އަތޮޅުތެރޭގައި ޓާޝަރީ ފެންވަރަށް ތަރައްގީކުރާ ހޮސްޕިޓަލުތަކުގެ މަސައްކަތް ދަނީ ޕްލޭނާ އެއްގޮތަށް: ވަޒީރު ގީލާ

ރާއްޖޭގެ އެކި ސަރަޙައްދުތަކުގައި ހުރި ރީޖަނަލް ހޮސްޕިޓަލުތައް ޓާޝަރީ ފެންވަރަށް ތަރައްޤީކޮށް، އަތޮޅުތެރޭގައި ފެންވަރު ރަނގަޅު ޞިއްޙީ ޚިދުމަތްތައް ފުޅާކުރުމަށް އެކުލަވާލާފައިވާ ޚާއްޞަ ޕްލޭނާ އެއްގޮތަށް ޢަމަލީ މަސައްކަތްތައް ބާރުދުވެލީގައި ކުރިއަށްދާ ކަމަށް ސިއްހަތާއި އާއިލާއާއި އިޖުތިމާއީ އެހީއާ ބެހޭ ވަޒީރު ޤީލާ ޢަލީ ވިދާޅުވެއްޖެއެވެ.

 އެކަމަނާ މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.

ޞިއްޙީ ފަރުވާއަށްޓަކައި ރައްޔިތުން މާލެއަށް ބަރޯސާވާންޖެހޭ މިންވަރު ކުޑަކޮށް، ރައްޔިތުން ދިރިއުޅޭ ސަރަޙައްދުން އެންމެ މަތީ ފެންވަރުގެ ޞިއްޙީ ޚިދުމަތް ކަށަވަރު ކޮށްދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްޞަ އަހައްމިއްޔަތުކަމެއް ދެއްވާ މުހިންމު ތަޞައްވަރެކެވެ. މި ތަޞައްވަރު ހާސިލުކުރުމަށްޓަކައި އަތޮޅުތަކުގެ މައި ހޮސްޕިޓަލުތަކުގެ ޚިދުމަތްތައް އަންނަނީ އިތުރަށް ފުޅާކުރަމުންނެވެ.

މިގޮތުން ކުރެވެމުންދާ މަސައްކަތްތަކުގެ ތަފްޞީލު ހާމަކުރައްވަމުން ވަޒީރު ވިދާޅުވީ، ކުޅުދުއްފުށީ ރީޖަނަލް ހޮސްޕިޓަލުގައި މިހާރުވެސް ޕަލްމޮނޮލޮޖީ، ނިއުރޮލޮޖީ، ޔޫރޮލޮޖީ، ނެފްރޮލޮޖީ އަދި ކާޑިއޮލޮޖީގެ ޚިދުމަތް ދެމުންދާ ކަމަށެވެ. މީގެއިތުރުން، ޑައިލިސިސް ޚިދުމަތް 4 އެނދުން 10 އެނދަށް އިތުރުކޮށް، އީއާރުގެ ޚިދުމަތް ފުޅާކޮށްފައިވާއިރު، އައިސޮލޭޝަން އިމާރާތުގެ މަސައްކަތް މިއަހަރުގެ ނިޔަލަށް ނިންމުމަށް ދަނީ މަސައްކަތް ކުރަމުންނެވެ. އަދި ހޮސްޕިޓަލް ޓާޝަރީ ފެންވަރަށް ގެނައުމަށް އަޅާ އައު އިމާރާތުގެ މަސައްކަތް މިހާރު ވަނީ އެމްޓީސީސީއާ ޙަވާލުކޮށްފައެވެ.

