ރައީސް ޑރ. މުއިއްޒު ގިނަ ވަގުތު ހޭދަކުރެއްވީ ތަރައްގީގެ މަޝްރޫއުތަކުގެ އަދާހަމަ އަމިއްލަފުޅަށް ބެއްލެވުމުގައި: ސައީދު

ދިވެހިރާއްޖޭގެ އެކި ކަންކޮޅުތަކުގައި ކުރިއަށްދާ ތަރައްގީގެ މަޝްރޫއުތަކުގެ މަސައްކަތްތައް އަވަސްކުރުމަށްޓަކައި ސަރުކާރުން ބޭއްވި ހާއްސަ ބައްދަލުވުމުގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގިނަ ވަގުތު ހޭދަކުރެއްވީ އެ މަޝްރޫއުތަކުގެ އެންމެ ފަހުގެ ހާލަތު އަމިއްލަފުޅަށް ބައްލަވައި ވަޒަންކުރެއްވުމުގައި ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވުނު މި ބައްދަލުވުމުގައި ވަޒީރުންގެ މަޖިލީހުގެ މެންބަރުންގެ އިތުރުން ސަރުކާރު ހިއްސާވާ ކުންފުނިތަކުގެ މެނޭޖިން ޑިރެކްޓަރުންނާއި ޑެޕިއުޓީ މެނޭޖިން ޑިރެކްޓަރުން ބައިވެރިވެވަޑައިގެންނެވިއެވެ. މި ބައްދަލުވުމުގެ މައިގަނޑު ބޭނުމަކީ ރާއްޖޭގެ ހުރިހާ ރަށެއްގައި ހިނގަމުންދާ ތަރައްގީގެ މަސައްކަތްތަކާއި ރިޔާސީ ވައުދުތަކުގެ އަދާހަމަ މައުލޫމާތު ހިއްސާކޮށް، މަޝްރޫއުތަކުގެ ދުވެލި ހަލުވިކުރުމަށް ފުޅާ ދާއިރާއެއްގައި މަޝްވަރާކުރުމެވެ.

މި ބައްދަލުވުމާ ގުޅޭގޮތުން މިނިސްޓަރު ސައީދު ސޯޝަލް މީޑިއާ ޕްލެޓްފޯމް "އެކްސް" ގައި ކުރެއްވި ޕޯސްޓެއްގައި ވިދާޅުވީ، ރައްޔިތުންނަށް ވެވަޑައިގެންނެވި ހުރިހާ ވައުދުފުޅުތަކެއް އެއް ފޮތަކަށް އެއްކުރައްވައި، ހާމަކަމާއި ތެދުވެރިކަމާއެކު ޝާއިއުކުރެއްވި ފުރަތަމަ ވެރިޔަކީ ރައީސް ޑރ. މުއިއްޒު ކަމަށެވެ. އަދި އެއީ އެ ވައުދުތައް ފުއްދެވުމުގެ ހެޔޮ ނިޔަތުގައި ކުރެއްވި ކަމެއްކަން މިނިސްޓަރު ފާހަގަކުރެއްވިއެވެ.

ރައްޔިތުންނަށް ވެވަޑައިގަތް ހުރިހާ ވަޢުދެއް ފޮތަކަށް އެއްކުރައްވާ ޝާއިޢުކުރައްވަން ކެރިވަޑައިގަތް ފުރަތަމަ ރައީސަކީ، ރައީސް ޑރ. މުޙައްމަދު މުޢިއްޒު. އެކަން ކުރެއްވީވެސް ނުހަނު ހާމަކަމާއި ތެދުވެރިކަމާއެކު އެ ވަޢުދުތައް ފުއްދެވުމުގެ ހެޔޮ ނިޔަތުގައި. މިއަދުގެ ވަރަށް ގިނަ ވަގުތުވެސް ޚާއްޞަކުރެއްވީ ހަމަ މިކަމަށް. ކޮންމެ މަޝްރޫޢެއްގެ އަދާހަމަ އަމިއްލަފުޅަށް ބެއްލެވި. ކަންކަން ނިމެމުންދާ ވަރު ވަޒަންކުރެއްވި. ދައްޗެއް އޮތް ނަމަ ޙައްލު ހޯއްދަވަން ސީދާ ރައީސް އިސްނެންގެވި. ކޮންމެ ވަޢުދަކާ ގުޅޭ މަސައްކަތްތަކުގައިވެސް ޝާމިލްވާ ހުރިހާ ޒިންމާދާރު ފަރާތަކާ އެއް ޙާޒިރުގައި، ރައްޔިތުންނަށް ކޮށްދެއްވަން ހުރި ކަންކަމަށް އެންމެ އިސްކަން ދެއްވައިގެން ވަގުތު އެ ޚާއްޞަކުރައްވަނީ، އިޚްލާޞްތެރިކަމާއެކު ޤައުމަށް ޚިދުމަތްކުރެއްވުމަށް ރައީސް ޑރ މުޙައްމަދު މުޢިއްޒު ހިތްޕުޅުގައި އޮތް ޝައުޤާއި ސަމާލުކަމުގެ ބޮޑުކަމުން. މިއީ ވެރިކަންކުރާ ޕާޓީއަށްވެސް ލިބިގެންދާ ވަރަށްބޮޑު ހިތްހަމަޖެހުމެއް.

— Mohamed Saeed (@em_saeed) October 6, 2026

މީގެއިތުރުން މިނިސްޓަރު ސައީދު ވިދާޅުވީ، މަޝްރޫއުތަކާ ގުޅޭ ބައްދަލުވުމުގެ ގިނަ ވަގުތުތައް ރައީސް ހާއްސަކުރެއްވީ ކޮންމެ މަޝްރޫއެއްގެ އަދާހަމަ އަމިއްލަފުޅަށް ބެއްލެވުމަށާއި، ކަންކަން ނިމެމުންދާ މިންވަރު ދެނެގަތުމަށް ކަމަށެވެ. އަދި މަސައްކަތްތަކަށް ދިމާވާ ދަތިތަކަށް ހައްލު ހޯއްދަވައިދެއްވުމަށް ސީދާ ރައީސް އިސްނެންގެވި ކަމަށްވެސް އޭނާ ވިދާޅުވިއެވެ.

ޒިންމާދާރު ހުރިހާ ފަރާތްތަކަކާ އެކު އެއް މޭޒެއްގައި އިސްކަންދެއްވައިގެން ރައީސް ވަގުތު ހޭދަކުރެއްވުމަކީ ގައުމަށް ހިދުމަތް ކުރެއްވުމަށް އެމަނިކުފާނުގެ ހިތްޕުޅުގައި އޮތް އިހްލާސްތެރިކަމާއި ޝައުގުވެރިކަން ހާމަވާ ކަމެއް ކަމަށާއި، މިއީ ވެރިކަންކުރާ ޕާޓީއަށް ވެސް ލިބޭ ވަރަށް ބޮޑު ހިތްހަމަޖެހުމެއް ކަމަށް މިނިސްޓަރު ސައީދު ވަނީ ފާހަގަކުރައްވާފައެވެ.