ރަން މެޑައްޔާއެކު ގައުމީ ރާޒުވާ ޓީމު އެނބުރި އަތުވެއްޖެ

އުޒްބަކިސްތާނުގައި ކުރިއަށްދިޔަ 46 ވަނަ ޗެސް އޮލިމްޕިއާޑުގައި ވާދަކޮށް، ރަން މެޑަލް ހޯދި ރާއްޖޭގެ ޤައުމީ އަންހެން ރާޒުވާ ޓީމު އެނބުރި ރާއްޖެ އަތުވެއްޖެއެވެ.

އުޒްބަކިސްތާނުގެ ސަމަރކަންޑް ސްޕޯޓްސް ކޮމްޕްލެކްސްގައި މި މަހުގެ 15 އިން 28 އަށް ކުރިއަށްދިޔަ މި މުބާރާތުގައި ރާއްޖޭގެ އަންހެން ޓީމުން ރަން މެޑަލް ހާސިލުކުރީ ވާދަކުރި "އީ" ކެޓަގަރީންނެވެ. މިއީ މިހާތަނަށް ބައިނަލްއަޤްވާމީ މައިދާނެއްގައި ރާއްޖޭގެ އަންހެން ރާޒުވާ ޓީމަކުން ހޯދި އެންމެ ފުރިހަމަ އަދި އެންމެ ތާރީޚީ ކާމިޔާބީއެވެ.

މި މުބާރާތުގައި ރާއްޖޭގެ އަންހެން ޓީމުން ރަން މެޑަލް ހޯދުމުގެ އިތުރުން، ޤައުމީ ޓީމުގެ ދެ ކުޅުންތެރިޔަކު ވަނީ ފާހަގަކޮށްލެވޭ ފަދަ އަމިއްލަ ކާމިޔާބީތަކެއްވެސް ހޯދާފައެވެ. އެގޮތުން، މަރްޔަމް ލައިސާ ޢަބްދުއްރަޝީދުގެ އިތުރުން، އުމުރުން އެންމެ 14 އަހަރުގެ އީނާ ޢަބްދުﷲ ޙަސަން ވަނީ މި މުބާރާތުން ވުމަން ކެންޑިޑޭޓް މާސްޓަރ (ޑަބްލިއުސީއެމް) ޓައިޓްލް ހާސިލުކޮށްފައެވެ.

ރާއްޖެއަށް ރަން މެޑަލް ހޯދައިދިން ޤައުމީ އަންހެން ޓީމުގައި ހިމެނެނީ ރާއްޖޭގެ އެއްވަނަ އަންހެން ކުޅުންތެރިޔާ ނިހާޔާ އަޙްމަދު، އީނާ ޢަބްދުﷲ ޙަސަން، މަރްޔަމް ލައިސާ ޢަބްދުއްރަޝީދު، ޢާއިޝަތު އަލްޔާ މުޙައްމަދު ޝަރީފް އަދި ޢާއިޝަތު ނޯޔާ ޝަހުރުއްދީން އަފީފެވެ.

މި މުބާރާތުގައި ދުނިޔޭގެ އެކި ކަންކޮޅުތަކުން 37 ޤައުމަކާ ވާދަކުރަން ޖެހުނުއިރު، މިއީ ވަރަށް ވަރުގަދަ އަދި އުނދަގޫ މެޗުތަކެއް ކުޅެން ޖެހުނު މުބާރާތެއް ކަމަށް ޓީމުގެ ތަޖުރިބާކާރު ކުޅުންތެރިޔާ ނިހާޔާ އަޙްމަދު ވަނީ ފާހަގަކޮށްފައެވެ. ނަމަވެސް، ކުޅުންތެރިންގެ ހިތްވަރާއި އެއްބައިވަންތަކަމާއެކު ރާއްޖެއަށް މިވަނީ ރަން ވަނައެއް ހޯދައިދެވިފައިކަމަށް އޭނާ ވަނީ ފާހަގަކޮށްފައެވެ.