އިންޑިއާގެ ގުކޭޝް ދުނިޔޭގެ އެންމެ ހަގު ޗެސް ޗެމްޕިއަނަކަށް

ދުނިޔޭގެ އެންމެ ހަގު ޗެސް ޗެމްޕިއަންގެ ޝަރަފު، އުމުރުން އެންމެ 18 އަހަރުގެ ގުކޭޝް ޑޮންމަރާޖޫ ހޯދައިފިއެވެ. އިންޑިއާގެ ގްރޭންޑްމާސްޓަރު ޗެސް ކުޅުންތެރިޔާ ގުކޭޝް މި ޝަރަފު ހޯދީ، ސިންގަޕޫރުގެ ރިސޯޓް ވޯލްޑް ސެންޓޯސާގައި ހޯސްޓްކުރި 14 ވަނަ ވޯލްޑް ޗެސް ޗެމްޕިއަންޝިޕްގައި، ދުނިޔޭގެ އެންމެ ފަހުގެ ޗެސް ޗެމްޕިއަން،  ޗައިނާގެ ޑިން ލިރެން ބަލިކުރުމަށްފަހުއެވެ. 

މީގެ ކުރިން ދުނިޔޭގެ އެންމެ ހަގު ޗެސް ޗެމްޕިއަނެއްގެ ގޮތުގައި ހުރީ، އުމުރުން 22 އަހަރުގެ ގެރީ ކެސްޕެރޯވްއެވެ. އޭނާ އެ ޝަރަފު ހޯދީ 1985 ވަނަ އަހަރުއެވެ. 

 ގުކޭޝް އާއި ޑިން ލިރެން ބައްދަލުކުރި މެޗު ޓައި ބްރޭކާ އަކަށް ދާނެ ކަމަށް ބެލެވުނު ނަމަވެސް، ޑިން ލިރެން އަށް ހެދުނު ގޯހެއްގެ ފައިދާނަގައި، ގުކޭޝް މެޗު ކާމިޔާބުކުރީ 7.5-6.5 ގެ ސްކޯއަނުންނެވެ. 

މެޗަށްފަހު ވާހަކަ ދައްކަމުން ގުކޭޝް ބުނީ، އޭނާ އެ މެޗުގައި މަސައްކަތްކުރީ އެއް ގޭމުން އަނެއް ގޭމަށް ކުޅުން ރަގަޅު ކުރުމަށެވެ. އަދި އޭނާއަށް މެޗުގައި ތަފާތެއް ގެނެވުނީ އެންމެ ގޭމަކުންކަމަށް ވެސް ފާހަގަކޮށްފައިވެއެވެ. 

ދުނިޔޭގެ މޮޅު ޗެސް ކުޅުންތެރިޔާގެ މަގާމުގައި މީގެ ކުރިން ހުރި ޑިން ލިރެންއަށް، އޭނާ އެ މަގާމު ހޯދި މެޗުގައި، 2023 ގައި ރަޝިއާގެ އިއާން ނެޕޮމްނިއާޗީއާ ދެކޮޅަށް ހޯދި ކާމިޔާބަށްފަހު، ރަގަޅު ކުޅުމެއް ދެއްކިފައެއް ނުވެއެވެ. އަދި މި އަހަރުގެ ޖެނުއަރީއަށްފަހު "ކްލެސިކަލް" މެޗެއް އޭނާއަށް ކާމިޔާބު ކުރެވިފައެއް ވެސް ނުވެއެވެ. 

ޗެމްޕިއަނަކަށް 2.5 މިލިއަން ޑޮލަރުގެ ފައިސާގެ އިނާމު ހުށަހަޅާފައިވާ މެޗު ކާމިޔާބުކުރުމަށްފަހު ގުކޭޝް ބުނީ، ދުނިޔޭގެ ޗެމްޕިއަނަކަށް ވުމަކީ އަދި ދުނިޔޭގެ އެންމެ މޮޅު ކުޅުންތެރިޔާއަށް ވުން ނޫންކަމަށާއި، 2013 ވަނަ އަހަރުން ފެށިގެން 2022 ވަނަ އަހަރާއި ހަމައަށް ދުނިޔޭގެ ޗެމްޕިއަންގެ ގޮތުގައި ހުރި މަގްނުސް ކާލްސަންއަކީ އޭނާ ގަބޫލު ކުރާ ގޮތުގައި ދުނިޔޭގެ އެންމެ މޮޅު ޗެސް ކުޅުންތެރިޔާ ކަމަށެވެ. 

މި ކާމިޔާބާއެކު ގުކޭޝްއަކީ ޗެސް ޗެމްޕިއަނަކަށް ހޮވުނު އިންޑިއާގެ ދެވަނަ ކުޅުންތެރިޔާއެވެ. އޭނާގެ އިތުރުން، ވިސްވަނަތަން އާނަންދު ވަނީ މި މަގާމު ފަސް ފަހަރު ހޯދާފައެވެ.