ޖެނުއަރީގައި އައު ކުޅުންތެރިން ގަންނާކަށް ގާޑިއޯލާ ބޭނުމެއް ނުވޭ

އިންގްލިޝް ޕްރިމިއަރ ލީގުގެ ޗެމްޕިއަން މެންޗެސްޓަރ ސިޓީ މިހާރު އޮތް އުނދަގޫ ހާލަތުން އަރައިގަތުމަށްޓަކައި ޖެނުއަރީ ޓްރާންސްފާގައި އައު ކުޅުންތެރިން ގެންނަން ބޭނުންނުވާ ކަމަށާއި، ބޭނުންވަނީ އަނިޔާގެ ސަބަބުން ކުޅުމާއި ދުރުގައި ތިބި ކުޅުންތެރިން ޓީމާ ގުޅެންކަމަށް، އެ ޓީމުގެ ކޯޗު ޕެޕް ގާޑިއޯލާ ބުނެފިއެވެ.

ގާޑިއޯލާއާއެކު ޕްރިމިއަރ ލީގު 6 ފަހަރަށް ކާމިޔާބުކޮށްފައިވާ މެންޗެސްޓަރ ސިޓީއަށް ލިބުނު އެންމެ ބޮޑު ގެއްލުމަކީ، އެ ޓީމުގެ މެދުތެރެއަށް ކުޅެމުން އަންނަ އަދި މިވަގުތު ދުނިޔޭގައި ހުރި އެންމެ މޮޅު ކުޅުންތެރިޔާ، ރޮޑްރީއަށް އަނިޔާވުމެވެ. މިދިޔަ ސެޕްޓެމްބަރ މަހު އާސެނަލްއާ ކުޅުނު މެޗުގައި އޭނާގެ ކަކުލަށް ލިބުނު އަނިޔާއާ ގުޅިގެން މި ސީޒަނުގައި އޭނާއަށް ދެން ނުކުޅެވޭނެއެވެ. 

މީގެ އިތުރުން، އެ ޓީމުގެ ނަތަން އާކޭ، އޮސްކަރ ބޮބް، ޖޯން ސްޓޯންސް، މަޓެއޯ ކޮވަސިޗް އަދި އެންމެ ފަހުން ކުޅުނު މެޗުގައި އަނިޔާވި މެނުއެލް އަކަންޖީއާއެކު، ގާޑިއޯލާގެ ފުރަތަމަ އެގާރައިން ޖާގަ ހޯދަމުން ދިޔަ މުހިންމު ކުޅުންތެރިންތަކެއް މިވަނީ ބޭނުން ކުރެވޭގޮތް ނުވެފައެވެ. އަދި މެންޗެސްޓަރ ސިޓީ މިހާރު ނެރެމުންދާ ދަށް ނަތީޖާތަކާއެކު، އެ ޓީމު އޮތީ ލީގު ޓޭބަލްގެ އެއްވަނައިގައި އޮތް ލިވަޕޫލް އާއި 8 ޕޮއިންޓު ފަހަތުގައެވެ. އަނެއްކޮޅުން ޗެމްޕިއަންސް ލީގުގެ ގްރޫޕް ފޭސްގައި ވެސް ޓީމުގެ ނަތީޖާތަކުން ފެންނަނީ ނާއުއްމީދީ ކުރިމަގެކެވެ.

މެންޗެސްޓަރގެ ދެ ޓީމުގެ މެދުގައި އާދިއްތަ ދުވަހު އޮންނަ ރަތާއި ނުލުގެ ގަދަ ހިފުމަށް ތައްޔާރުވަމުންދާ ސިޓީގެ ކޯޗު ގާޑިއޯލާ ނޫސްވެރިންނަށް ދިން އިންޓަވިއުއެއްގައި ބުނީ، އޭނާއަށް އޮތް އެންމެ ބޮޑު ގޮންޖެހުމަކީ ސީޒަން ފެށުނު އިރު ތިބި ކުޅުންތެރިންނަށް މިވަގުތު ނުކުޅެވޭ ހާލަތުގައި ތިބުން ކަމަށާއި، އެ ނޫން މާޔޫސްކަމެއް ނެތް ކަމަށެވެ. 

އަދި މި އަހަރުގެ ބެލަން ޑިއޯ ކާމިޔާބުކުރި، ރޮޑްރީ ޓީމުގައި ނެތުމަކީ މިވަގުތު ޓީމަށް ކުރިމަތިވެފައި އޮތް އެންމެ ބޮޑު ގޮންޖެހުންކަމަށް ވެސް އޭނާ ފާހަގަ ކުރިއެވެ. އަދި އޭނާ އެނބުރި އައުމުން، ޓީމު އަލުން ވަރުގަދަ ވާނެކަމަށާއި، އޭނާގެ ހުނަރާއި މެދު އެއްވެސް ޝައްކެއް ނުކުރާކަމަށް ގާޑިއޯލާ ބުންޏެވެ. 

މީގެ އިތުރުން ގާޑިއޯލާ ބުނީ، އަނިޔާގައި ތިބި ކުޅުންތެރިން ގިނަ ކަމުން ޓީމު އަތުރާނެ ގޮތެއް ނިންމުމަށް އޭނާއަށް އުނދަގޫވެފައިވާ ކަމަށާއި، އާންމުންކޮށް ކުޅުންތެރިން ނުކުޅޭ ތަންތަނަށް ވެސް ކުޅުވަން ޖެހިދާނެ ކަމަށެވެ.

އާދީއްތަ ދުވަހު މެންޗެސްޓަރ ސިޓީ އާއި މެންޗެސްޓަރ ޔުނައިޓެޑު ބައްދަލުކުރާ މެޗު ކުޅޭނީ ރާއްޖެ ގަޑިން ރޭގަނޑު 8 ޖަހާއިރު، ސިޓީ އޮފް މެންޗެސްޓަރ ސްޓޭޑިއަމްގައެވެ.

މި މެޗާ ކުރިމަތިލާއިރު، މެންޗެސްޓަރ ސިޓީ އެންމެ ފަހުން ކުޅުނު 6 މެޗުގެ ތެރެއިން އެ ޓީމު ވަނީ 4 މެޗުން ބަލިވެ، 1 މެޗުން އެއްވަރުވެފައެވެ. އަނެއްކޮޅުން މެންޗެސްޓަރ ޔުނައިޓެޑު 2 މެޗުން ބަލިވެފައިވާއިރު، 2 މެޗުން ވަނީ އެއްވަރުވެފައެވެ.