ޚަބަރު
ކުނބުރުދޫ ބަނދަރު ބޮޑު ކޮށްދިނުމަށް ރައީސް މުޢިއްޒުގެ އަރިހުން އެދިއްޖެ

އދ.ކުނބުރުދޫ ކައުންސިލާއި ރައީސް ޑރ މުޢިއްޒު ބައްދަލުކުރެއްވުން. ފޮޓޯ: ރައީސް އޮފީސް
ހުލާސާ
އދ.ކުނބުރުދޫ ބަނދަރު ބޮޑު ކޮށްދިނުމަށް އެރަށު ކައުންސިލުން ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އަރިހުގައި އެދިއްޖެއެވެ.
ކުނބުރުދޫ ކައުންސިލުން ރައީސް މުޢިއްޒުގެ އަރިހުގައި މިގޮތައް އެދިފައިވަނީ އެރަށު ކައުންސިލާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި އެކު ބޭއްވެވި ބައްދަލުވުމުގައެވެ.
މިބައްދަލުވުމުގައި ކުނބުރުދޫ ކައުންސިލުން ވަނީ ރާއްޖޭގެ ރައީސަކު ކުނބުރުދޫ އަށް ޒިޔާރަތް ނުކުރައްވާތާ 15 އަހަރު ވެފައިވާ ކަން ފާހަގަކުރައްވައިިފައެވެ. އަދި އެކަމުގެ ކަންބޮޑުވުން އެ ކައުންސިލުން ވަނީ ފާހަގަކޮށްފައެވެ.
ކުނބުރުދޫ ކައުންސިލުން ވަނީ ރަށުގެ ސުކޫލު ހާލަތު ރަނގަޅުކުރުމަށް ބޭނުންވާކަމަށާއި ބަނދަރު ބޮޑުކުރުމަށް ބޭނުންވާކަން ފާހަގަކުރައްވައިފައެވެ.
ހަމައެއާއެކު ރަށުގެ ކުނި ނެގުމާއި ކުނި ނައްތާލުމުގެ މައްސަލައަށް ހައްލުބޭނުންވާކަމަށާއި ރަށުގެ ކުޅިވަރުގެ ދާއިރާ ހަރުދަނާކުރުމަށް ބޭނުންކަމުގައި ވެސް ކުނބުރުދޫ ކައުންސިލުން ފާހަގަކުރެއްވިއެވެ.
މީގެ އިތުރުން ކުނބުރުދޫ ރައްޔިތުންނަށް އެންމެ ބޭނުންވާ އެންމެ މުހިންމުކަމަކީ ބޯހިޔާވަހިކަންކަމުގައި ކައުންސިލުން ޚާއްސަ ގޮތެއްގައި ފާހަގަކުރެއްވެވިއެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ މުޢިއްޒު ވިދާޅުވީ އެމަނިކުފާނު ވަޢުދުވެވަޑައިގެންނެވި ކަންކަން ކުރިއަށްދާނެކަމަށެވެ. އަދި ދެންވެސް ޖުމްލަކޮށް ކައުންސިލުން ފާހަގަކުރެއްވި ކަންކަން ބައްލަވައި ކުރިއަށްގެންދަވާނެކަމުގައި އެމަނިކުފާނު ވިދާޅުވިއެވެ.
މިއަދުގެ ބައްދަލުކުރެއްވުމުގައި ރައީސް މުޢިއްޒުގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ކުނބުރުދޫގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ޙިއްޞާކުރައްވާފައެވެ.
މިބައްދަލުކުރެއްވުން ކުރިއަށް ގެންދިޔައީ މިއަދު ހެނދުނު އަރިއަތޮޅު ދެކުނުބުރީ އަތޮޅު ކައުންސިލް އިދާރާގައެވެ.