ޕާކިސްތާނާއި ދެމެދު އޮތް ސިޔާސީ ގުޅުން ވަރުގަދަ ނަމަވެސް، އިޤްތިޞާދީ ގުޅުން އަދި ފުރިހަމައެއް ނުވޭ: ރައީސް

ދިވެހިރާއްޖެއާއި ޕާކިސްތާނާ ދެމެދު އޮތް ސިޔާސީ އެއްބައިވަންތަކަމާއި ޚާރިޖީ އިތުބާރު ވަރުގަދަ ނަމަވެސް، ދެ ޤައުމުގެ އިޤްތިޞާދީ ގުޅުން އަދިވެސް އޭގެ އެންމެ ފުރިހަމަ މިންވަރަށް ވާސިލުނުވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

'މޯލްޑިވްސް-ޕާކިސްތާން ބިޒްނަސް ފޯރަމް 2026' ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސް ވިދާޅުވީ، ދެ ޤައުމުގެ ދެމެދުގައި އޮތް ޒަމާންވީ ރަޙްމަތްތެރިކަމުގެ ބަދަހި ގުޅުން، ވިޔަފާރިއާއި އިންވެސްޓްމަންޓް އަދި ދެފަރާތުގެ ފާގަތިކަމުގެ އައު ދައުރަކަށް ބަދަލުކޮށްލަންޖެހޭ ވަގުތު ޖެހިފައިވާ ކަމަށެވެ. 

ރައީސް މުޢިއްޒު ފާހަގަކުރެއްވި ގޮތުގައި، 1966 ވަނަ އަހަރު ދެ ޤައުމުގެ ދެމެދުގައި ސިޔާސީ ގުޅުން ޤާއިމުކުރިތާ 60 އަހަރު ފުރޭ މުނާސަބަތު ފާހަގަކުރަމުންދާއިރު، ރާއްޖެއާއި ޕާކިސްތާނުގެ ގުޅުން ބިނާވެފައި ވަނީ އިސްލާމީ ވަރުގަދަ ޢަޤީދާގެ މައްޗަށެވެ. އަދި މިހާރު މުސްތަޤުބަލުގެ ލަނޑުދަނޑިތައް އަލުން ކަނޑައަޅަންޖެހިފައިވާ ކަމަށް އެމަނިކުފާނު ވިދާޅުވިއެވެ.

އިޤްތިޞާދީ ގުޅުން ފުޅާކުރުމަށް އެޅުނު މުހިންމު ފިޔަވަޅެއްގެ ގޮތުން، ކުރިއަށް އޮތް 2 އަހަރު ދުވަހުގެ ތެރޭގައި ދެ ޤައުމުގެ ދެމެދުގައި ކުރެވޭ ވިޔަފާރީގެ މިންވަރު 200 މިލިއަން އެމެރިކާ ޑޮލަރަށް އިތުރުކުރުމަށް ބޮޑުވަޒީރު ޝެހްބާޒް ޝަރީފާއެކު އެއްބަސްވެވިފައިވާކަން ރައީސް  ފާހަގަކުރެއްވިއެވެ.

މި ލަނޑުދަނޑިއަކީ ހަމައެކަނި އަދަދުތަކަކަށްވުރެ ބޮޑަށް، ދެ ޤައުމުގެ ރައްޔިތުންގެ ކުރިއެރުމަށާއި ސަރަޙައްދީ ފާގަތިކަމާއި ދިގު މުއްދަތުގެ ހަމަޖެހުން ޤާއިމުކުރުމަށް އެޅޭ ބިންގަލެއް ކަމަށް ރައީސް ވިދާޅުވިއެވެ. އަދި މި މަސައްކަތްތަކުގެ ސަބަބުން އަންނަން އޮތް ޖީލުތަކަށް އޭގެ ޙަޤީޤީ މަންފާ ލިބިގެންދާނެ ޒަމާނީ ބައިވެރިވުމެއް ބިނާވެގެންދާނެ ކަމަށް ވެސް އެމަނިކުފާނު ފާހަގަކުރެއްވިއެވެ.