެ.

ގާޑިއޯލާ ހާމަކޮށްފައިވާ ގޮތުގައި، ކްރިސްޓަލް ޕެލެސްއާ ދެކޮޅަށް އޭނާގެ ޓީމުން ދެއްކި ކުޅުމަށް ފަހުރުވެރިވާ ކަމަށާއި، ރަށުން ބޭރުގައި ޖެހިޖެހިގެން ތިން މެޗުން ބަލިވުމަށްފަހު، ކްރިސްޓަލް ޕެލެސްއާ ދެކޮޅަށް ކުޅުނު މެޗުގެ ނަތީޖާ ހަމަހަމަވެ ޕޮއިންޓެއް ލިބުނީތީ އުފާކުރާ ކަމަށެވެ. އަދި އެ ނަތީޖާއާއެކު، މި ސީޒަނުގެ ތައްޓަށް މެންޗެސްޓަރ ސިޓީއަށް ވާދަ ކުރެވިދާނެކަމަށް އޭނާ ގަބޫލު ނުކުރާކަމަށް ވެސް ބުނެފައި ވެއެވެ. 

އަދި ޖެހިޖެހިގެން 4 މެޗުން ބަލިވުމަށްފަހު 1 މެޗުން އެއްވަރުވެފައިވާ މި ދަނޑިވަޅުގައި ލީގުގެ ތައްޓާ ގުޅިގެން އެއްވެސް ވާހަކައެއް ދެއްކުމަކީ އެންމެ ގަބޫލު ކުރެވޭ ގޮތް ނޫންކަމަށް ވެސް ގާޑިއޯލާ ބުނެފައިވެއެވެ.

މެންޗެސްޓަރ ސިޓީ އާއި ކްރިސްޓަލް ޕެލެސް ބައްދަލުކުރި މެޗުގެ ހަތަރު ވަނަ މިނެޓުގެ ފަހުން ގާޑިއޯލާގެ ޓީމަށް ކުޅެން ޖެހުނީ އެއް ގޯލު ފަހަތަގައި އޮވެގެނެވެ. އެ މެޗުގައި ކްރިސްޓަލް ޕެލެސްއިން ލީޑު ނެގީ އެ ޓީމުގެ ޑެނިއެލް މުނޯޒް ކާމިޔާބުކުރި ގޯލަކުންނެވެ. ނަމަވެސް ސިޓީއިން ވަނީ އަރލިން ހާލަންޑުގެ ގޯލަކުން މެޗުގެ ފުރަތަމަ ހާފުގައި ނަތީޖާ ހަމަހަމަކޮށްފައެވެ. 

އެ މެޗުގައި ކްރިސްޓަލް ޕެލެސްއިން ދެވަނަ ފަހަރަށް ލީޑު ނެގުމުން މެންޗެސްޓަރ ސިޓީއަށް ޖެހުނީ އަނެއްކާ ވެސް ބުރަ މަސައްކަތްތަކެއް ކުރާށެވެ. އެގޮތުން އެ ޓީމަށް ދެވަނަ ފަހަރަށް ނަތީޖާ ހަމަހަމަކޮށްދިނީ، ޒުވާން ކުޅުންތެރިޔާ ރިކޯ ލެވިސްއެވެ. 

މި މެޗުގައި މެންޗެސްޓަރ ސިޓީ މޮޅުވުމަށް ކުރަމުން ދިޔަ މަސައްކަތަށް އިތުރު ގޮންޖެހުމަކަށްވީ، ރިކޯ ލެވިސްއަށް ރަތް ކާޑު ދެއްކުމުން ކުޅުންތެރިއަކު މަދުކޮށް ކުޅެންޖެހުމެވެ. ދެވަނަ ރީނދޫ ކާޑަކާއެކު ރަތް ކާޑެއް ދައްކައި ރިކޯ ލެވިސް ދަނޑުން ފޮނުވާލީ މެޗުގެ 84 ވަނަ މިނެޓުގައެވެ. 

ގާޑިއޯލާ ބުނީ އެ މެޗުގައި އޭނާގެ ޓީމަށް ވުރެން އިދިކޮޅު ޓީމުގެ ކުޅުން މޮޅުކަމަށާއި ފުޓުބޯޅައިގައި ރަގަޅު ދުވަސްތަކާއި ރަގަނޅު ނޫން ދުވަސްތައް ކުރިމަތިވާނެ ކަމަށެވެ. އަދި މިވަގުތު އެހެން ޓީމުތަކަށް ވުރެން ސެޓް-ޕީސްތަކުގައި ވެސް މެންޗެސްޓަރ ސިޓީ ބަލިކަމަށް އޭނާ ފާހަގަ ކުރިއެވެ.