އުނގޫފާރު ރީޖަނަލް ހޮސްޕިޓަލުގައި އަލަށް އެމްއާރުއައި، ނިއުރޮލޮޖީ، ނެފްރޮލޮޖީ، ޕަލްމޮނޮލޮޖީ، ކީމޯތެރަޕީ، އޮކިއުޕޭޝަނަލް ތެރަޕީ، ސްޕީޗް ތެރަޕީގެ އިތުރުން ތިއޭޓަރުތައް އަޕްގްރޭޑްކޮށް ލެޕަރޮސްކޯޕިކް ސާޖަރީތައް ކާމިޔާބުކަމާއެކު ކުރަމުންދާކަން ވަޒީރު ފާހަގަކުރެއްވިއެވެ. އަދި ޑެންޓަލް ޑިޕާޓްމަންޓަކާއި ބްލަޑް ބޭންކެއް ހުޅުވާފައިވާއިރު، އައިޔޫއައިގެ ޚިދުމަތް ފެށުމުގެ މަސައްކަތްވެސް ދަނީ ކުރެވެމުންނެވެ.

ލ.ގަން ހޮސްޕިޓަލުގައި ކާޑިއޮލޮޖީގެ ޚިދުމަތް ދެމުން އަންނައިރު، އިތުރަށް ބޭނުންވާ މެޝިނަރީ ހޯދުމުގެ ބިޑިންގ މަރުޙަލާ ކުރިއަށްދާ ކަމަށާއި، އެމްއާރުއައި އިމާރާތުގެ މަސައްކަތް އަންނަ އަހަރުގެ ފެބްރުއަރީގެ ނިޔަލަށް ނިންމާލެވޭނެ ކަމަށް ވަޒީރު ވިދާޅުވިއެވެ. ހަމައެއާއެކު، ޑރ. ޢަބްދުއްސަމަދު މެމޯރިއަލް ހޮސްޕިޓަލުގައި މުޅިން އަލަށް ކާޑިއޮލޮޖީ އަދި ނެފްރޮލޮޖީގެ ޚިދުމަތް ދެމުން އަންނައިރު، ފުވައްމުލައް ހޮސްޕިޓަލު ފިޔަވަހިތަކަކަށް ބަހާލައިގެން ޓާޝަރީ ފެންވަރަށް ތަރައްޤީ ކުރުމުގެ ޕްލޭނާއި ބަޖެޓް އެކުލަވާލުމުގެ މަސައްކަތް ކުރަމުންދާކަން ވަޒީރު ހާމަކުރެއްވިއެވެ.

ޑައިލިސިސްގެ ޚިދުމަތް ފަށަނީ އެ ސަރަޙައްދެއްގައި ބަލި މީހުން ތިބި ނިސްބަތަށް ބެލުމަށްފަހު. ވީހާވެސް ބޮޑަށް ބަލަނީ އެޓްލީސްޓް ބަލި ތިން މީހުން ތިބިނަމަ. ވަރަށް ބޮޑަށް ދިރާސާ ކުރަމުންދޭ މާލެއިންތޯ ޑައިލިސިސް ހަދާނީ ނޫނީ އަތޮޅުންތޯ.

ވަޒީރު ޤީލާ ވިދާޅުވިއެވެ.

ސިއްޙީ ދާއިރާއިން ކޮށްފައިވާ މަސައްކަތްތަކަށް އަލިއަޅުވާލައްވަމުން ވަޒީރު ވިދާޅުވީ، ސިއްޙީ ދާއިރާއިން ވެފައިވާ 478 ވަޢުދުގެ ތެރެއިން %67 ވަޢުދު މިހާރުވެސް ހާސިލުވެފައިވާ ކަމަށެވެ. އަދި މި ދާއިރާގެ ކުރިއެރުމަށް ސަރުކާރުން 244 ނިންމެވުން ނިންމަވާފައިވާއިރު، 835 މަޝްރޫޢެއްގެ މަސައްކަތް އެކި މަރުހަލާތަކުގައި ކުރިއަށްދާ ކަމަށާއި، މި ސަރުކާރުން މިހާތަނަށް 5.98 ބިލިއަން ރުފިޔާގެ މަޝްރޫޢު ސިއްޙީ ދާއިރާއިން ކުރިއަށްގެންދާ ކަމަށް އެކަމަނާ ވިދާޅުވިއެވެ.