ނިއުރޭޑިއަންޓު މެޗުގައި ހިނގި ހަމަނުޖެހުމާ ގުޅިގެން ސުޒޭރު ސަސްޕެންޑުކޮށްފި

ދިވެހި ޕްރިމިއަރ ލީގުގައި ނިއުރޭޑިއަންޓް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން ބައްދަލުކުރި މެޗުގެ ތެރެއިން މާރާމާރީ ހިންގި މައްސަލައިގައި، މާޒިޔާގެ އެސިސްޓަންޓް ކޯޗު އަހުމަދު ސުޒެއިރު ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ސަސްޕެންޑުކޮށްފިއެވެ.

މި ސަސްޕެންޝަނަކީ، މި ހިނގާ މަހުގެ 17 ވަނަ ދުވަހުގެރޭ ގަލޮޅު ރަސްމީ ދަނޑުގައި ކުޅުނު ފޯރިގަދަ މެޗުގެ ތެރޭގައި ހިނގައިދިޔަ ހަމަނުޖެހުމުގައި، ނިއުރޭޑިއަންޓުގެ އެސިސްޓަންޓް ކޯޗު ލޫސިއާނޯގެ މޫނުމަތީގައި ސުޒޭރު ޖަހާފައިވުމާ ގުޅިގެން ދިން އަދަބެކެވެ. ސޯޝަލް މީޑިއާގައި ދައުރުވި ވީޑިއޯތަކުން ވެސް މި މަންޒަރު ވަނީ ފެނިފައެވެ.

މި މައްސަލަ ނިއުރޭޑިއަންޓުގެ ފަރާތުން އެފްއޭއެމްގެ ޑިސިޕްލިނަރީ ކޮމިޓީގެ އިތުރުން މޯލްޑިވްސް ޕޮލިސް ސަރވިސްއަށް ވެސް ހުށަހެޅިއެވެ. ނަމަވެސް، ފަހުން އެ ކްލަބުން ވަނީ ފުލުހުންނަށް ހުށަހެޅި މައްސަލަ އަނބުރާ ގެންގޮސްފައެވެ.

މި މައްސަލަ ބެލުމަށްފަހު އެފްއޭއެމް އިން ނެރުނު ބަޔާނެއްގައި ހާމަކޮށްފައިވާ ގޮތުގައި، އެ މެޗުގައި ކުޅިވަރުގެ ރޫހާ ޚިލާފަށް ހިނގައިދިޔަ ކަންކަން ފުރިހަމައަށް ބެލުމަށްފަހު ސުޒެއިރަށް ފިޔަވަޅު އަޅަން ވަނީ ނިންމާފައެވެ. އެގޮތުން އެފްއޭއެމްގެ ޑިސިޕްލިނަރީ އެންޑް އެތިކްސް ކޯޑުގެ 34 ވަނަ މާއްދާގެ ދަށުން އޭނާ ވަނީ 10 މެޗަށް ސަސްޕެންޑުކޮށް، 15،000 ރުފިޔާއިން ޖޫރިމަނާކޮށްފައެވެ.

އެފްއޭއެމްގެ ނިންމުމުގައިވާ ގޮތުން މި ޖޫރިމަނާ ފައިސާ ކުރިއަށް އޮތް 15 ދުވަހުގެ ތެރޭގައި އެ އެސޯސިއޭޝަނަށް ދައްކަންޖެހޭނެއެވެ. އަދި ޑިސިޕްލިނަރީ ކޮމިޓީގެ މި ނިންމުން އިސްތިއުނާފު ކުރަން ބޭނުންވާނަމަ، އެކަން 3 ދުވަހުގެ ތެރޭގައި އެފްއޭއެމްއަށް އަންގަންޖެހޭނެ ކަމަށްވެސް އެ ބަޔާނުގައި ބަޔާންކޮށްފައިވެއެވެ.

މި ހާދިސާ ހިނގަން މެދުވެރިވީ މެޗުގެ 68 ވަނަ މިނެޓުގައި މާޒިޔާގެ އަބްދުﷲ ލޫތަށް، ނިއުގެ އިބްރާޙީމް މައިސާން ކުރި ފައުލަކާ ގުޅިގެން ރެފްރީ ކަށިގަނޑު ފުމުނު ވަގުތު، ނިއުގެ އަބްދުއްލައި ބިލިޓީ ފޮނުވާލި ބޯޅަ ލޫތުގެ ގައިގައި ޖެހުމުންނެވެ. މިކަމާ ހެދި ބިލިޓީ އާއި ލޫތު ކުރިމަތިލާން ދިޔަ ވަގުތު، ނިއުގެ އީތަން އިބްރާހީމް ޒަކީ، ލޫތުގެ ގައިގައި އަތްއަޅައި ކޮށްޕާލުމުން މާޒިޔާގެ ހަސަން ޝިފާޒް ވެސް ވަނީ އެ ހަމަނުޖެހުމުގެ ތެރެއަށް ވަދެފައެވެ.

މި ހަމަނުޖެހުން ބޮޑުވެ، ދެ ޓީމުގެ އެހެން ކުޅުންތެރިންނާއި އޮފިޝަލުން މައިދާނަށް އަރައި ހަމަނުޖެހުމުގައި ބައިވެރިވުމުގެ ސަބަބުން، މެޗުގެ ކުޅުން ގާތްގަނޑަކަށް 7 މިނެޓަށް މެދުކަނޑާލަން ޖެހުނެވެ. އަދި ސުޒެއިރު ނިއުގެ ކޯޗަށް ހަމަލާދީފައިވަނީ މި ހަމަނުޖެހުންގަނޑުގެ ތެރޭގައެވެ.