ހިންނަވަރުން ތުޅާދޫ ބަލިކޮށް ސެމީގެ ޖާގައެއް ހޯދައިފި

އެފްއޭއެމް ފުޓްސަލް ޒޯން ޗެމްޕިއަންޝިޕް 2026 ގެ ނޯތު ޒޯން 2 ގެ ގްރޫޕް ސްޓޭޖުގެ ފަހު މެޗުގައި، ތުޅާދޫ ބަލިކޮށް ހިންނަވަރުން ސެމީ ފައިނަލުގެ ޖާގައެއް ކަށަވަރުކޮށްފިއެވެ.

ޅ. އަތޮޅުގެ ޗެމްޕިއަން ހިންނަވަރާއި ބ. އަތޮޅުގެ ރަނަރަޕް ތުޅާދޫ މި މެޗާ ކުރިމަތިލިއިރު ދެ ޓީމަށްވެސް އޮތީ ތިން ޕޮއިންޓް ލިބިފައެވެ. ނަމަވެސް، ލަނޑުގެ ތަފާތުން ތުޅާދޫ ކުރީގައި އޮތުމުން ސެމީއަށް ދިއުމަށް އެ ޓީމަށް އެއްވަރުކޮށްލައިގެން ވެސް ފުދެއެވެ. އެހެންކަމުން މުބާރާތުގައި ކުރިއަށް ދިއުމަށް ހިންނަވަރަށް މަޖުބޫރުވެފައި އޮތީ މޮޅެއް ހޯދުމަށެވެ.

މެޗު ފެށިގެން ފުރަތަމަ މިނެޓުގެ ތެރޭގައި ހިންނަވަރުން ވަނީ ލަނޑެއް ޖަހައި ލީޑު ނަގާފައެވެ. މި ލަނޑަކީ ހުސައިން ފައިސަލް ގޯލު ކުރިމައްޗަށް ހުރަސްކޮށްލި ބޯޅައަކުން އިބްރާހީމް ސިމާހު ކާމިޔާބުކޮށްދިން ލަނޑެކެވެ. އެހެންނަމަވެސް، މެޗުގެ 12 ވަނަ މިނެޓުގައި ހައްޔާން ހަސަން ވަނީ ލަނޑެއް ޖަހައި ތުޅާދޫއަށް ނަތީޖާ ހަމަހަމަކޮށްދީފައެވެ. މިއީ މި މުބާރާތުގައި އޭނާ ކާމިޔާބުކުރި ފަސްވަނަ ލަނޑެވެ.

ތުޅާދޫގެ ލަނޑަށްފަހު މިނެޓެއްވެސް ނުވަނީސް، ހިންނަވަރުގެ އީރާން ކުޅުންތެރިޔާ މިނޫއީ އަބޮލްފަޒްލް ވަނީ ބާރު ހަމަލާއަކުން ގޯލެއް ޖަހައި އަލުން ހިންނަވަރަށް ލީޑު ހޯދައިދީފައެވެ. އެހެންނަމަވެސް، ފުރަތަމަ ހާފުގެ އެންމެ ފަހު މިނެޓުގައި ހައްޔާން ވަނީ އޭނާގެ ދެވަނަ ލަނޑު ޖަހައި އަނެއްކާވެސް މެޗުގެ ނަތީޖާ 2-2 އަށް ބަދަލުކޮށްފައެވެ.

ދެވަނަ ހާފުގައި ފެނިގެންދިޔައީ މޮޅުވާން ހިންނަވަރުން ކުރި މަސައްކަތެވެ. ހިންނަވަރަށް އެކަން ކާމިޔާބު ކުރެވުނީ މެޗު ނިމެން ކުޑަތަންވެފައި ވަނިކޮށެވެ. އެގޮތުން 3-2 ގެ ނަތީޖާއަކުން ހިންނަވަރު މޮޅުވެ ސެމީއަށް ދިޔައިރު، ތުޅާދޫ ވަނީ މުބާރާތުން ކަޓާފައެވެ.

މި ޒޯނުގައި ކުރިން ކުޅުނު މެޗުގައި އިނގުރައިދޫން ވަނީ މަނަދޫގެ މައްޗަށް 6-3 އިން ކުރިހޯދައި ގްރޫޕް އޭ ގެ އެއްވަނަ ހޯދާފައެވެ. އަދި ގްރޫޕް ބީ އިން ދުވާފަރާއި މަގޫދޫ ވަނީ މިހާރުވެސް ސެމީގެ ޖާގަ ކަށަވަރުކޮށްފައެވެ. އެ ގްރޫޕުގެ އެއްވަނަ ޓީމު ކަނޑައެޅޭނީ ބުދަ ދުވަހު މި ދެ ޓީމު ބައްދަލުކުރާ މެޗަށްފަހުގައެވެ.