ފުޓްސަލް ޒޯން ޗެމްޕިއަންޝިޕް: އެއްވެސް ޕޮއިންޓެއް ނުލިބި އޭދަފުށި ކަޓައިފި

އެފްއޭއެމް ފުޓްސަލް ޒޯން ޗެމްޕިއަންޝިޕް 2026 ގައި ކުޅުނު ދެވަނަ މެޗުން ވެސް ބަލިވެ، އެއްވެސް ޕޮއިންޓެއް ނުލިބި ބ. އޭދަފުށި މުބާރާތުން ކަޓައިފިއެވެ.

މަނަދޫ ފުޓްސަލް ދަނޑުގައި ކުޅުނު މި މެޗުން އޭދަފުށީގެ މައްޗަށް މަގޫދޫން ކުރިހޯދީ 2-1 ގެ ނަތީޖާއަކުންނެވެ.

އެފްއޭއެމް ފުޓްސަލް އަތޮޅު ޗެމްޕިއަންޝިޕްގެ ބ. އަތޮޅު ތަށި ހޯދައިގެން ޒޯން ބުރަށް ކޮލިފައިވި އޭދަފުއްޓަށް، އެ މުބާރާތުގައި ދެއްކި މޮޅު ކުޅުން މި ބުރުގައި ތަކުރާރު ކުރެވޭ ގޮތެއް ނުވިއެވެ. ގްރޫޕް ސްޓޭޖުގައި ކުޅުނު ފުރަތަމަ މެޗުގައި ވެސް ދުވާފަރު އަތުން އެ ޓީމު ވަނީ 2-1 އިން ބަލިވެފައެވެ.

މަގޫދޫއާ ދެކޮޅަށް ކުޅުނު މެޗު ފަށައިގެން ހަތަރުވަނަ މިނެޓުގައި މަގޫދޫގެ މުޙައްމަދު އިޙްސާން ވަނީ ލަނޑެއް ޖަހައި އެ ޓީމަށް ކުރިހޯދައިދީފައެވެ. މި ލަނޑާއެކު އޭދަފުށި ޕްރެޝަރަށް ވެއްޓުނު ނަމަވެސް، ދެވަނަ ހާފު ފަށައިގެން އެ ޓީމުން ވަނީ ކުޅުން ރަނގަޅުކޮށްފައެވެ. އެގޮތުން މެޗުގެ 22 ވަނަ މިނެޓުގައި އަޙްމަދު ބައްސާމް މުޙައްމަދު ނަޢީމް ވަނީ ލަނޑެއް ޖަހައި ނަތީޖާ 1-1 އަށް ހަމަހަމަކޮށްދީފައެވެ.

މެޗުގެ ފަހު ވަގުތާ ހަމައަށް ވެސް ދެ ޓީމުން ލަނޑެއް ޖެހުމަށް ގިނަ މަސައްކަތްތަކެއް ކުރަމުން ދަނިކޮށް، މަގޫދޫން ވަނީ މެޗުގެ 40 ވަނަ މިނެޓުގައި އަލުން ލީޑު ނަގާފައެވެ. މި ލަނޑަކީ އޭދަފުށީގެ ކީޕަރު ކުރިއަށް އަރައި އެޓޭކުގައި ބައިވެރިވެފައި ވަނިކޮށް، ހުސްކޮށް އޮތް ގޯލުގެ ތެރެއަށް ބޯޅަ ފޮނުވާލައިގެން މުޙައްމަދު އައްޒާމް ކާމިޔާބުކުރި ލަނޑެކެވެ.

މި ނަތީޖާއާއެކު، ސެޕްޓެމްބަރު 30 ގައި ދުވާފަރާއި މަގޫދޫ ބައްދަލުކުރާ ގްރޫޕުގެ ފަހު މެޗުގެ ނަތީޖާ ކޮންމެ ގޮތަކަށް ނިކުތް ނަމަވެސް، އޭދަފުއްޓަށް ސެމީ ފައިނަލުން ފުރުސަތެއް ނުލިބޭނެއެވެ. އަދި މި ގްރޫޕުން ސެމީއަށް ދަތުރުކޮށްފައި ވަނީ ދުވާފަރާއި މަގޫދޫއެވެ.