ޒޯން ބުރުން ފެށި ކަނޑިތީމުން ހަނިމާދޫ ބަލިކޮށްފި

އެފްއޭއެމް ފުޓްސަލް ޒޯން ޗެމްޕިއަންޝިޕް 2026 ގެ ނޯތު ޒޯން 1 ގައި ވާދަކުރި ށ. ކަނޑިތީމުން، ހދ. އަތޮޅުގެ ޗެމްޕިއަން ހަނިމާދޫ 2-6 ގެ ބޮޑު ތަފާތަކުން ބަލިކޮށްފިއެވެ.

ށަވިޔަނި އަތޮޅުން ވާދަކުރާ ހަމައެކަނި ޓީމުގެ ގޮތުގައި، އަތޮޅު ބުރު ކުޅުމަކާ ނުލައި ސީދާ ޒޯން ބުރަށް ކޮލިފައިވި ކަނޑިތީމުން މި މެޗު ފެށީ ވަރަށް ފޯރިއާއެކުގައެވެ. އެގޮތުން، އަތޮޅު މުބާރާތުގެ ފައިނަލުގައި ނައިވާދޫ ބަލިކޮށް ޒޯން ބުރަށް އައި ވަރުގަދަ ހަނިމާދޫ ކޮޅަށް، މެޗު ފެށިގެން އެންމެ 20 ސިކުންތުގެ ތެރޭގައި ހުސައިން ނިހާލް ވަނީ ލަނޑެއް ޖަހައި ކަނޑިތީމަށް ލީޑު ނަގައިދީފައެވެ.

ފުރަތަމަ ހާފުގައި މޮޅު ކުޅުމެއް ދެއްކި ކަނޑިތީމުގެ ދެވަނަ ލަނޑު 12 ވަނަ މިނެޓުގައި ކާމިޔާބުކުރީ އިބްރާހީމް ނަދަދެވެ. އަދި ހާފު ނިމެން ދެ މިނެޓަށް ވެފައި ވަނިކޮށް ރައުލް ނިޔާޒް އެ ޓީމުގެ ތިންވަނަ ލަނޑު ޖެހިއިރު، ފުރަތަމަ ހާފުގެ އެންމެ ފަހު މިނެޓުގައި ނިހާލް ވަނީ އޭނާގެ ދެވަނަ ލަނޑާއެކު ނަތީޖާ 0-4 އަށް ބަދަލުކޮށްދީފައެވެ.

ދެވަނަ ހާފު ފެށިގެން 23 ވަނަ މިނެޓުގައި ނިހާލް ވަނީ އޭނާގެ ހެޓްރިކް ފުރިހަމަކޮށް، ކަނޑިތީމުގެ ލީޑު 0-5 އަށް ފުޅާކޮށްފައެވެ. އޭގެ ފަހުން ހަނިމާދޫން ކުޅުން ރަނގަޅުކޮށް، މެޗުގެ 29 އަދި 31 ވަނަ މިނެޓުގައި ނޫރުﷲ ތޯހާ ޖެހި ދެ ލަނޑާއެކު ފަރަގު ކުޑަކުރިއެވެ. ނަމަވެސް މެޗު ނިމެން އެންމެ މިނެޓަކަށް ވެފައި ވަނިކޮށް، ރައުލް ނިޔާޒް ކާމިޔާބުކުރި އޭނާގެ ދެވަނަ ލަނޑާއެކު ކަނޑިތީމުން ވަނީ 2-6 އިން މެޗު ކާމިޔާބުކޮށްފައެވެ.

މި ޒޯނުގައި ކުޅުނު އަނެއް މެޗުގައި ނައިވާދޫން ވަނީ ފިއްލަދޫގެ މައްޗަށް 1-8 ގެ ބޮޑު މޮޅެއް ހޯދާފައެވެ. މި މެޗުގެ ފުރަތަމަ ހާފުގައި ނައިވާދޫން ހަތަރު ލަނޑުގެ ލީޑެއް ނެގިއިރު، އެ ލަނޑުތައް ޖަހައިދިނީ ޢަބްދުﷲ ވިސާމް، އަޙްމަދު ޙަމީދު، ޢަލީ ޙުސާމް އަދި މުޙައްމަދު ނިހާދެވެ. ދެވަނަ ހާފުގައި ވިސާމް އިތުރު ލަނޑެއް ޖެހިއިރު، މުޙައްމަދު ޝާއިންގެ ލަނޑަކާއި، ޔާނިއު މުޙައްމަދުގެ ދެ ލަނޑާއެކު ނައިވާދޫއިން 8 ލަނޑު ހަމަކުރިއެވެ. ފިއްލަދޫގެ ހަމައެކަނި ލަނޑު މެޗުގެ އެންމެ ފަހު މިނެޓުގައި ކާމިޔާބުކޮށްދިނީ ޢަބްދުﷲ އިޚްވާނެވެ.