ވާޖިބު އަދާކުރަނިކޮށް ނިޔާވާ ފުލުހުންގެ އާއިލާތަކަށް ބޭސްފަރުވާ ދެނީ

ވާޖިބު އަދާކުރަމުން ދަނިކޮށް ނިޔާވާ ފުލުހުންގެ އާއިލާއަށްވެސް ފުލުހުންގެ ޚިދުމަތުން ބޭސްފަރުވާކޮށްދޭ ގޮތަށް ފުލުހުންގެ ވަޒީފާގެ ޤަވާއިދު އިސްލާހުކޮށްފިއެވެ.

ފުލުހުންގެ ވަޒީފާގެ ގަވާއިދަށް ގެނައި މި އިސްލާހުގައިވާ ގޮތުން ޚިދުމަތުގައި ދެމިތިބޭ ފުލުހުންގެ އާއިލާތަކަށް ލިބިދޭ އުސޫލުން ވާޖިބު އަދާކުރަމުން ދަނިކޮށް ނިޔާވާ އޮފިސަރުންގެ އާއިލާތަކަށް ވެސް ބޭސްފަރުވާގެ ޚިދުމަތް ލިބިދޭންޖެހެއެވެ. އަދި މިފަދަ ހާދިސާތަކުގައި ނިޔާވާ ފުލުހުންގެ ޖަނާޒާގެ ކަންކަން ރަސްމީ އިއްޒަތުގައި ހާއްސަ ރަސްމިއްޔާތެއްގެ ގޮތުގައި ކުރިއަށްގެންދިއުމުގެ އިހުތިޔާރު ވެސް ގަވާއިދަށް ވަނީ އިތުރުކޮށްފައެވެ.

އެހެން ނަމަވެސް ޖަނާޒާގެ ކަންކަން މިގޮތަށް ކުރިއަށްގެންދަން ނިންމާނީ އެ އޮފިސަރަކު ނިޔާވި ހާލަތާއި، ހާދިސާ ހިނގައިދިޔަ ގޮތުގެ އިތުރުން މުވައްޒަފު އަދާކުރި ދައުރަށް ރިއާޔަތްކޮށް އެގްޒެކެޓިވް މެނޭޖްމަންޓް ބޯޑަށް ހުށަހަޅައި، އެ ބޯޑުން ނިންމާ ނިންމުމެއްގެ މައްޗަށް ބިނާކޮށް ކަމަށް އެ އިސްލާހުގައި ވަނީ ބަޔާންކޮށްފައެވެ.

ވާޖިބު އަދާކުރުމުގައި ނިޔާވާ ފުލުހުންގެ ޢާއިލާތަކަށް ބޭސްފަރުވާ ހަމަޖައްސައިދިނުމުގެ އިތުރުން، ޝަރަފުވެރިކަމާއެކު ރިޓަޔަރ ކުރާ ފުލުހުންގެ އިނާޔަތްތަކަށް ހެޔޮ ބަދަލުތަކެއް ގެންނަން ނިންމަވާފައިވާކަން ކޮމިޝަނަރ އޮފް ޕޮލިސް އަހުމަދު މުޙައްމަދު ވަނީ އިއުލާނުކުރައްވާފައެވެ.

ދިވެހި ފުލުހުންގެ ޚިދުމަތުގެ 93 ވަނަ އަހަރީ ދުވަހުގެ ރަސްމިއްޔާތުގައި ވާހަކަދައްކަވަމުން ކޮމިޝަނަރ ވިދާޅުވީ، ޝަރަފުވެރިކަމާއެކު ރިޓަޔަރކުރާ ފަރާތްތަކަށް އިނާޔަތް ކަނޑައެޅުމުގައި މިހާރު އޮތް ލިމިޓް އުވާލައި، އެ އޮފިސަރަކު ޚިދުމަތްކުރެއްވި މުއްދަތަށް ބަލައި އިނާޔަތް ހަމަޖައްސައިދިނުމަށް ނިންމާފައިވާ ކަމަށެވެ.

25 އަހަރަށްވުރެ ދިގު މުއްދަތަކަށް ޚިދުމަތްކުރެއްވުމަށްފަހު ރިޓަޔަރކުރައްވާ ފުލުހުންނަށް ޚިދުމަތުގައި ދެމިތިބޭ ފުލުހުންނެކޭ އެއްފަދައިން ބޭސްފަރުވާގެ ޚިދުމަތް ދިނުމަށް ނިންމާފައިވާކަން  ސީޕީ ފާހަގަކުރެއްވިއެވެ.