އެމްޕީއެލްއާ ހިސާބުން ފެށިގެން އުޅަނދުތައް ނެގުމަށް އަންގައިފި

މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ ބޮޑު މަޝްރޫޢުގެ ދަށުން، ސުނާމީ ބިނާއިން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަމައަށް މަގު ހެދުމުގެ ޢަމަލީ މަސައްކަތް ފެށުމަށްޓަކައި އެ ސަރަޙައްދުގައި ހުރި އުޅަނދުފަހަރު ނެގުމަށް ކ މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓްއިން އަންގައިފިއެވެ.

އެ މިނިސްޓްރީން ކޮށްފައިވާ އިޢުލާނެއްގައި ބަޔާންކޮށްފައިވާ ގޮތުގައި، މި މަޝްރޫޢުގެ މަސައްކަތް ކުރިއަށް ގެންދިއުމަށްޓަކައި މަގު ސާފުކުރުމުގެ ގޮތުން، ސުނާމީ ބިނާއިން ފެށިގެން އެމްޕީއެލްއާ ދެމެދު ބޮޑުތަކުރުފާނު މަގުގައި ބަހައްޓާފައިވާ އެންމެހައި ތަކެއްޗާއި، ސުނާމީ ބިނާ ސަރަޙައްދުގައި އަޅާފައިވާ އެންމެހައި އުޅަނދުފަހަރުތައް ނަގަން ޖެހެއެވެ.

އެހެންކަމުން، މި ތަކެއްޗާއި އުޅަނދުފަހަރުތަކުގެ ވެރިފަރާތްތަކުން، 03 އޮކްޓޫބަރު 2026 ވާ ހޮނިހިރު ދުވަހުގެ ރޭގަނޑު 11:00 ގެ ކުރިން އެ ތަކެތި ނަގައި އެ ސަރަޙައްދު ހުސްކުރުމަށް ވަނީ އަންގާފައެވެ.

މީގެއިތުރުން، ދީފައިވާ މުއްދަތުގެ ފަހުން މަގުމަތީގައި ނުނަގައި ހުންނަ ތަކެއްޗާއި، ސުނާމީ ބިނާ ސަރަޙައްދުގައި އަޅާފައި ހުންނަ އުޅަނދުފަހަރުތައް މިނިސްޓްރީގެ ފަރާތުން ނަގަމުން ގެންދާނެ ކަމަށްވެސް އެ އިޢުލާނުގައި ވަނީ ހާމަކޮށްފައެވެ.

މާލޭގެ މަގުތައް ޒަމާނީ ފެންވަރަށް ތަރައްޤީކޮށް، ދަތުރުފަތުރަށް ލުއިފަސޭހަ ކުރުމަށްޓަކައި ސަރުކާރުން އަންނަނީ މުހިންމު ގިނަ މަސައްކަތްތަކެއް ކުރަމުންނެވެ.

އެގޮތުން އެންމެ ފަހުން ބޮޑުތަކުރުފާނު މަގުން ތަރައްގީ ކުރެވުނު ބަޔާއެކު، އާންމު ދަތުރުފަތުރުތަކަށް ވަނީ ބޮޑު ލުޔެއް ލިބިފައެވެ.