ގުރައިދޫ އިރު ދެކުނުން 9 މޭލު ބޭރުގައި ދޮށީ ކަނދުފަތި ޤާއިމްކޮށްފި

ތ. ގުރައިދޫ އިރު ދެކުނުން 9 މޭލު ބޭރުގައި ދޮށީ ކަނދުފަތި ގާއިމްކޮށްފައިވާކަމަށް މަސްވެރިކަމާ ކަނޑުގެ ވަަސީލަތްތަކާ ބެހޭ ވުޒާރާއިން ވިދާޅުވެއްޖެއެވެ.

މަސްވެރިކަމާއި ކަނޑުގެ ވަޞީލަތްތަކާ ބެހޭ ވުޒާރާއިން ހާމަކުރާ ގޮތުގައި، މި ދޮށީ ކަނދުފަތީގެ ނަންބަރަކީ L09D04 އެވެ. އަދި މި ކަނދުފަތި ޤާއިމުކޮށްފައިވާ ލޮކޭޝަނަކީ 2°16.100N 73°27.200E މިއެވެ.

މި ކަނދުފަތިތައް ޤާއިމްކުރުމުގެ ސަބަބުން އެ ސަރަޙައްދުގެ މަސްވެރިކަން އިތުރަށް ކުރިއަރާނެ ކަމަށް ވުޒާރާއިން ވިދާޅުވެއެވެ. އަދި  އެ ސަރަޙައްދުގެ މަސްވެރިން، ހާއްސަކޮށް ޒުވާން މަސްވެރިންނާއި ސްޕޯޓްސް ފިޝިންގްގައި ޝާމިލްވާ ފަރާތްތަކަށް ވަރަށް ބޮޑު ފަސޭހައެއް ލިބިގެންދާނެކަން ވެސް ވުޒާރާއިން ވަނީ ފާހަގަކުރައްވާފައެވެ.

މަސްވެރިކަމުގެ ދާއިރާ ކުރިއެރުވުމަށް ސަރުކާރުން ގެންގުޅޭ ސިޔާސަތުތަކުގެ ތެރެއިން، ކަނދުފަތި އެޅުމަކީ ވަރަށް ބޮޑު އަހައްމިއްޔަތުކަމެއް ދީގެން ހިންގާ މަޝްރޫޢެކެވެ. ކުރިއަށް އޮތް ތަނުގައި، ރާއްޖޭގެ އެކި ކަންކޮޅުތަކުގައި އިތުރު ކަނދުފަތިތައް ބެހެއްޓުމުގެ އިންތިޒާމުތައް ވުޒާރާއިން މެދުކެނޑުމެއްނެތި ކުރިއަށްގެންދަވާނެކަމުގެ ޔަޤީންކަން މަސްވެރިކަމާއި ބެހޭ ވުޒާރާއިން ވަނީ ދެއްވާފައެވެ.

ދިވެހިރާއްޖޭގެ ކަނދުފަތީގެ ވިއުގަ އިތުރަށް ފުޅާކޮށް، ޒަމާނީ ޓެކްނޮލޮޖީގެ ވަޞީލަތްތައް ބޭނުންކޮށްގެން އައު ފަރުމާއަކަށް ބަދަލުކުރުމުގެ މަޝްރޫޢެއް އެ ވުޒާރާއިން ވަނީ ފަށާފައެވެ.