ޗައިނާއަކީ ރާއްޖޭގެ ތަރައްގީގެ ދަތުރުގައި ސާބިތުކަމާއެކު ދެމިއޮތް ބައިވެރިއެއް: ރައީސް

ޗައިނާއަކީ ދިވެހިރާއްޖޭގެ ތަރައްގީގެ ދަތުރުގައި ސާބިތުކަމާއެކު ދެމިއޮތް ބައިވެރިއެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިފަދައިން ވިދާޅުވީ،  ޗައިނާގެ ޤައުމީ ދުވަހުގެ މުނާސަބަތުގައި ފޮނުއްވެވި ތަހުނިޔާގެ މެސެޖުގައެވެ.

މި މެސެޖުގައި ރައީސުލްޖުމްހޫރިއްޔާ ވަނީ، ޗައިނާގެ ރައީސް ޝީ ޖިންޕިންގ އަށާއި، ޗައިނާގެ ސަރުކާރަށާއި ރައްޔިތުންނަށް އިޚްލާޞްތެރިކަމާއެކު ތަހުނިޔާއާއި ހެޔޮއެދުންތައް އަރިސްކުރައްވާފައެވެ.

ރައީސުލްޖުމްހޫރިއްޔާ ވިދާޅުވީ، ރާއްޖެއާއި ޗައިނާއާ ދެމެދު އޮތް އެކުވެރިކަމަކީ، ދެ ފަރާތުގެ މެދުގައިވާ އިޙްތިރާމާއި، އިތުބާރާއި، ތަރައްޤީއާއި ފާގަތިކަމާއި މެދު އޮތް އެއްގޮތް ތަޞައްވުރުގެ މައްޗަށް ބިނާވެފައިވާ އެކުވެރިކަމެއް ކަމަށެވެ. އަދި ޗައިނާއަކީ، ރާއްޖޭގެ ތަރައްގީގެ ދަތުރުގައި ސާބިތުކަމާއެކު ދެމިއޮތް ބައިވެރިއެއްކަން ރައީސް ފާހަގަކުރެއްވިއެވެ.

ރައީސުލްޖުމްހޫރިއްޔާ ވަނީ ދެ ގައުމުގެ ގުޅުމުގެ ސަބަބުން ރާއްޖޭގެ ރައްޔިތުންނަށް މުހިންމު ފުރުޞަތުތަކެއް މެދުކެނޑުމެއްނެތި ފަހިވަމުންދާކަން ފާހަގަކުރައްވާފައެވެ.

އަދި މުސްތަގުބަލުގައި ދެ ގައުމުގެ ދެމެދުގައިވާ "ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނަރޝިޕް" އިތުރަށް ބަދަހިކޮށް، ގުޅުން އައު އުސްމިންތަކަކަށް ގެންދިއުމަށް ކުރެވޭ މަސައްކަތްތަކުގައި ސާބިތުކަމާއެކު ދެމިތިއްބަވާނެކަމުގެ ޔަގީންކަން ރައީސް ދެއްވެވިއެވެ.

މީގެ އިތުރުން ރައީސް މުޢިއްޒު ވަނީ، އުންމީދަކީ ދެ ގައުމުގެ ރައްޔިތުންގެ މެދުގައިވާ އެކުވެރިކަން ދުވަހުން ދުވަހަށް އިތުރަށް ބަދަހިވެގެންދިއުންކަން ފާހަގަކުރައްވާ، ޗައިނާއަށް އިތުރު ފާގަތިކަމާއި ކުރިއެރުމަށް އެދޭ ކަމަށް ވެސް ވިދާޅުވެފައެވެ.

On the 77th Anniversary of the Founding of the People’s Republic of China, I extend my warmest felicitations and best wishes to President Xi Jinping, the Government and the people of China.

The Maldives and China share a deep and enduring friendship, founded on mutual respect,…

— Dr Mohamed Muizzu (@MMuizzu) October 1, 2026

ރާއްޖެއާއި ޗައިނާއާ ދެޤައުމުގެ ދެމެދު ސިޔާސީ ގުޅުން ޤާއިމްކޮށްފައިވަނީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހުއެވެ. މިއަހަރު އެގުޅުމަށް 54 އަހަރު ފުރިގެންދާއިރު، ޗައިނާއަކީ ރާއްޖޭގެ ތަރައްގީގެ ދަތުރުގައި އެންމެ މުހިންމު ދައުރެއް އަދާކުރާ އެއް ގައުމެވެ.