ޕާކިސްތާނުން ދެންނެވި ހޫނު މަރުޙަބާއަކީ ލިބުނު ބޮޑު ޝަރަފެއްކަމަށް ރައީސް ވިދާޅުވެއްޖެ

ޕާކިސްތާނަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގައި އެ ޤައުމުން ވިދާޅުވި ހޫނު މަރުޚަބާއަކީ ލިބިވަޑައިގެންނެވި ވަރަށް ބޮޑު ޝަރަފެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އަނބިކަނބަލުންނާއި ދިވެހި ސަރުކާރުގެ މަތީ ފަންތީގެ ވަފުދަކާއެކު ޕާކިސްތާނުގެ ވެރިރަށް އިސްލާމްއާބާދަށް ވަޑައިގެންނެވުމަށްފަހު އެމަނިކުފާނު ވިދާޅުވީ، ޕާކިސްތާނަށް ކުރައްވާ ފުރަތަމަ ފުރަމާނަ ދަތުރުފުޅުގައި އެ ޤައުމަށް ވަޑައިގެންނެވުމުން ވަރަށް ބޮޑު އުފަލަކާއި ޝަރަފެއް އިހުސާސް ކުރެއްވޭ ކަމަށެވެ.

އަދި އެމަނިކުފާނުގެ ދެކަނބަލުންނަށާއި ވަފުދުގެ ބޭފުޅުންނަށް ޕާކިސްތާނުގެ ސަރުކާރާއި އަޚުވަންތަ ރައްޔިތުންގެ ފަރާތުން ދެންނެވި ޚާއްޞަ، ޝަރަފުވެރި ރަސްމީ މަރުޙަބާއަށާއި އަދާކުރެއްވި މެހެމާންދާރީއަށްޓަކައި އިޚްލާޞްތެރިކަމާއެކު ޝުކުރު އަދާކުރައްވާ ކަމަށް ރައީސް ވިދާޅުވިއެވެ.

I am honoured to arrive in Islamabad for my first State Visit to the Islamic Republic of Pakistan, accompanied by my wife and delegation. I extend my sincere appreciation to the Government and the brotherly people of Pakistan for the exceptional warmth and distinguished ceremonial welcome accorded to us. I look forward to fruitful engagements that will further deepen our bilateral relations, strengthen our partnership, and advance the shared aspirations of our two nations. @CMShehbaz

— Dr Mohamed Muizzu (@MMuizzu) October 20, 2026

މި ދަތުރުފުޅުގެ މުހިންމުކަމަށް އަލިއަޅުއްވާލައްވަމުން ރައީސް ޑރ. މުޢިއްޒު ވިދާޅުވީ، ދެ ޤައުމުގެ ދެމެދުގައި އޮތް ޒަމާންވީ ގާތް ގުޅުން އިތުރަށް ބަދަހިކުރުމަށާއި، ދެ ޤައުމުގެ ޕާޓްނާޝިޕް ވަރުގަދަކޮށް، ދެ ޤައުމުގެ ރައްޔިތުންގެ ލާބައާއި މަންފާއަށްޓަކައި ހުރި ޢާންމު ލަނޑުދަނޑިތައް ޙާޞިލުކުރުމަށް މި ދަތުރުފުޅުގެ ތެރެއިން ކުރިއަށްދާ މަޝްވަރާތަކަކީ ނަތީޖާ ނެރެވޭނެ، ކާމިޔާބު ބައްދަލުވުންތަކަކަށް ވާނެ ކަމަށް އުއްމީދު ކުރައްވާ ކަމަށެވެ.

ރައީސުލްޖުމްހޫރިއްޔާގެ މި ދަތުރުފުޅަކީ ދިވެހިރާއްޖެ އާއި ޕާކިސްތާނާ ދެމެދު އޮތް އެކުވެރިކަމުގެ ގުޅުން އައު އުސްމިންތަކަކަށް ގެންދިއުމަށް އެޅިގެންދާ މުހިންމު ފިޔަވަޅެކެވެ.