"އައި.ވީ.އެފް" ފަރުވާ އަށް އެދި ހުށައަޅާނީ ކިހިނެއް؟

އައިވީއެފް ފަރުވާއަށް އެހީ ހޯދުމަށް އެދޭ ފަރާތްތަކުގެ ޝަރުތުތަކާއި، އެހީ ދިނުމުގެ އުސޫލުތަކާއި، އެކަމަށް އެދި ހުށަހަޅަންޖެހޭ ލިޔެކިޔުންތަކަކީ ކޮބައިކަން އެނގޭތަ؟

އައިވީއެފް ފަރުވާއަށް އެހީ ހޯދުމަށް އެދޭ ފަރާތްތަކުގެ ޝަރުތުތަކަކީ ކޮބާ؟

1. އެހީއަށް އެދޭ ދެމަފިރިންގެ ކައިވެންޏަށް މީލާދީ ގޮތުން 3 އަހަރު ވެފައިވުން.
2. ގުދުރަތީ ގޮތުން ދަރިމައިވުމަށް ހުރަސްއަޅާފަދަ ޞިއްޙީ ސަބަބެއް މެދުވެރިވެފައިވުން.
3. ދަރިމައިވުމުގެ އެހެނިހެން ފަރުވާ ކާމިޔާބު ނުވެ، ރިޕްރޮޑަކްޓިވް ޕެތޮލޮޖީއިން އައިވީއެފްއަކީ އެފަރާތަށް އެންމެ އެދެވިގެންވާ ފަރުވާކަމަށް ކަމާގުޅޭ ސްޕެޝަލިސްޓެއް ލަފާ ދީފައިވުން.
4. އެހީއަށް އެދޭ ދެމަފިރިން ކުރެ އެއްވެސް ފަރާތެއް ދަރިމައިނުވާ އޮޕަރޭޝަން ކޮށްފައި ނުވުން.
5. ދެމަފިރިންގެ ދަރިއެއް ދުނިޔޭގައި ނެތުން.
6. އައިވީއެފްގެ ފަރުވާ ފަށާއިރު އަނބިމީހާގެ އުމުރުން 30 އަހަރު ފުރި، 42 އަހަރު ފުރިފައި ނުވުން އަދި ފިރިމީހާގެ އުމުރުން 55 އަހަރު ފުރިފައި ނުވުން.
7. އަނބިމީހާގެ ބޮޑީ މާސް އިންޑެކްސް (ބީއެމްއައި) 19 އާއި 30 އާ ދެމެދު ހުރުން.
8. އެހީއަށް އެދުމުގެ 6 މަސް ކުރިން ފަރުވާ ހޯދާ ދެމަފިރިން ދުންފަތުގެ އިސްތިޢުމާލު ކުރުން ހުއްޓާލައިފައިވުން.
9. އެހީއަށް އެދޭ ދެމަފިރިން ކުރެ އެއްވެސް ފަރާތަކީ، ފާއިތުވި 3 އަހަރު ދުވަހު ޖިނާއީ ކުށެއް ސާބިތުވެ ޙުކުމެއް ކޮށްފައިވާ ފަރާތެއް ކަމުގައި ނުވުން.
10. ފާއިތުވި 6 މަސްދުވަހުގެ ތެރޭގައި އަނބިމީހާގެ "އެންޓީ މުލޭރިއަން ހޯމޯން" 0.8 އަށް ވުރެ ދަށަށް ގޮސްފައި ނުވުން، އަދި މަހުވާރީ ކަންތައް ފެށިގެން ދެވަނަ ދުވަހާއި ފަސްވަނަ ދުވަހާ ދެމެދު "ފޮލިކަލް ސްޓިމިއުލޭޓިންގ ހޯމޯން"ގެ މިންވަރު 10 އަށްވުރެ މަތި ނުވުން.
11. މީގެ ކުރިން ސްކީމް މެދުވެރިކޮށް އައިވީއެފްގެ އެހީ ހަމަޖެހިފައިވާ ފަރާތެއް ކަމުގައި ނުވުން ނުވަތަ އަމިއްލަ ޚަރަދުގައި އައިވީއެފްގެ 3 ބުރު ފުރިހަމަކޮށްފައި ނުވުން.

އިސްތިސްނާ: އަނބިމީހާގެ އުމުރުން 25 އަހަރު ފުރި، ދިމާވާ ޞިއްޙީ ޙާލަތެއްގެ ސަބަބުން އައިވީއެފް ހެދުމަކީ އެންމެ އެދެވިގެންވާ ފަރުވާކަމަށް ކަމާގުޅޭ ސްޕެޝަލިސްޓެއް ލަފާ ދީފައިވާނަމަ އަދި މިކަމާގުޅޭ އެހެން ޝަރުތުތައް ފުރިހަމަވާނަމަ، އެފަދަ ފަރާތްތަކަށް މި އުސޫލުގެ ދަށުން އައިވީއެފްގެ ފަރުވާއަށް އެހީ ފޯރުކޮށްދިނުމަށް ހުރަހެއް ނެތެވެ.

ޕޮއިންޓު ދިނުމުގެ އުސޫލު!

1. އައިވީއެފްއަށް އެހީ ފޯރުކޮށްދެނީ ޝަރުތުތައް ފުރިހަމަވާ ފަރާތްތަކުގެ ތެރެއިން، އެ އަހަރަކަށް އެހީ ފޯރުކޮށްދިނުމަށް ސްކީމް ބޯޑުން ކަނޑައަޅާފައިވާ އުސޫލުގެ މަތިން އެންމެ މަތިން ޕޮއިންޓް ލިބޭ ފަރާތްތަކަށެވެ.

