އެޗްއާރްސީއެމްގެ މެންބަރުކަމުގެ މަގާމަށް ޝަމްޢޫން އައްޔަންކުރައްވައިފި

އިންސާނީ ހައްޤުތަކާ ބެހޭ ޤައުމީ ކޮމިޝަން (އެޗްއާރްސީއެމް) ގެ މެންބަރުކަމުގެ މަގާމަށް ހ. މީނާޒް، ޝަމްޢޫން ޙަމީދު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އައްޔަންކުރައްވައިފިއެވެ. މި މަޤާމަށް ޝަމްޢޫން އައްޔަންކުރެއްވީ މިއަދު ހެނދުނު ރައީސް އޮފީހުގައި ބޭއްވި ހާއްސަ ރަސްމިއްޔާތެއްގައެވެ.

މި ރަސްމިއްޔާތުގައި އޭނާއަށް މަގާމުގެ ފަތްކޮޅު ރައީސް އަރުވާފައިވާއިރު، މެންބަރުކަމުގެ ގާނޫނީ ހުވާ ލައިދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ޑރ. މުޙައްމަދު އިބްރާހީމްގެ ކުރިފުޅުމަތީގައެވެ.

މީގެކުރިން ވެސް އެޗްއާރްސީއެމްގައި އިސް ދައުރުތަކެއް އަދާކުރައްވާފައިވާ ޝަމްޢޫން ވަނީ 2012 އިން 2016 އަށް އެ މުއައްސަސާގެ ސެކްރެޓަރީ ޖެނެރަލްގެ މަގާމު އަދާކުރައްވާފައެވެ. އަދި އޭގެ ކުރިން 2010 އިން 2012 އަށް އޭނާ ހުންނެވީ ކޮމިޝަނުގެ ތަހުގީގުތަކާ ބެހޭ ޑިޕާޓްމަންޓުގެ ޑިރެކްޓަރުގެ ގޮތުގައެވެ. ހަމައެހެންމެ، އޭނާއަކީ ޔޫޕީއާރް ރިޕޯޓު އެކުލަވާލުމުގައި ފޯކަލް ޕޮއިންޓުގެ ގޮތުގައި ހަރަކާތްތެރިވެ، ކުޑަކުދިންގެ ޙައްޤުތަކާއި ނުކުޅެދުންތެރިކަން ހުންނަ ފަރާތްތަކުގެ ތަޢުލީމީ ފުރުސަތުތައް ދެނެގަތުމަށް ހެދި ޤައުމީ ދިރާސާތަކުގައި އިސްކޮށް މަސައްކަތްކުރައްވާފައިވާ ބޭފުޅެކެވެ.

އިންސާނީ ޙައްގުތަކުގެ ދާއިރާއިން ފުޅާ ތަޖުރިބާތަކެއް ހާސިލުކުރައްވާފައިވާ ޝަމްޢޫން، އެންމެ ފަހުން ހުންނެވީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ޕާމަނަންޓް ސެކްރެޓަރީގެ މަޤާމުގައެވެ.