އިނގުރައިދޫއިން ހިންނަވަރު ބަލިކޮށް ސެމީފައިނަލްގެ ޖާގައެއް ކަށަވަރުކޮށްފި

އެފްއޭއެމް ފުޓްސަލް ޒޯން ޗެމްޕިއަންޝިޕް 2026 - ނޯތު ޒޯން 2 ގެ ގްރޫޕް އޭގައި އިނގުރައިދޫ ރެދަން ސްޕޯޓްސް ކްލަބުން 4-1 ގެ ނަތީޖާއަކުން ހިންނަވަރު ސްޕޯޓްސް ކްލަބް ބަލިކޮށް، މުބާރާތުގެ ސެމީފައިނަލުން ޖާގަ ހޯދައިފިއެވެ. މި ކާމިޔާބީއާއެކު އިނގުރައިދޫ ވަނީ ކުޅުނު ދެ މެޗުން ވެސް މޮޅުވެ، 6 ޕޮއިންޓާއެކު ގްރޫޕްގެ އެއްވަނަ މަގާމަށް އަރާފައެވެ.

މެޗު ފެށިގެން އިނގުރައިދޫއިން ވަނީ މޮޅު ކުޅުމެއް ދައްކައި، ހިންނަވަރުގެ ގޯލަށް ގިނަ ހަމަލާތަކެއް ފޮނުވާލާފައެވެ. އެގޮތުން ގޯލުގެ ދަނޑިއަށް ވެސް އެ ޓީމުގެ ބައެއް ހަމަލާތައް އަމާޒުވިއެވެ. އިނގުރައިދޫއިން މެޗުގެ ލީޑު ނެގީ 8 ވަނަ މިނެޓުގައި އިބްރާހީމް މުބީން ކާމިޔާބުކޮށްދިން ލަނޑުންނެވެ. 

ފުރަތަމަ ހާފު ނިމުމުގެ ކުރިން ލީޑު ފުޅާކުރަން އިނގުރައިދޫގެ އަހުސަމް ޢަލީއަށް ދުރު ޕެނަލްޓީއެއް ލިބުނު ނަމަވެސް، އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެ ބޭރަށެވެ.

ދެވަނަ ހާފުގައި ހިންނަވަރުން ނަތީޖާ ހަމަހަމަކުރުމަށް ގިނަ މަސައްކަތްތަކެއް ކުރިއެވެ. ނަމަވެސް ހިންނަވަރަށް ގޯލެއް ކާމިޔާބު ނުކުރެވެނީސް، މެޗުގެ 30 ވަނަ މިނެޓުގައި އިނގުރައިދޫގެ ތަރި ޢަލީ ހާފިޒް ވަނީ އެ ޓީމުގެ ދެވަނަ ލަނޑު ޖަހައިދީފައެވެ. އަދި އޭގެ ފަސް މިނެޓު ފަހުން، ބަޓިރްބެކް އުލާން ވަނީ އިނގުރައިދޫގެ ތިންވަނަ ލަނޑު ކާމިޔާބުކޮށްދީ، ލީޑު ފުޅާކޮށްފައެވެ.

އިނގުރައިދޫއިން ތިން ލަނޑު ޖަހާފައި ވަނިކޮށް، ހިންނަވަރުގެ އަޙްމަދު އަޝްރަފް ވަނީ މެޗުގެ 36 ވަނަ މިނެޓުގައި އެ ޓީމަށް ލަނޑެއް ޖަހައިދީ އުންމީދު އާކޮށްދީފައެވެ. ނަމަވެސް، މެޗުގެ އެންމެ ފަހު މިނެޓުގައި އިބްރާހީމް މުބީން އޭނާގެ ދެވަނަ ލަނޑު ޖަހައި، 4-1 އިން އިނގުރައިދޫއަށް މޮޅު ކަށަވަރުކޮށްދިނެވެ.

މި ގްރޫޕްގައި ދެން ކުޅެވުނު މެޗުގައި ތުޅާދޫން ވަނީ މުބާރާތް ބާއްވާ މަނަދޫގެ މައްޗަށް 5-0 ގެ ތަފާތު ބޮޑު ނަތީޖާއަކުން ކުރިހޯދާފައެވެ. މި މެޗު ފެށިގެން ފުރަތަމަ ދެ މިނެޓުގެ ތެރޭގައި ހައްޔާން ޙަސަން ޙުސައިން ވަނީ ދެ ލަނޑު ޖަހައި ތުޅާދޫއަށް ފުރިހަމަ ފެށުމެއް ހޯދައިދީފައެވެ. މީގެއިތުރުން މުޙައްމަދު ޒައިން ނިޔާޒް ދެ ލަނޑު ޖެހިއިރު، އަނެއް ލަނޑު ކާމިޔާބުކުރީ މުޙައްމަދު ތަސްނީމެވެ.

މި ނަތީޖާތަކާއެކު، ސެޕްޓެމްބަރު 29 ވަނަ ދުވަހު ހިންނަވަރާއި ތުޅާދޫ ބައްދަލުކުރާ މެޗު ވެގެންދާނީ ގްރޫޕް އޭ އިން ސެމީފައިނަލުގެ ދެވަނަ ޖާގަ ކަށަވަރުކުރުމަށް ކުޅެވޭ ފޯރިގަދަ އަދި މުހިންމު ކުރިމަތިލުމަކަށެވެ.