2. ޕޮއިންޓް ދެވޭ އުސޫލު:
   - ދެމަފިރިންގެ ކައިވެނީގެ މުއްދަތު އަދި އަނބިމީހާގެ އުމުރު: 50 ޕޮއިންޓް
   - ދެމަފިރިންގެ އާމްދަނީގެ މިންވަރު: 40 ޕޮއިންޓް
   - ދެމަފިރިންގެ ތެރެއިން އެއްވެސް ފަރާތެއްގެ ދަރިއެއް ދުނިޔޭގައި ނެތްނަމަ: 25 ޕޮއިންޓް
   - ދެމަފިރިންގެ/ޢާއިލާގެ ބޯހިޔާވަހިކަން ހަމަޖައްސަމުންދާ ގޮތް: 10 ޕޮއިންޓް
   - މީގެ ކުރިން އައިވީއެފްގެ ފަރުވާ ހޯދާފައިވާ މިންވަރު: 25 ޕޮއިންޓް

އެހީއަށް އެދި ހުށައަޅާނީ ކިހިނެއް؟

އެހީއަށް އެދުމަށް އިޢުލާންކޮށް ހުޅުވާލެވޭނެއެވެ.

އައިވީއެފްގެ ފަރުވާއަށް ހުށަހަޅަންޖެހެނީ އެޖެންސީން ކަނޑައަޅާ ފޯމު މެދުވެރިކޮށެވެ. ފޯމު އެޖެންސީގެ ވެބްސައިޓުގެ ޑައުންލޯޑްސްގައި ލިބެން ހުންނާނެއެވެ.

ފޯމު ހުށަހެޅުމަށްފަހު:
   - 5 ދުވަހުގެ ތެރޭގައި ފޯމު ފުރިހަމަކަން ނުވަތަ އިތުރު މަޢުލޫމާތު ބޭނުންވާނަމަ އެކަން އަންގާނެއެވެ.
   - 15 ދުވަހުގެ ތެރޭގައި ފަރުވާއަށް ޝަރުތު ހަމަވާކަން އަންގާނެއެވެ.
   - ފޯމު ހުށަހެޅުމުގެ މުއްދަތު ހަމަވާތާ 30 ދުވަހުގެ ތެރޭގައި އެހީ ހަމަޖެހޭ ފަރާތްތަކަށް އަންގާނެއެވެ.

ސްކީމްގެ ދަށުން ފަރުވާއަށް އެހީ ހަމަޖެހޭ ދެމަފިރިންނަށް ބޭސްފަރުވާގެ އިތުރުން ދެކޮޅު ޓިކެޓް އަދި ހުރުމާއި ކެއުމުގެ ޚަރަދު ކަނޑައެޅޭ މިންވަރަކަށް އެހީ ހަމަޖައްސައިދެވޭނެއެވެ.

އެހީ ހަމަޖެހޭކަން އަންގާތާ 3 މަސްދުވަހުގެ ތެރޭގައި ފަރުވާ ފަށަންޖެހޭނެއެވެ. މަޤްބޫލު އުޒުރެއް ނެތި ފަރުވާ ފަށާފައިނުވާނަމަ އެހީ ބާޠިލްވާނެއެވެ.

ފަރުވާ ފުރިހަމަކުރުމަށް އެހީ ހަމަޖައްސައިދެނީ ގިނަވެގެން މީލާދީ 2 އަހަރުގެ މުއްދަތަށެވެ.

އައިވީއެފް ފަރުވާގެ އެހީއަށް އެދޭ ފޯމާއެކު ހުށަހަޅަންޖެހޭ ލިޔެކިޔުންތަކަކީ ކޮބާ؟

1. ދެމަފިރިންގެ އައިޑީ ކާޑުގެ ދެފުށް ފެންނަ ކޮޕީ
2. ދެމަފިރިންގެ ކައިވެނީގެ ސެޓްފިކެޓް
3. މީގެ ކުރިން އައިވީއެފް ފަރުވާ ހޯދާފައިވާނަމަ އެކަމާ ގުޅޭ ޞިއްޙީ ލިޔެކިޔުންތައް
4. ދެމަފިރިންގެ ނަމުގައި ހުޅުވާފައިވާ އެންމެހާ ބޭންކް އެކައުންޓްތަކުގެ ފާއިތުވި 3 މަހުގެ ބޭންކް ސްޓޭޓްމަންޓް
5. ދެމަފިރިން އާމްދަނީ ހޯދުމަށް މަސައްކަތް ކުރާނަމަ، ލިބޭ މުސާރައާއި އިނާޔަތް އެނގޭނެ ރަސްމީ ލިޔުން
6. ޑޮކްޓަރުގެ ރިފަރަލް ފޯމު
7. ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ފުރިހަމަކޮށްފައިވާ ދެމަފިރިންގެ ކުށާއި ދަރަނީގެ ރެކޯޑު ސާފުކުރާ ފޯމު

އިތުރު މަޢުލޫމާތު:

1. ފޯމު ފުރިހަމަކޮށްފައި ލިޔެކިޔުންތަކާއެކު އާސަންދަ އޮފީހުގެ ކައުންޓަރަށް ނުވަތަ އީމެއިލް ނޫނީ ޕޯޓަލް މެދުވެރިކޮށް ހުށަހެޅިދާނެއެވެ.

2. ފަރުވާ ފެށިކަމަށް ބަލަނީ "އޯވޭރިއަން ސްޓިމިއުލޭޝަން" ބޭސް ނަގަން ފަށާ ހިސާބުންނެވެ.

3. ފަރުވާ ހަމަނުޖެހޭ ފަރާތްތަކަށް ފޯމު ހުށަހެޅުމަށް އަލުން ހުޅުވާލުމުން އެހީއަށް އެދުމުގެ ފުރުޞަތު އޮންނާނެއެވެ.